Utor u sha Uhar 4:1-44
4 Hen shighe ne, môm ken kasev mba ônov mba uprofeti+ gba va vaan a Elisha kaan ér: “Wanye wou nomom kpe, man u fa er yange wanye wou cian Yehova yô.+ Nahan hegen orgen u se lu un a injô yô, va ér una va kôr ônov av mba uhar cii ikpan.”
2 Elisha maa pine un ér: “M er nyi sha ci wouwe? Ôrom, ka nyi u lu a mi ken iyou?” A gema a kaa ér: “Wanyekwase wou ngu a kwagh môm ken iyou ga, saa di ityegh ki mkure tseegh.”+
3 Maa a kaa ér: “Due za sôn mbawanndor a we cii mkam, i lu mkam ma ma lu a kwagh shimi ga yô. De sônon mkam cuku tseegh tsô ga.
4 Nahan nyôr ken iyou, we vea ônov ou mba nomso, wuhe nen hunda. Haa mkurem shin mkam mara i iv, gema mkam ma ma iv la ver kposo.”
5 Tsô a kar hen a na sha.
Kwase la nyer ken iyou vea ônov nav, wuhu hunda yô, ve na un mkam mara, a gba haan mkurem shimi.+
6 Mkam mara ma ivin yô, kwase la kaa a môm ken ônov nav ér: “Vam a ikyagh kigen.”+ Kpa a kaa a na ér: “Mkam kera ma ga.” Tsô mkurem mara de u haan.+
7 Nahan a va nyôr, a ôr or u Aôndo u mimi la, maa or u Aôndo u mimi la kaa ér: “Yem za tee mkurem mara, kimbi anzô a ou, maa we man mbayev ou kure nen mbamgbe enev a kwagh u a mase shin la.”
8 Iyange igen yô, Elisha za ken Shunem,+ ape kwase ugen u duen iti lu yô. Kwase la zamber a na ér a ya kwagh her.+ Nahan hanma kwa una karen gbenda yô, a kar her a ya kwagh.
9 Tsô a kaa a nom na ér: “M fa, ka icighanor u Aôndo; ka a kar gbenda heen hanma shighe.
10 Wea lumun yô, de se er iyou i cuku sha,+ se ver gambe man tebul man ikyônough kua daarimenger ker. Nahan hanma kwa una va hen a vese yô, a tsa ker.”+
11 Iyange igen yô, a va her, maa a yem sha iyou i sha la, u za yaven.
12 A kaa a wanye na Gehashi+ ér: “Yilam Kwaseshunam+ la.” Tsô a yila kwase la va tile sha ishigh nagh.
13 Nahan a kaa a Gehashi ér: “Wea lumun yô, ôr kwase la wer, ‘Nenge, u ya ican ne cii sha ci wase.+ Nahan ka nyi u soo wer i er sha ci wouwe?+ M lam a tor+ shin kurutya sha ci wouwee?’” Kpa a gema a kaa ér: “Ei, m ngu a zayol ga, sha ci u m ngu hen atô u ior av.”
14 Tsô a pine ér: “Nahan ka nyi a er sha ci naa?” Gehashi gema kaa ér: “Ngu a wan ga,+ shi nom na bee iyol.”
15 Fese je a kaa ér: “Yila un.” Nahan a yila kwase la va, va tile sha hunda.
16 Elisha maa kaa ér: “Inyom i sha, hen shighe ne, u lu a wannomso.”+ Kpa kwase la kaa ér: “Ei, orvesen wam, or u Aôndo u mimi! De tsughun wanyekwase wou ga.”
17 Nahan kpa, kwase la wa iyav, ka ker inyom igen hen shighe shon yô, a mar wannomso vough er Elisha kaa un nahan.
18 Wan la vese, iyange igen yô, due za hen ter na ape lu vea mbasundav la.
19 Tsô a gba vaan a ter na kaan ér: “Ityough ki nanden moo, ityough ki nanden mo!” Nahan ter na kaa a ortom ugen ér: “Yem a na za na ngô na.”
20 Tsô a yem a na, a za na ngô na, maa a tema ngô na sha ikyum zan zan ka va ker iyange sha tembe yô, a kpe.+
21 Nahan kwase la unde za gbir un sha gambe u or u Aôndo u mimi la,+ wuhe hunda yem.
22 Kwase la maa yila nom na kaa a na ér: “Wea lumun yô, tindi môm ken mbatomov ou, nana va a môm ken ujaki mbara, m za hen or u Aôndo u mimi la kpase man me hide.”
23 Kpa a pine ér: “Er nan u soo u za nengen a na nyiana? Ka uwer u he ga,+ shin iyange i memen kpaa ga.” Nahan kpa kwase la kaa ér: “Kwagh môm za iyol ga.”
