Utor u sha Uhar 17:1-41
17 Ken inyom i sha 12 i Ahashi lu tor u Yuda la, Hoshea+ wan u Ela tema tor sha Iserael ken Samaria; a hemen anyom ataankaranyiin.
2 Lu eren kwaghbo sha ishigh ki Yehova, kpa kwaghbo na la vihi kuma sha kwaghbo u utor mba Iserael, mba ve vande lun a na la ga.
3 Tsô Shalmaneser tor u Ashiria kôndo va ta ityav sha a na,+ maa Hoshea hingir orshiren un, gba tan un kpandegh.+
4 Nahan kpa, tor u Ashiria va kav ér, Hoshea zua zwa sha a na, sha ci u a tindi mbaôron-loho hen So tor u Igipiti,+ shi a kera ta tor u Ashiria kpandegh, er eren ken anyom a karen la nahan ga. Sha nahan yô, tor u Ashiria kange un wuhe ken purusu.
5 Tor u Ashiria kura shoja na, va nyôr a mi ken tar la cii; a va ken Samaria a va kase un a wa atô anyom atar.
6 Ken inyom i sha utaankarunyiin i Hoshea la, tor u Ashiria ngohol Samaria.+ Maa a kura ior i Iserael a yem a mi uikyangen+ ken Ashiria, a za ver ve ve lu ken Hala man ken Habor, hen ifi u Gosan+ kua ken agar a Mbamede.+
7 Kwagh ne er sha ci u ior i Iserael er Yehova Aôndo ve isholibo, un u yange due a ve ken tar u Igipiti, shighe u ve lu sha ikyev i Farou tor u Igipiti la.+ Ve lu civir* mbaaôndo mbagen.+
8 Ve lu dondon aeren a akuraior a Yehova zenda a sha ishigh ki Mbaiserael kera la, shi ve lu dondon aeren a utor mba Iserael yange ve va a mi la.
9 Mbaiserael lu eren akaa a a lu sha ishima i Yehova Aôndo ve ga yô. Ve za hemen u maan ajiir a taven ken agar a ve cii,+ hii hen iyoukura zan zan nyôr hen gar u lun a gir u taver.*
10 Ve lu timin mtôm ma akombom ma sha awen man mtôm ma akombom ma sha ikyon,*+ sha hanma igyungu i taven man shin hanma itinekon u lun gese gese+ sha ci ve;
11 shi ve nande iniav, mnyim ma due sha ajiir a taven la cii, vough er akuraior a Yehova kura a yem a mi uikyangen sha ishigh vev la nahan.+ Ve za hemen u eren akaabo, vihin Yehova ishima.
12 Ve za hemen u civir ieev mbi ndôhôrshima,*+ mbi Yehova yange kaa a ve ér: “De eren nen kwagh ne ga!” la.+
13 Yehova lu tan Iserael man Yuda icin sha ikyev i uprofeti nav cii, man sha ikyev i hanma ornengenmpase cii,+ kaan ér: “Undu nen igbenda yen i ifer la!+ Kuran nen atindi a am man akaawan a am, a ken tindi u yange m wa uter enev la cii, man a m tindi ne a mi sha ikyev i uprofeti mba ve lu mbatomov av la.”
14 Kpa ve ungwa ga, ve lu taver ityough* her, er uter vev mba ve na Yehova Aôndo ve jighjigh ga la nahan.+
15 Ve lu vendan akaawan a na man ikyur i ya+ a uter vev la, kua akaa a a umbur ve u tan ve icin la,+ shi ve za hemen u dondon mbaaôndo mba gbilinigh,+ nahan ve ayol a ve kpa, ve hingir agbilinaior;+ ve lu kaven akuraior a a kase ve la cii, a Yehova kaa a ve ér ve de kaven a ga la.+
16 Ve zer undun atindi a Yehova Aôndo ve cii, shi ve er ieev mbi iyôôgh* mbi ônov mba ibuav uhar+ man ityôgh ki akombough ki sha kon,*+ shi ve gure akum a sha cii inya,+ shi ve civir Baal.+
17 Shi ve er ônov vev mba nomso man mba kasev kar ken usu;+ ve lu kpehen ishor+ shi keren u fan akaa a ken hemen, shi ve lu nan* ayol a ve u eren kwaghbo sha ishigh ki Yehova, vihin un ishima.
18 Tsô ishima vihi Yehova a Iserael tsung, nahan a kar a ve kera.+ A de or môm shi ken tar la ga, lu ipyaven u Yuda tseegh.
19 Yuda je kpa lu kuran atindi a Yehova Aôndo ve ga;+ ve kpa ve lu dondon aeren a Iserael dondo la.+
20 Yehova venda ônov mba Iserael cii, shi hee ve shi na ve sha ikyev i mbayanishar, zan zan a kar a ve sha ishigh nagh kera.
21 A ande Iserael hen ya u Davidi kera, nahan ve ver Yeroboam wan u Nebati tor.+ Kpa Yeroboam na Iserael de u dondon Yehova, a na ve er isholibo i vesen.
22 Shi ior i Iserael za hemen u zenden ken asorabo a Yeroboam er la cii.+ Ve undu a ga,
23 zan zan Yehova kar a Iserael sha ishigh nagh kera, vough er yange ôr sha ikyev i uprofeti mba ve lu mbatomov nav cii la nahan.+ Nahan i kura Iserael i yem a ve uikyangen ken tar u Ashiria,+ ape ve lu zan zan nyian la.
