Utor u sha Uhar 25:1-30
25 Ken inyom i sha utaankarunyiin i Sedekia lu hemen la, ken uwer u sha pue, sha iyange i sha pue i uwer shon la, Nebukadinesar+ tor u Babilon va a ikyumutya na cii u va tan ityav sha Yerusalem.+ A haa afo u nôngon ityav a na, shi a maa kpekpe kase un ningir tser;+
2 i kase gar la ningir tser, zan zan inyom i sha 11 i Sedekia lu tor la.
3 Ken uwer u sha unyiin, sha iyange i sha utaankarunyiin i uwer shon la, ijen gba ken gar la je gande.+ Kwaghyan kera lu u ior mba ken tar la vea ya ga.+
4 Tsô Mbakaldi pev kpekpe u gar la nyôr,+ maa ushoja mbara cii yevese tugh due ken gar kera, sha hunda u hen atô u ukpekpe mba uhar mba ve lu ikyua a sule u tor, er Mbakaldi lu kasen gar shon la; tor Sedekia gema yem sha gbenda u Araba la.+
5 Kpa ikyumutya i Mbakaldi zenda tor za kôr un ken taaikyôngo u Yeriko, maa mbautyaav nav cii yevese undu un.
6 Tsô ve kôr tor+ ve va a na hen tor u Babilon hen Ribela, ve va ôr un ijir.
7 Ve sôngo ônov mba Sedekia mba nomso sha ashe a na; maa Nebukadinesar pir Sedekia ashe, kange un sha mshirim ma togula, hide a na ken Babilon.+
8 Ken uwer u sha utaan, sha iyange i sha utaankaruhar i uwer shon la, ka ken inyom i sha 19 i Tor Nebukadinesar lu tor u Babilon je la, Nebusaradan+ orhemen u mbakuran, u lu ortom u tor u Babilon la, va ken Yerusalem.+
9 A nande iyou i Yehova+ man ya u tor,+ kua ayou a ken Yerusalem cii;+ shi a nande ya u hanma or u duen iti cii.+
10 Shi ikyumutya i Mbakaldi i i lu vea orvesen u mbakuran la cii, yôhôr ukpekpe mba ve kase Yerusalem la.+
11 Maa Nebusaradan orvesen u mbakuran la, kura ior mba ve mase shin ken gar la yem a ve uikyangen, kua ior mba ve yevese ve za kohol tor u Babilon la, man ior mba ve mase shin la cii.+
12 Kpa orvesen u mbakuran la, undu ior mbagen mba hemban gban ican ken tar la her, ér ve nengen sha ikyon i wain, shi i kighir ve ve lu eren tom.+
13 Shi Mbakaldi hembe mtôm ma sha togula+ ma ken iyou i Yehova la avur avur, kua akaa a tôôn ikyav+ man Zegegbangi u Mnger u sha togula,+ mba ve lu ken iyou i Yehova la, maa ve kura togula la ve yem a mi ken Babilon.+
14 Shi ve kura akaa a haan mtwem shimi man ushebul man akaa a pirin usu a mi man ukôôpu man ikyav mbi sha togula mbi i eren tom u tempel a mi la cii.
15 Orvesen u mbakuran la, kura agbande a usu man agbande a i er a sha zanaria u wang+ man azurufa la.+
16 Hide mtôm ma mhar mara man Zegegbangi u Mnger la, kua akaa a tôôn ikyav a Solomon er sha ci u iyou i Yehova la yô, togula u akaa ne cii yuhwa gande u karen.+
17 Hanma ityôgh yô, tav kuma aseva* 18,+ shi hanma ityôgh lu a ityegh ki i er sha togula yô; ityegh i môm tav kuma aseva atar; kper man upomegraneti lu sha ityegh ki shon ningir tser, i er ve cii sha togula.+ Ityôgh ki sha uhar kira a kper u i er sha mi la, lu er kigenegh kira nahan.
18 Shi orvesen u mbakuran la kôr Seraia+ pristi u tamen, man Sefania+ pristi u sha uhar la, kua mbakuranhunda iorov utar yem a mi.+
19 Shi a kôr orvesen ugen u eren tom hen ya u tor, u nengen sha ushoja ken gar la yô a yem a mi, man azende a tor a kôôsôô ataan a i zua a ve ken gar shon la, kua akawe u kurutya u ikyumutya, un u tsuan ior mba ken tar la ér ve lu mbautyaav la, man nomso 60 ken ishamior mba i zua a ve ken gar la.
20 Nebusaradan+ orvesen u mbakuran la kôr ve va a mi hen tor u Babilon hen Ribela.+
21 Tor u Babilon maa wua ve hen Ribela ken tar u Hamati.+ Kape i mough a Yuda hen tar na i yem a na uikyangen la.+
22 Tsô Nebukadinesar tor u Babilon tsua Gedalia+ wan u Ahikam,+ wan u Shafan+ ver ér a nengen sha ior mba undu ken tar u Yuda la.+
23 Ukurmbautyaav cii man ior vev, mba ongo ér tor u Babilon tsua Gedalia ver ér a nengen sha ior yô, fese je, ve va hen Gedalia hen Misepa. Ve yô, lu Ishemael wan u Netania, man Yohanan wan u Karea, man Seraia wan u Tanhumeti Ornetofa, kua Yaasania wan u Ormaakati, vea ior vev imôngo.+
24 Nahan Gedalia bum a ve man ior vev, kaa a ve ér: “De cie nen u lun mbatomov mba Mbakaldi ga. Lu nen ken tar ne, eren nen tor u Babilon tom, nahan kwagh a za a ven a doo.”+
25 Ken uwer u sha utaankaruhar la, Ishemael+ wan u Netania wan u Elishama, u lu ken tsombor u tor* la, va vea ior mbagen pue, ve va wua Gedalia vea Mbayuda man Mbakaldi mba ve lu vea na ken Misepa la.+
26 Shighe kar yô, ior cii, hii sha mbakiriki zan zan nyôr sha mbavesen, kua ukurmbautyaav ve mough ve yem ken Igipiti,+ sha ci u ve lu cian Mbakaldi.+
27 Ken inyom i sha 37 i Yehoyakin+ tor u Yuda lu uikyangen la, ken uwer u sha 12, sha iyange i sha 27 i uwer shon, ken inyom i Evil-merodaki tor u Babilon tema tor la, a dugh* Yehoyakin, tor u Yuda ken purusu kera.+
28 A lam a na kundu kundu shi a kende a ikyônough nagh ki torough sha, hemba mkônom ma torom ma utor mbagenev mba ve lu vea na ken Babilon la.
29 Tsô Yehoyakin er akondo a na a purusu la kera, shi lu yan kwaghyan sha ishigh nagh hanma shighe, sha ayange a uma na cii.
30 I naan un kwaghyan u tor kaa ér i naan un la ayange ayange, sha ayange a uma na cii.
Ngeren mba shin kpe
^ Ishiva i môm yange i lu usentimita 44.5. Nenge Ngeren u Seer u B14 la.
^ Zwa Heberu, “vor u tor.”
^ Zwa Heberu, “a kende a ityough ki.”
