Utor u sha Uhar 8:1-29
8 Tsô Elisha kaa a kwase u yange nder wan na la ér:+ “Mough vea ya wou, yem za lu shir hanma ijiir i u fetyô u zan cii, sha ci u Yehova kaa ér ijen ia gba,+ man ijen ne ia gba ken tar ne anyom ataankarahar.”
2 Nahan kwase la mough er kwagh u or u Aôndo u mimi kaa la. A yem vea ya na, a za lu ken tar u Mbafiliti+ anyom ataankarahar.
3 Anyom ataankarahar nga been yô, kwase la mough ken tar u Mbafiliti hide va zamber a tor ér, ma i ne un ya na man inya na.
4 Hen shighe ne, tor lam a Gehashi, wanye u or u Aôndo u mimi la kaa ér: “Wea lumun yô, ôrom akaa a vesen a Elisha a er la cii.”+
5 Ngur ôron tor er Elisha yange nder or shin ku yô,+ kwase u yange i nder wan na la va nyôr hen tor, gba zamber ér ma i ne un ya na man inya na.+ Fese je Gehashi kaa ér: “Terem tor, ka kwase shon je ne, shi ka wan na u yange Elisha nder je ne.”
6 Tsô tor pine kwase la kwagh u za hemen la, maa kwase la ôr un kwagh shon. Nahan tor tindi orgen u eren tom hen ya u tor ér a za vea kwase la, a kaa a or shon ér: “Hide a hanma kwagh u kwase la cii, kua iyiav mbi ken sule na cii na un, hii sha iyange i undu tar ne la zan zan hegen.”
7 Shighe u Ben-hada+ tor u Shiria gba angev la, Elisha va ken Damaseku.+ Nahan i va kaa a Ben-hada ér: “Or u Aôndo u mimi+ va heen.”
8 Tor maa kaa a Hasael+ ér: “Tôô iyua za nenge a or u Aôndo u mimi la.+ Pine Yehova kwagh sha ikyev na, wer, ‘Me war angev mbu m gbe ne jee?’”
9 Hasael maa tôô iyua za u za nengen a na, a tôô hanma kwagh u dedoo u ken Damaseku cii, a kange ikyav mbin sha urakumi 40. A va tile sha ishigh nagh a kaa ér: “Wanye wou Ben-hada, tor u Shiria tindim hen a we ér m va pine u mer, ‘Me war angev mbu m gbe ne jee?’”
10 Elisha gema kaa a na ér: “Za ôr un wer, ‘U war mbu kpee je,’ kpa Yehova tesem ér una kpe kpee je.”+
11 Nahan a bon ashe sha a na zan zan a va hee. Maa or u Aôndo u mimi la gba vaan.
12 Hasael kende pine ér: “Terem, ka nyi u vaana?” A gema a kaa ér: “Ka sha ci u m fa kwaghbo u u va a mi sha ior i Iserael yô.+ U nande ajiir a ve, a i maa ugir mba taver la sha usu, shi u wua nomso vev mba ageev sha sanker, shi u ande mbayev vev avur avur, shi u ande igbor i kasev vev mba uyaav.”+
13 Tsô Hasael pine ér: “A er nan ve wanye wou u a gbe kwagh ga er iwa nahan ne, una er imbakwagh la?” Kpa Elisha kaa ér: “Yehova tesem ér u va tema tor sha Shiria.”+
14 Maa a undu Elisha, a cin a hide hen ter na, nahan a pine un ér: “Ka nyi Elisha a ôr u we?” A gema a kaa ér: “A kaam ér angev ou mbua bee kpee je.”+
15 Kpa kpernan yô, Hasael tôô ikyondo mir shin mnger gema cir un sha ishi zan zan a kpe.+ Maa Hasael kar tema tor sha ityough nagh.+
16 Ken inyom i sha utaan i Yehoram+ wan u Ahaba lu tor u Iserael la, Yehoram+ wan u Yehoshafati tema tor sha Yuda, er Yehoshafati lu tor her la.
17 Yange lu anyom 32 shighe u hingir tor la, a hemen ken Yerusalem anyom anigheni.
18 A zende sha gbenda u ator a Iserael,+ vough er mba hen ya u Ahaba er nahan,+ sha ci u vôso wan u Ahaba,+ shi za hemen u eren kwaghbo sha ishigh ki Yehova.+
19 Kpa Yehova soo u van a mtim sha Yuda ga, sha ci u wanye na Davidi,+ gadia yange tôndo zwa a na ér una na un imenger,+ un kua ônov nav mba nomso gbem.
20 Sha ayange a na la, Edom hemba Yuda ato,+ ver tor na.+
21 Tsô Yehoram per za ken Sair a akekeautya a na cii, maa a za mough tugh a hemba Mbaedom mba ve kase un la ityav, kua ukurmbautyaav mba akekeautya la; nahan mbautyaav mbara yevese yem ken utenti vev.
22 Kpa Edom za hemen u hemban Yuda ato zan zan nyian. Libena+ kpa hemba ato hen shighe la.
23 Akaa agen ken yiase i Yehoram cii, hanma kwagh u er cii, i nger ken takeda u yiase i sha ayange a ator a Yuda la.
24 Nahan Yehoram kpe, i ii un vea uter nav ken Gar u Davidi.+ Maa wan na Ahashia+ kar tema tor sha ityough nagh.
25 Ken inyom i sha 12 i Yehoram wan u Ahaba tema tor sha Iserael la, Ahashia wan u Yehoram, tor u Yuda hingir tor.+
26 Ahashia lu anyom 22 shighe u tema tor la, a hemen ken Yerusalem inyom i môm. I yilan ngô na ér Atalia,+ un lu wan u wan u Omeri+ tor u Iserael.
27 Ahashia zende sha gbenda u ya u Ahaba,+ shi a za hemen u eren kwaghbo sha ishigh ki Yehova er ya u Ahaba nahan, sha ci u a due igba hen ya u Ahaba.+
28 Nahan a za vea Yehoram wan u Ahaba u za nôngon ityav a Hasael tor u Shiria hen Ramoti-gileadi,+ kpa Mbashiria vihi Yehoram iyol.+
29 Nahan Tor Yehoram hide yem ken Yesereel,+ sha er avav a Mbashiria gber un hen Rama, shighe u lu nôngon ityav a Hasael tor u Shiria+ la a bee yô. Ahashia wan u Yehoram tor u Yuda sen za shin Yesereel u za nengen a Yehoram wan u Ahaba, sha ci u iyol i a vihi la.*
Ngeren mba shin kpe
^ Shin “doo un iyol ga.”
