Utor u sha Uhar 9:1-37
9 Profeti Elisha maa yila môm ken ônov mba uprofeti kaa a na ér: “Fiir ikyondo shin iwenge, tôô isheghmkure ne fese za ken Ramoti-gileadi.+
2 U za nyôron ker yô, ker Yehu+ wan u Yehoshafati wan u Nimshi; nyôr za kaa un a mough ape a tem vea anmgbianev nav la, maa nyôr a na ken iyou i ken atô la.
3 Nahan bugh isheghmkure la, haa un mkurem sha ityo, kaa wer, ‘Ka kwagh u Yehova a kaa je ne, ér: “M shighe u mkurem mer tema tor sha Iserael.”’+ Maa bugh hunda due yevese, de timbir ga.”
4 Tsô wanye u profeti la mough gba yemen ken Ramoti-gileadi.
5 Za nyer yô, a nenge ukurmbautyaav tema her. Maa a kaa ér: “Kurutya, m ngu a loho sha ci wou.” Yehu gema pine ér: “Ka hanmô wase?” A kaa ér: “Ka we, kurutya.”
6 Tsô Yehu mough sha nyôr ken iyou; maa wanye la haa un mkurem sha ityo, kaa a na ér, “Ka kwagh u Yehova Aôndo u Iserael a kaa je ne, ér: ‘M shighe u mkurem mer tema tor sha ior mba Yehova, sha Iserael.+
7 Tim ya u teru Ahaba kpee je, nahan m or iyev i awambe a mbatomov av uprofeti man a mbatomov mba Yehova mba ve kpe sha uwegh ku Yesebel la cii.+
8 Ya u Ahaba cii una tim kera; shi me tim hanma nomsoor* u hen tsombor u Ahaba cii kera, kua mba ve lu a or u wasen ve ga, shi i ver ve iyol ken Iserael la.+
9 Shi me er ya u Ahaba una hingir er ya u Yeroboam+ wan u Nebati, man er ya u Baasha+ wan u Ahiya nahan.
10 Yesebel yô, aniwaav vea ya un hen inya i ken Yesereel la,+ or môm nana ii un ga.’” Tsô a bugh hunda a due a yevese a yem.+
11 Yehu hidi va kohol mbatomov mba ter na yô, ve pine un ér: “Kwagh za iyol ga ga̱? Ka nyi orihyundu ne a ve hen a wee?” A gema a kaa a ve ér: “Ne fa injaor i a lu, man kwagh u ka a ôr yô.”
12 Kpa ve kaa ér: “Ka mimi ga! Wea lumun yô, ôr se.” Maa a kaa ér: “Ka kwagh u a ôrom je ne, shi a kaa ér, ‘Ka kwagh u Yehova a kaa je ne, ér: “M shighe u mkurem mer tema tor sha Iserael.”’”+
13 Tsô fese je, hanma ve nan gema ikyondo i nan, nan tar hen angahar a na, hen ijiir i unden sha mi la,+ maa ve tôngo korough ve kaa ér: “Yehu hingir tor!”+
14 Yehu+ wan u Yehoshafati wan u Nimshi maa zua zwa sha Yehoram.
Er Hasael+ tor u Shiria lu tan num sha Iserael yô, Yehoram man ikyumutya i Iserael cii lu hen Ramoti-gileadi lu kuran.+
15 Shighe kar yô, Tor Yehoram hide yem ken Yesereel+ sha er avav a Mbashiria gber un, shighe u lu nôngon ityav a Hasael tor u Shiria+ la a bee yô.
Yehu maa kaa ér: “Nea lumun yô, de deen nen ner or môm nana due ken gar, nana za ôr kwagh ne ken Yesereel ga.”
16 Tsô Yehu unde ikyekyeutya na yem ken Yesereel, sha ci u Yehoram vihi iyol lu ker, nahan Ahashia tor u Yuda sen za u za nengen a Yehoram.
17 Er orkuran tile sha iyou i taven i ken Yesereel la, a nenge Yehu lu van vea ior nav. Fese je a kaa ér: “M nenge ikpelaior ngi van.” Yehoram kaa ér: “Yila orhendan nyinya, tindi un a za kohol ve, a pine ve ér, ‘Ne mba van ka bem kpa?’”
18 Nahan orhendan nyinya la za kohol un, kaa ér: “Tor kaa ér i pine u ér, ‘U ngu van ka bem kpa?’” Kpa Yehu kaa ér: “Ka nyi i gbe u a ‘beme’? Kar dondo sha a mo!”
Orkuran la maa kaa ér: “Orôron-loho la nyôr ape ve lu la, kpa a hide ga.”
19 Tsô shi a tindi orhendan nyinya u sha uhar, za kohol ve yô, kaa ér: “Tor kaa ér i pine u ér, ‘U ngu van ka bem kpa?’” Kpa Yehu kaa ér: “Ka nyi i gbe u a ‘beme’? Kar dondo sha a mo!”