24 Tor u Ashiria maa mough a ior ken Babilon man Kuta man Ava man Hamati kua ken Sefarvaim,+ za ver ve hen agar a Samaria sha ityough ki Mbaiserael; ve ngohol Samaria ve lu ken agar a na.
25 Ve lu cian* Yehova shighe u ve za lu ker hiihii la ga. Nahan Yehova tindi ubegha hen atô ve,+ ve wua ior vev mbagen.
26 Tsô i za kaa a tor u Ashiria ér: “Akuraior a u kura a u yem a mi uikyangen, u za ver a ken agar a Samaria la, fa gbenda u civir Aôndo u tar la ga. Nahan ngu tindin ubegha hen atô ve, mba va wuan ve, sha ci u mô ve môm fa gbenda u civir Aôndo u tar la ga.”
27 Tsô tor u Ashiria kaa ér: “Kaa môm ken upristi mba ne kura ve ker, ne yem a mi uikyangen la, nana hide nana yem her, nana za tesen ve gbenda u civir Aôndo u tar la.”
28 Nahan môm ken upristi mba ve kura ve ken Samaria ve yem a mi uikyangen la, cin hide va lu ken Betel,+ gba tesen ve er vea cian* Yehova yô.+
29 Nahan kpa, akuraior kposo kposo er aôndo ve,* ver ken ayou a civir mbaaôndo a sha ajiir a taven a Mbasamaria maa la; akuraior kposo kposo er nahan, ken agar a ve lu ker la.
30 Nahan ior i Babilon er aôndo u Sukoti-benoti, ior i Kuta er aôndo u Nergal, ior i Hamati+ di er aôndo u Ashima,
31 Mbaava di er aôndo u Nibahashi man aôndo u Tartaki. Mbasefarvaim ve nande ônov vev mba nomso ken usu sha ci u Adrameleki man Anameleki, mbaaôndo mba Sefarvaim.+
32 Er ve cian Yehova nahan kpa, ve tsua upristi ken ishamior ve ver sha ajiir a taven, nahan ve lu eren ve tom ken ayou a civir mbaaôndo, a sha ajiir a taven la.+
33 Sha nahan yô, ve lu cian Yehova, kpa ve gema ve lu civir mbaaôndo vev, vough er akuraior a ken ityar i yange i za kura ve ker i va a mi la,+ civir mbaaôndo* nahan.
34 Mba civir mbaaôndo vev mba ve vanden civir la zan zan nyian.* Mô ve môm nan ngu civir* Yehova ga, shi mô ve môm nan ngu dondon akaawan a na, shin eren sha ajiraôron a na, shin kuran Tindi, shin dondon atindiakaa a Yehova yange na ônov mba Yakob, un u gema un iti hingir Iserael la ga.+
35 Shighe u Yehova ya ikyur a ve la,+ a kaa a ve ér: “De cie nen mbaaôndo mbagen ga, shi de gur nen ve inya ga, shin eren ve tom, gayô naan ve nagh kpaa ga.+
36 Kpa ka Yehova, un u yange tese agee a vesen shi naregh uwegh nagh ku ageegh,+ due a ven ken tar u Igipiti la, i gbe u ne cia ye,+ shi ka un i gbe u ne gure un inya, shi ka un i gbe u ne na un nagh kpaa ye.
37 Shi akaawan man ajiraôron man Tindi kua atindiakaa a a nger sha ci wen la,+ gba u ne dondon a zulee hanma shighe, shi ne cian mbaaôndo mbagen ga.
38 De hungur nen ikyur i yange m ya a ven la ga,+ shi de cie nen mbaaôndo mbagen ga.
39 Kpa ka Yehova Aôndo wen i gbe u ne cia ye, gadia ka un una yima ne sha ikyev i mbahyomov enev cii ye.”
40 Kpa ve ungwa ga, ve yem civir mbaaôndo vev mba ve vanden civir la.*+
41 Nahan akuraior ne hingir u cian Yehova,+ kpa ve lu civir ieev vev mbi ve gba la her. Ônov vev man ônov mba ônov vev cii, er kwagh er uter vev er nahan vough, zan zan nyian.
Ngeren mba shin kpe
^ Zwa Heberu, “cian.”
^ Ka hanma ijiir cii, a lu ijiir i ior ve lu kpishi ga, shin ve lu kpishi kpaa.
^ Nenge Ngeren u Pasen Asember, “Ityôgh ki akombough ki sha kon.”
^ Alaghga ishember i ken zwa Heberu i i gem nahan ne zua vea ishember i “ambi a uile,” u tesen ér kwagh la ndôhôr ishima.
^ Zwa Heberu, “nômbon mon ve.”
^ Shin “ieev mbi keren a ker.”
^ Nenge Ngeren u Pasen Asember.
^ Zwa Heberu, “teen.”
^ Shin “civir.”
^ Shin “civir.”
^ Shin “mbaaôndo vev.”
^ Shin “dondon aeren a kwaghaôndo.”
^ Zwa Heberu, “cian.”
^ Shin “mba dondon aeren a kwaghaôndo ve.”
^ Shin “ve yem dondon aeren a kwaghaôndo ve.”