24 Tsô a kange shidi* sha jaki la, a kaa a ortom na ér: “Zaan sha ayem. De panden ayem ga, saa me kaa mer er nahan.”
25 Nahan a za hen or u Aôndo u mimi la, sha Uwo u Karmel. Or u Aôndo u mimi la, nengen a kwase la ken ica yô, fese je a kaa a wanye na Gehashi ér: “Nenge! Kwaseshunam la ngula van la.
26 Wea lumun yô, yevese za kohol un, pine un wer, ‘U ngu dedoo kpa? Nomou ngu nena? Wan wou kpa ngu dedoo ga?’” A gema a kaa ér: “Kwagh môm er ga.”
27 Va nyer hen or u Aôndo u mimi la sha uwo yô, fese je a gba un ave shin angahar.+ Maa Gehashi kporom ikyua ér una daa un kera, kpa or u Aôndo u mimi la kaa ér: “De un, gadia ishima vihi un tsung, kpa Yehova yerem kwagh shon, a ôrom ga.”
28 Kwase la maa kaa ér: “Yange m sôn terem wana? Yange m kaa mer, ‘De nem ishimaveren i gbilinigh ga kpa’?”+
29 Fese je Elisha kaa a Gehashi ér: “Fiir ikyondo you hen iwenge,+ tôô gbough agh kôr ken uwe, za. Wea zua a or yô, de sughun nan ga; shi aluer or sugh u yô, de lumun ga. Za, za ver gbough agh sha ishigh ki wan la.”
30 Nahan ngô u wan la kaa ér: “Mimi je, er Yehova a lu u uma ne, man er we iyol you kpa, u lu uma ne, me undu u ga.”+ Tsô a mough a yem vea na.
31 Gehashi vande za nyôron a ve, maa a ver gbough ku shon sha ishigh ki wan la, kpa iôôn lu ga, shi tenger kpaa ga.+ A hide a yem a za kohol Elisha a kaa a na ér: “Wan la nder ga.”
32 Shighe u Elisha va nyôr ken iyou la, wan la yav sha gambe na kpenegh.+
33 A nyôr ken iyou la, a wuhe hunda, lu ve uhar tseegh ve lu ker ye, maa a gba eren msen hen Yehova.+
34 Nahan a unde sha gambe, a yav sha wan la, a penda zwa na sha zwa u wan la, man ashe a na sha ashe a wan la, kua akevaveegh a na sha akevaveegh a wan la, nahan a samber sha a na, maa iyol i wan la hii u tseen.+
35 A zende ken iyou la a yem ken hemen, a hide ken ijime; maa shi a unde sha gambe, a samber sha wan la. Tsô wan la yesem kwa taankaruhar, maa bugh ashe.+
36 Elisha maa yila Gehashi kaa a na ér: “Yila Kwaseshunam la a va.” Tsô a yila kwase la nyôr va hen Elisha. Maa Elisha kaa a na ér: “Tôô ase wan wou.”+
37 Nahan kwase la nyôr, za gba hen angahar a Elisha, gure sha ishigh nagh, maa tôô wan na due.
38 Shighe u Elisha hide yem ken Gilgal la, ijen gba ken tar la.+ Ônov mba uprofeti+ tema sha ishigh nagh, maa a kaa a wanye na+ ér: “Penda tsua u vesen sha atse, jiidi ônov mba uprofeti iue.”
39 Nahan môm ken a ve za ken toho za zôr ikyaiue, shi nenge a kon u wain u ken toho, maa zôr atam a u haa ken ikyondo na poo. A hide a mi, a va tser a haa shin tsua-iue la, kpa a fa kwagh shon ga.
40 Maa ve va na ior mbara ér ve ya, mba nguren yan yô, fese je ve ngor, ve kaa ér: “Or u Aôndo u mimi, ku ngu shin tsua la.” Nahan ve fatyô u yan ga.
41 Tsô a kaa ér: “Vam a mwem.” Nahan a haa ma shin tsua la a kaa ér: “Na ior ve ya.” Maa kwaghbo kera lu shin tsua la ga.+
42 Orgen mough ken Baalshalisha,+ va or u Aôndo u mimi a ikpenberedi i barli 20;+ i er beredi ne sha iyiagh ki i hii sundan yô, shi va un a ibya i samuyia u he.+ Tsô Elisha kaa ér: “Na ior ve ya.”
43 Nahan kpa, wanye na kaa ér: “Me fatyô u nan iorov 100 kwaghyan nee?”+ Tsô a gema a kaa ér: “Na ior ve ya, gadia ka kwagh u Yehova a kaa ne, ér, ‘Vea ya je una neer.’”+
44 Nahan a na ve, ve ya je neer her,+ vough er Yehova kaa nahan.
Ngeren mba shin kpe
^ Ka kwagh u pendan zendenya sha igyundu teman sha mi.