20 Orkuran la maa kaa ér: “A za nyôr ape ve lu la, kpa a hide ga, man mba hendan kwagh er ka Yehu wan u wan u Nimshi nahan, gadia ka a henda kwagh sha ihyundu.”
21 Yehoram kaa ér: “Kange anyinya sha ikyekyeutya you!” Tsô i kange anyinya sha ikyekyeutya na, nahan Yehoram tor u Iserael man Ahashia+ tor u Yuda due, hanma ve nan nyôr shin ikyekyeutya i nan u za kohol Yehu. Ve za zua a na hen sule u Naboti+ Oryesereel la.
22 Yehoram nengen a Yehu yô, fese je a pine ér: “Yehu u ngu van ka bem kpa?” Kpa a gema a kaa ér: “Aluer ngôu Yesebel+ ngu eren idya shi sôron akombo kpoghuloo yô,+ a er nan ve bem una lu sha wono?”
23 Fese je, Yehoram goom a ikyekyeutya na ér una yevese, maa a kaa a Ahashia ér: “Ahashia i bume se!”
24 Tsô Yehu tôô ada, wa ivaan ker ta Yehoram hen hua-ijime, ivaan la kar due hen ishima, maa a gba a kpe shin ikyekyeutya na.
25 Maa a kaa a Bidekar orutya na u vesen ér: “Tôô un za kende ken sule u Naboti Oryesereel la.+ U umbur yô, mo man we yange se lu hendan akekeautya imôngo van ter na Ahaba ken ijime, shighe u Yehova kaa ér kwagh ne una er un la, ér:+
26 ‘“Mimi je, er nyen m nenge a awambe a Naboti+ man awambe a ônov nav nahan,” kape Yehova a kaa ne, “Me or iyev+ i awambe a ve sha a we hen inya ne i môm,” kape Yehova a kaa la.’ Nahan tôô un hegen za kende ken sule la, vough er Yehova yange kaa nahan.”+
27 Ahashia+ tor u Yuda nengen kwagh u lu zan hemen ne yô, a yevese a yem sha gbenda u zan hen iyou i sule lu her yô. (Shighe kar yô, Yehu zenda un ijime za kaa ér: “Un kpa wua un nen!” Tsô ve ta num sha a na shin ikyekyeutya na, ve vihi un iyol er kôndo lu yemen sha Gur, u a lu ikyua a Ibeleam la.+ Kpa a yevese zan zan, za nyer Megido yô, a kpe her.
28 Maa mbatomov nav tôô un shin ikyekyeutya yem a na ken Yerusalem, ve za ii un ken uwar na a uter nav ken Gar u Davidi.+
29 Lu ken inyom i sha 11 i hemen u Yehoram wan u Ahaba la, Ahashia+ tema tor sha Yuda ye.)
30 Yehu za nyer ken Yesereel+ yô, Yesebel+ ungwa. Tsô a shighe tojir sha akurashee, shi a er ityough, maa a dugh ashe sha windou a kenger shin inya.
31 Yehu karen sha hundagar nyer ker yô, Yesebel pine ér: “Yange Shimeri wua orvesen na+ nahan, kwagh za a na doo kpa?”
32 Maa a gema a kenger sha windou la, a pine ér: “Ka an nan lu ken vegher wama? Ka ana?”+ Fese je iorov uhar shin utar mba eren tom ken ya u tor gema kenger un shin inya.
33 Tsô a kaa ér: “Daa un nen a gba shin inya!” Maa ve daa un a va gba shin inya, nahan awambe a na tsenda sha kpekpe man sha anyinya, maa a ndyar un angahar.
34 Been yô, a nyôr ker a za ya kwagh shi a ma kwagh. Maa a kaa ér: “Nea lumun yô, tôô nen kwase u a lu a ifyan iyol ne za ii nen. I lu nahan kpa ka wan u tor.”+
35 Kpa mba ze ér vea za ii un yô, ve nenge a kwagh môm ga, lu igbôndotyo na man akevangahar a na man akevaveegh a na tseegh mase shin ye.+
36 Mba hidi mba va ôron un yô, a kaa ér: “Kwagh ne kure kwaghôron u Yehova+ yange ôr sha ikyev i ortom na Eliya Ortishibi la, ér, ‘Ka hen inya i Yesereel la, aniwaav vea ya inyam i Yesebel ye.+
37 Nahan ikyom i Yesebel ia hingir ihyôghonov mbi sôron sule hen inya i Yesereel, sha er vea kaa ér: “Ka Yesebel je ne” ga yô.’”
Ngeren mba shin kpe
^ Zwa Heberu, “hanma or u nyanden sha kpekpe.” Ka mkaanem ma ken zwa Heberu ma tuhwan nomso a mi.
