Utor u sha Uhar 14:1-29
14 Ken inyom i sha uhar i Yehoashi+ wan u Yehoahashi lu tor u Iserael la, Amashia wan u Yehoashi tor u Yuda tema tor.
2 Lu anyom 25 shighe u tema tor la, a hemen ken Yerusalem anyom 29. I yilan ngô na ér Yehoadin, lu kwase u ken Yerusalem.+
3 A za hemen u eren kwagh u vough sha ishigh ki Yehova, kpa lu er ter na u tamen Davidi+ nahan ga. Yange er hanma kwagh vough er ter na Yehoashi er nahan.+
4 Nahan kpa, i bee a ajiir a taven la ga,+ shi ior lu nan iniav shi ve lu nanden iniav, mnyim lu duen sha ajiir a taven la her.+
5 Yange tartor na ngu va taver yô, fese je a wua mbatomov nav mba ve wua ter na u lu tor la.+
6 Kpa a wua ônov mba mbawuanior mbara ga, sha u zuan sha tindi u Yehova u i nger ken takeda u Tindi u Mose la, ér: “I de wuan uter sha ci u ônov vev ga, shi i de wuan ônov sha ci u uter vev ga; kpa i wua hanma or sha ci u isholibo i nan” la.+
7 A wua Mbaedom+ shin Pev u Bar+ iorov 10,000, shi nôngo ityav ngohol Sela,+ maa i gema yilan un ér Yoketeel zan zan nyian.
8 Tsô Amashia tindi mbaôron-loho hen Yehoashi wan u Yehoahashi, wan u Yehu tor u Iserael, a kaa ér: “Va se nôngo ityav.”*+
9 Yehoashi tor u Iserael tindi loho ne hen Amashia tor u Yuda ér: “Asagher u ken Lebanon tindi loho hen sedar u ken Lebanon ér, ‘Na wan wam, wan wou u kwase a vôso.’ Nahan kpa, inyamkyume i ken Lebanon kar ndyar asagher la angahar.
10 U hemba Edom ityav+ ka mimi, nahan kpa vanger a de u hagher we. Lu a icivir you, tema hen ya wou.* Er nan u soo u van a kwaghbo sha iyol you wer u gba, shi u na Yuda a gba vea we imôngo?”
11 Kpa Amashia ungwa ga.+
Nahan Yehoashi tor u Iserael kôndo za, un vea Amashia tor u Yuda, ve za nôngo ityav ayol a ve hen Bete-shemeshi+ u Yuda.+
12 Iserael hemba Yuda ityav, nahan hanma or yevese yem hen ya* u nan.
13 Yehoashi tor u Iserael kôr Amashia wan u Yehoashi wan u Ahashia tor u Yuda hen Bete-shemeshi. Maa ve va ken Yerusalem, a va hembe kpekpe u Yerusalem, hii hen Hunda u Eferaim+ zan zan nyôr hen Hunda u hen Zongo,+ kuma aseva 400.*
14 A kura zanaria man azurufa cii man akaa a a lu ken iyou i Yehova man akaa a a lu ken ayou a koson akaainjaa hen ya u tor la cii, shi a kôr ior a yem a mi uikyangen. Maa a hide a yem ken Samaria.
15 Akaa agen ken yiase i Yehoashi cii, kwagh u er man tahav nav, man er nôngo ityav a Amashia tor u Yuda la, i nger ken takeda u yiase i sha ayange a ator a Iserael la.
16 Maa Yehoashi kpe, i ii un vea uter nav ken Samaria+ vea ator a Iserael; nahan wan na Yeroboam*+ kar tema tor sha ityough nagh.
17 Yehoashi+ wan u Yehoahashi tor u Iserael+ kpen kera yô, Amashia+ wan u Yehoashi tor u Yuda hide tsa anyom 15.
18 Akaa agen ken yiase i Amashia cii, i nger ken takeda u yiase i sha ayange a ator a Yuda la.
19 Shighe kar yô, i zua zwa sha a na+ ken Yerusalem, nahan a yevese a yem ken Lakishi, kpa ve tindi ior za ken Lakishi za wua un ker.
20 Nahan ve tôô un shin ikyekyeutya ve hide a na, ve va ii un ken Yerusalem vea uter nav ken Gar u Davidi.+
21 Maa ior i Yuda cii ver Asaria*+ tor sha ityough ki ter na Amashia.+ Asaria lu anyom 16+ hen shighe ne.
22 Tor* kpen, mba iin un vea uter nav kera yô,+ Asaria hide maa Elati,+ hide a mi na Yuda.
23 Ken inyom i sha 15 i Amashia wan u Yehoashi lu tor u Yuda la, Yeroboam+ wan u Yehoashi tor u Iserael tema tor ken Samaria, a hemen anyom 41.
24 Lu eren kwaghbo sha ishigh ki Yehova. A undu asorabo a Yeroboam wan u Nebati na Iserael er la cii ga.+
25 A hide a ikighirtar i Iserael a na un, hii hen Lebo-hamati*+ zan zan nyôr hen Zegemnger u Araba,*+ vough er Yehova Aôndo u Iserael ôr sha ikyev i ortom na Yona+ wan u Amitai, profeti u ken Gati-hefer+ la nahan.
26 Gadia Yehova nenge a ican i vihin tsung i Iserael lu yan la.+ Or môm shi her u wasen Iserael ga, or u nan lu a orwasen nan ga shin or u i yen nan iyol tsô kpaa ga.
27 Kpa Yehova tôndo zwa ér una kough iti i Iserael sha won kera ga.+ Nahan a yima ve sha ikyev i Yeroboam wan u Yehoashi.+
28 Akaa agen ken yiase i Yeroboam, hanma kwagh u er man ityom na i ageegh cii, kua er nôngo ityav hide a Damaseku+ man Hamati+ na Yuda ken Iserael la, i nger ken takeda u yiase i sha ayange a ator a Iserael la.
29 Yeroboam maa kpe, i ii un vea uter nav, vea ator a Iserael; nahan wan na Sekaria+ kar tema tor sha ityough nagh.
Ngeren mba shin kpe
^ Shin “se zua ishigh a ishigh.”
^ Shin “ya u tor.”
^ Zwa Heberu, “tenti.”
^ Nôngo u kuman umita 178 (angahar 584). Nenge Ngeren u Seer u B14 la.
^ Ka Yeroboam u sha Uhar je la.
^ Inja na yô ér, “Yehova Wa̱se.” I yila un ér Ushia ken 2Ut 15:13; 2Kr 26:1-23; Yes 6:1; kua Sek 14:5.
^ Ka ter na Amashia je la.
^ Ka Zegemnger u Bar, shin Zegemnger u Kuugh je la.
^ Shin “hunda u Hamati.”
