Utor u sha Uhar 2:1-25
2 Ka va zurum u Yehova una tôô Eliya+ una yem a mi sha* ken uraahumbe yô,+ Eliya man Elisha+ due ken Gilgal kera.+
2 Eliya kaa a Elisha ér: “Wea lumun yô lu heen, sha ci u Yehova tindim ken Betel.” Kpa Elisha kaa ér: “Mimi je er Yehova a lu u uma ne, man er we kpa u lu uma ne, me undu u ga.” Tsô ve sen shin Betel.+
3 Maa ônov mba uprofeti* mba ken Betel due va hen Elisha, va pine un ér: “U fa er nyian Yehova a lu yemen a orvesen wou, una kera hemen we ga kpa?”+ A gema a kaa ér: “M vande fan. Lu nen ving.”
4 Eliya maa kaa a na ér: “Elisha, wea lumun yô lu heen, sha ci u Yehova tindim ken Yeriko.”+ Kpa Elisha kaa ér: “Mimi je er Yehova a lu u uma ne, man er we kpa u lu uma ne, me undu u ga.” Nahan ve yem ken Yeriko.
5 Tsô ônov mba uprofeti mba ve lu ken Yeriko la va hen Elisha, va pine un ér: “U fa er nyian Yehova a lu yemen a orvesen wou, una kera hemen we ga kpa?” A gema a kaa ér: “M vande fan. Lu nen ving.”
6 Eliya kaa a na ér: “Wea lumun yô lu heen, sha ci u Yehova tindim hen Yordan.” Kpa a kaa ér: “Mimi je er Yehova a lu u uma ne, man er we kpa u lu uma ne, me undu u ga.” Nahan ve uhar cii ve yem.
7 Shi ônov mba uprofeti 50 kpa za tile ken ica, lu kenger er ve uhar ve tile hen kpe u Yordan yô.
8 Tsô Eliya tôô ikyondo na i profeti la+ hure gema gbidye sha mnger, maa ma pav yem ken imese man ken iyan, nahan ve uhar cii ve per sha tareghnyaagh.+
9 Mba peren nahan maa, Eliya kaa a Elisha ér: “Sôn kwagh u u soo wer m er sha ci wou cii ve, a tôôm hen a we kera ye.” Elisha maa kaa ér: “Wea lumun yô, ma i nem jijingi wou+ kwa har.”*+
10 Eliya gema kaa ér: “Kwagh u u sen ne ka kwagh u taver. Aluer u nenge a mo shighe u a tôôm hen a we kera la yô, a lu er u sen nahan; kpa aluer ka nahan ga yô, a lu er u sen la ga.”
11 Mba ngur lamen zenden yemen yô, ikyekyeutya i usu, i anyinya a usu lu kpelan i yô,+ va nyôr hen atô ve gagher, pav ve, maa Eliya kôndo ken uraahumbe+ yem sha.*
12 Elisha lu kenger, yilan genger genger kaan ér: “Terem, terem! Ikyekyeutya i Iserael man mbahendananyinya a na!”+ Kera nengen a na ga yô, a kôr akondo a na, a ande ker avegher ahar.+
13 Tsô a tôô ikyondo i profeti+ Eliya, i i osough i gba la a hide a yem, a za tile hen kpe u Yordan.
14 Maa a tôô ikyondo i profeti Eliya, i i osough i gba la a gbidye sha mnger, a kaa ér: “Yehova, Aôndo u Eliya ngu hana?” Gbidyen ikyondo la sha mnger yô, ma pav yem ken imese man ken iyan, maa Elisha per.+
15 Ônov mba uprofeti mba ken Yeriko mbara mba nengen a na ken ica yô, ve kaa ér: “Jijingi u Eliya ngu sha Elisha.”+ Nahan ve za kohol un, ve gure sha ishigh nagh, ve wa ityough inya.
16 Ve kaa a na ér: “Nomso mba taver iyol 50 mba heen vea mbatomov ou. Wea lumun yô, de ve za ve za ker orvesen wou. Alaghga jijingi u* Yehova tôô un za kende sha ma uwo, shin hen pev ugen.”+ Kpa a kaa ér: “De tindin nen ve ga.”
17 Nahan kpa, ve za un iyol gbem a va hee, maa a kaa ér: “Tindi nen ve.” Nahan ve tindi nomso mba 50 mbara, ve za ker un zan zan ayange atar, kpa ve zua a na ga.
18 Shighe u ve hide hen a na la, lu ken Yeriko.+ Nahan a kaa a ve ér: “Yange m kaa a ven mer de ze nen ga kpa?”
19 Shighe kar yô, nomso mba ken gar la kaa a Elisha ér: “Orvesen wase u nenge yô, gar ne ngu hen ijiir i injaa;+ kpa mngerem gema doo ga, shi inya kpa doo iyiav ga.”*
20 Nahan a kaa ér: “Haa nen bar shin gbande u cuku u he, va nam nen.” Tsô ve va a mi, ve va na un.
21 Maa a za hen imbormnger la a za haa bar shimi,+ a kaa ér: “Ka kwagh u Yehova a kaa ne, ér, ‘M wanger mngerem man. Ma a kera na ior vea kpe ga, shin kasev vea lu ikyom kpaa ga.’”*
22 Nahan i wanger mngerem mara zan zan nyian, vough er Elisha kaa nahan.
23 A mough heela a kôndo a yem hen Betel. Er lu yemen sha gbenda la, mbayevnomso mbagen due ken gar, gba lahan un+ kaan ér: “Kôndo yem sha, we orkpuluntyough ne! Kôndo yem sha, we orkpuluntyough ne!”
24 Ken masejime yô, a gema a kenger ve, maa a wa ve ifyan ken iti i Yehova. Nahan ungô mba biya uhar,+ due ken ikyô va ande mbayev mbara 42 caver caver.+
25 A mough heela, a yem zan zan a za nyôr hen Uwo u Karmel,+ maa a mough her a hide ken Samaria.
Ngeren mba shin kpe
^ Shin “kwavaôndo.”
^ Alaghga mkaanem ma “ônov mba uprofeti” la, ma ôron kwagh u makeranta u tesen uprofeti shin mzough u uprofeti.
^ Shin “avegher ahar.”
^ Shin “sha kwavaôndo.”
^ Shin “ahumbe a.”
^ Shin a fatyô u kaan ér, “inya la na kasev mba dughun iyav.”
^ Shin a fatyô u kaan ér, “kasev vea dugh iyav ga.”
