Utor u sha Uhar 24:1-20
24 Sha ayange a Yehoyakim la, Nebukadinesar+ tor u Babilon va ta ityav sha a na, nahan Yehoyakim hingir u eren un tom anyom atar. Kpa Yehoyakim va hemba un ato.
2 Maa Yehova gba tindin ikwe i mbayanishar i Mbakaldi+ man Mbashiria man Mbamoabi, kua Mbaamon ér ve za ta num sha a na. A za hemen u tindin ve ér ve za ta num sha Yuda ve tim un, vough er Yehova ôr+ sha ikyev i mbatomov nav uprofeti nahan.
3 Sha mimi yô, lu Yehova na zwa ve kwagh ne er Mbayuda sha u i kar a ve sha ishigh nagh kera ye,+ sha ci u asorabo a Manase er la cii,+
4 man sha ci u awambe a ishôôgh a a haa inya la,+ gadia yange iv Yerusalem a awambe a ishôôgh, nahan Yehova kera soo u den kwaghbo la ga.+
5 Akaa agen ken yiase i Yehoyakim cii, akaa a a er la cii, i nger ken takeda u yiase i sha ayange a utor mba Yuda la.+
6 Tsô Yehoyakim kpe, i ii un vea uter nav;+ maa wan na Yehoyakin kar tema tor sha ityough nagh.
7 Mayange tor u Igipiti kera due ken tar na kera ga, sha ci u tor u Babilon ngohol akaa a tor u Igipiti cii,+ hii hen Uwagh u Igipiti,+ kôndo za nyôr hen Ifi u Uferati.+
8 Yehoyakin+ lu anyom 18 shighe u hingir tor la, a hemen iwer itiar ken Yerusalem.+ I yilan ngô na ér Nehusheta, un lu wan u Elnatan, kwase u ken Yerusalem.
9 A za hemen u eren kwaghbo sha ishigh ki Yehova, vough er ter na er la cii.
10 Hen shighe la, mbatomov mba Nebukadinesar tor u Babilon kôndo va ta ityav sha Yerusalem, maa i kase gar la i wa un atô.+
11 Nebukadinesar tor u Babilon va ken gar la, shighe u mbatomov nav kase gar shon wa un atô la.
12 Yehoyakin tor u Yuda due za hen tor u Babilon,+ vea ngô na man mbatomov nav man mbahemenev nav, kua mbavesen mba eren tom hen ya u tor;+ maa tor u Babilon kôr un yem a na uikyangen ken inyom i sha anigheni i tema tor la.+
13 Tsô a kura akaainjaa a ken iyou i Yehova man akaainjaa a ken ya u tor la cii,+ a due a mi her kera. A hembe ikyav mbi sha zanaria mbi Solomon tor u Iserael er ken tempel u Yehova la+ cii avur avur. Kwagh ne er vough er Yehova tsengaôron nahan.
14 A kura ior mba ken Yerusalem cii a yem a ve uikyangen, mbahemenev cii,+ man mbautyaav mba ageev cii, man hanma orfantomaveegh man hanma orvareniwa,*+ a kura iorov 10,000 a yem a ve uikyangen. I undu or môm ken tar la ga, saa ior mba hemban gban ican la tseegh.+
15 Nahan a kôr Yehoyakin+ a yem a na uikyangen ken Babilon;+ shi a yem a ngô u tor man kasev mba tor, man mbavesen mba eren tom hen ya u tor, man uityaghermbaiorov mba ken tar la; a kura ve ken Yerusalem, a yem a ve uikyangen ken Babilon.
16 Tor u Babilon shi kura mbautyaav cii 7,000, kua mbafantomaveegh man mbavareniwa* 1,000 yem a ve uikyangen ken Babilon; ve cii ve lu nomso mba ageev mba i tsaase ve u nôngon ityav yô.
17 Tor u Babilon ver Matania, anmgbian u ter u Yehoyakin+ tor sha ityough ki Yehoyakin, maa a gema Matania iti hingir Sedekia.+
18 Sedekia lu anyom 21 shighe u hingir tor la, a hemen anyom 11 ken Yerusalem. I yilan ngô na ér Hamutal,+ lu wan u Yeremia, u hen Libena.
19 A za hemen u eren kwaghbo sha ishigh ki Yehova, vough er Yehoyakim er la cii.+
20 Lu sha ci u ishima vihi Yehova ve akaa ne er ken Yerusalem man ken Yuda, zan zan a kar a ve sha ishigh nagh kera ye.+ Tsô Sedekia va hemba tor u Babilon ato.+
