Utor u sha Uhar 3:1-27
3 Tsô Yehoram+ wan u Ahaba tema tor sha Iserael ken Samaria, ken inyom i sha 18 i Yehoshafati tema tor sha Yuda la. Yehoram hemen anyom 12.
2 Yehoram lu eren kwaghbo sha ishigh ki Yehova, kpa a er kwaghbo kuma sha ter na shin ngô na ga, gadia a dugh ityôgh ki akombough ki iwenegh ki Baal, ki ter na er la kera.+
3 Nahan kpa, a er asorabo a Yeroboam wan u Nebati na Iserael er la.+ A undu a ga.
4 Hen shighe ne, Mesha tor u Moabi lu a sule-iyôngo, nahan taan tor u Iserael kpandegh sha ônovmbaiyôngov 100,000, man sha anomaiyôngo, a i lu a tôndo a aive ga yô 100,000.
5 Ahaba kpen+ nahan maa, tor u Moabi hemba tor u Iserael ato.+
6 Tsô Tor Yehoram due ken Samaria sha iyange la, za kohol Mbaiserael cii imôngo.
7 Shi a tindi loho hen Yehoshafati tor u Yuda, a kaa ér: “Tor u Moabi hembam ato. U za vea mo, u za nôngon ityav a Moabi?” A gema a kaa ér: “Me za.+ Mo man we se mba môm, ior ou ka ior av. Anyinya a am kpa ka anyinya a ou.”+
8 Maa a pine ér: “Ka hanma gbenda se kôndo sha mi se zaa?” A gema a kaa ér: “Se za sha gbenda u ken taaikyôngo u Edom.”
9 Tsô tor u Iserael mough vea tor u Yuda, man tor u Edom,+ ve gba yemen. Mba zenden hurugh hurugh ayange ataankarahar yô, mngerem kera lu sha ci u mbautyaav man uzendenya mba ve lu a mi la ga.
10 Tor u Iserael kaa ér: “Kwagh ne vihi tsôô! Yehova kohol utor mba utar mban ér una na ve sha ikyev i Moabi tseegh tsô!”
11 Yehoshafati maa kaa ér: “Profeti u Yehova nan ngu heen, u se pine Yehova kwagh sha ikyev i nan gaa?”+ Nahan môm ken mbatomov mba tor u Iserael kaa ér: “Elisha+ wan u Shafati, u yange haan Eliya mngerem sha ave la,* ngu heen.”+
12 Tsô Yehoshafati kaa ér: “Yehova lamen a na.” Maa tor u Iserael man Yehoshafati man tor u Edom, sen za hen a na.
13 Elisha pine tor u Iserael ér: “Er nan u ve hen a moo?*+ Yem hen uprofeti mba teru man hen uprofeti mba ngôu.”+ Kpa tor u Iserael kaa a na ér: “Ei, sha ci u Yehova kohol ator a atar ne ér, una na a sha ikyev i Moabi.”
14 Elisha gema kaa ér: “Mimi je, er Yehova u akum a sha, un u m eren un tom,* a lu u uma ne, luun er m ngu a icivir sha Yehoshafati+ tor u Yuda ga yô, ma m zough ishigh a we ga, shi kwagh ma a gbem a we kpaa ga.+
15 Vam nen a or u kuhwan adiguve.”*+ Or u kuhwan adiguve la, hiin u kuhwan adiguve nahan maa, jijingi u* Yehova sen sha a na.+
16 A kaa ér, “Ka kwagh u Yehova a kaa ne, ér: ‘Time nen ahungwa kpishi shin pev* ne,
17 gadia ka kwagh u Yehova a kaa ne, ér: “Ne nenge a ahumbe ga, shi ura kpa ne nenge a mi ga; kpa pev* ne una iv a mngerem,+ nahan ne ma, ne man ilev yenev, kua annyamev enev mbagenev.”’
18 Kpa kwagh ne ka kwagh u cuku sha ishigh ki Yehova,+ gadia una na Moabi kpa sha ikyev yen.+
19 Gba u ne tim hanma gar u i maa i kase,+ man hanma gar u doon cii kpee je. Gber nen hanma kon u dedoo cii kera, shi cir nen ambor a mnger cii, shi haa nen awen hen hanma inya i dedoo cii, vihi nen i.+
20 Sev mbu aven, sha shighe u ka i naan nagh ku sha samuyia pepe la yô,+ mngerem gba van vegher u Edom la, maa tar la iv a mngerem.
21 Mbamoabi cii mba ongo ér utor mbara kôndo va, u va nôngon ityav a ve yô, ve yila nomso mba vea fatyô u tôôn ikyav mbi utyaav la cii,* ve va kohol imôngo, ve tile hen ikighirtar ve.
22 Mba nderen pepe pepe yô, iyange ta sha mngerem mara, kpa ken vegher u Mbamoabi yô, mngerem mara lu er awambe nahan.
23 Ve kaa ér: “Kwagh ne ka awambe! Utor mbara sôngo ayol a ve sha sanker je ka ashe tugh ga. Nahan we Moabi, mough za ya ishar!”+
24 Mba za nyer ken afo a Mbaiserael yô, Mbaiserael mough gba wuan Mbamoabi mba ve lu yevese ve la haan inya.+ Ve zenda ve zan zan ve nyôr ken Moabi, ve lu wuan Mbamoabi haan inya er ve lu yemen la.
25 Ve yôhôr agar la, shi hanma or ker iwen hen hanma inya i dedoo, maa hanma inya iv a awen; ve cir hanma imbormnger,+ shi ve gber hanma kon u dedoo ve kende inya.+ Ken masejime yô, lu ukpekpe mba Kir-hareseti+ mba i maa sha awen la tseegh yôhôr ga ye, nahan mbakeren mzu va kase un, yôhôr un haa inya.
26 Tor u Moabi nengen ér ityav hemba un yô, a mough a nomso 700 mba ve lu a usanker yô, ér una kar hen atô u tor u Edom;+ kpa ve fatyô ga.
27 Tsô a kôr waniunda na, u lu u una va tema tor sha ityough nagh la, a na nagh ku nanden a mi+ sha kpekpe. Nahan ishima vihi ior a Iserael pev, maa ve de u nôngon ityav a na, ve cin ve hide ken tar ve.
