Utor u sha Uhar 20:1-21
20 Sha ayange la, Hesekia gba angev je lu nôngon ku.+ Tsô profeti Yesaia wan u Amoshi va va kaa a na ér, “Ka kwagh u Yehova a ôr je ne, ér: ‘Ôr mba hen ya wou akaa a vea er yô, sha ci u u kpe; u mough angev mbun ga.’”+
2 Tsô a gema ishigh a na ken kpekpe, a gba eren msen hen Yehova kaan ér:
3 “M zamber we Yehova, wea lumun yô, umbur er m zende sha ishigh you sha mimi man a ishima i môm, shi m er kwagh u dedoo sha ishigh you yô.”+ Maa Hesekia gba vaan tsung.
4 Yesaia due lu a za nyôr hen tembe u hen atô la ga je maa, Yehova ôr kwagh a na, kaa ér:+
5 “Hide za ôr a Hesekia, orhemen u ior av wer, ‘Ka kwagh u Yehova, Aôndo u Davidi teru u tamen a ôr je ne, ér: “M ungwa msen wou. M nenge a mliam ou.+ Nenge, m ngu been we angev.+ Sha iyange i sha utar yô, u kôndo u za sha iyou i Yehova.+
6 Me seer we anyom 15 sha ayange a uma wou, shi me yima u kua gar ne sha ikyev i tor u Ashiria,+ shi me kura gar ne sha ci wam man sha ci u ortom wam Davidi.”’”+
7 Yesaia maa kaa ér: “Va a ijen i atam a tur a uman a i kam yô.” Nahan ve va a mi, ve va shighe sha ityundu la, maa tegh tegh tsô angev bee un.+
8 Tsô Hesekia pine Yesaia ér: “Ka ikyav i nyi+ i lu u tesen ér Yehova una beem angev, shi sha iyange i sha utar yô, me kôndo me za sha iyou i Yehova?”
9 Yesaia gema kaa ér: “Ka ikyav i Yehova i tesen we ér Yehova una er kwagh u a kaa la je ne: U soo wer mure u a gbe sha angahar a unden* la, a yem ken hemen angahar pue shin a hide ken ijime angahar pue?”+
10 Hesekia kaa ér: “Ka kwagh u taver ga u mure a gba a yem ken hemen angahar pue, kpa u a hide ken ijime angahar pue yô, taver.”
11 Tsô profeti Yesaia yila Yehova genger genger, maa Aôndo er mure u gba sha angahar a unden a Ahashi la, hide ken ijime angahar pue, shin er mure la vande gban sha angahar la, kar yem ken hemen nahan kpaa.+
12 Hen shighe la, Berodaki-baladan wan u Baladan u lu tor u Babilon la, tindi Hesekia a uwashika man iyua, sha ci u a ungwa ér Hesekia gba angev.+
13 Hesekia maa ngohol ve* shi tese ve iyou na i koson akaainjaa ker cii;+ a tese ve azurufa man zanaria man mkurem ma balsam man mkurem ma injaam magen, man iyou na i koson ikyav mbi utyaav man hanma kwagh u lu ken ayou a na a koson akaainjaa cii. Hesekia tese ve hanma kwagh u hen ya na,* man ken tartor na cii, kwagh u tese ve ga yô, lu ga.
14 Tsô profeti Yesaia nyôr va pine Tor Hesekia ér: “Ka nyi ior mban ve ôr, man ka han ve mough ve ve?” Hesekia gema kaa ér: “Ka ken Babilon, ken tar u icaa la ve mough ve ye.”+
15 Shi a pine ér: “Ka nyi ve nenge a mi hen ya wouwe?”* Hesekia gema kaa ér: “Ve nenge a hanma kwagh u hen ya wam* cii. M tese ve hanma kwagh u a lu ken ayou a am a koson akaainjaa cii.”
16 Yesaia maa ôr a Hesekia ér: “Ungwa kwagh u Yehova a kaa ne, ér,+
17 ‘Nenge! Ayange nga van a a kura akaa a u koso hen ya wou* la cii, man akaa a uter ou ve koso zan zan nyian ne la cii, a yem a mi ken Babilon yô,+ kwagh môm una shi her ga,’ kape Yehova a kaa la.
18 ‘Shi a kura ônov ou mba nomso mbagen mba u va mar la a yem a ve,+ vea za hingir u eren tom ken ya u tor u Babilon.’”+
19 Nahan Hesekia kaa a Yesaia ér: “Mkaanem ma Yehova ma u ôr la doo.”+ Shi a kaa ér: “Aluer bem man mkpeyol* vea lu hen shighe u* m lu uma ne yô, a doo.”+
20 Akaa agen ken yiase i Hesekia cii, ityom na i ageegh cii, man er a er ityungumnger+ man gôngormnger nyôr a mngerem ken gar la,+ i nger ken takeda u yiase i sha ayange a utor mba Yuda la.
21 Tsô Hesekia kpe, i ii un vea uter nav;+ maa wan na Manase+ kar tema tor sha ityough nagh.+
