Utor u sha Uhar 22:1-20
22 Yoshia+ lu anyom anigheni shighe u hingir tor la, a hemen anyom 31 ken Yerusalem.+ I yilan ngô na ér Yedida, lu wan u Adia, kwase u ken Bosekati.+
2 A er kwagh u vough sha ishigh ki Yehova, a zende sha igbenda i ter na u tamen Davidi cii,+ a goom a yem ken iyan shin ken imese ga.
3 Ken inyom i sha 18 i Yoshia tema tor la, tor tindi akawe Shafan, wan u Asalia wan u Meshulam hen iyou i Yehova+ kaa ér:
4 “Kôndo za hen zegepristi Hilkia,+ za ôr un a kohol inyaregh ki i lu van a mi ken iyou i Yehova,+ ki mbakuran hunda ve ngohol hen ior la cii.+
5 Ôr ve ve gema ki ve na ior mba i tsough ve ve lu nengen sha tom u ken iyou i Yehova la, ve di ve gema ki ve na mba ve lu eren tom ken iyou i Yehova, ve mba ve lu sôron iyou i i vihi* la,+
6 ka mbafantomaveegh man mbamaankwagh kua mbamaan kwagh a awen je la; nahan ve tôô ki ve yam ikyon man awen a kuan, ve sôr iyou la.+
7 Kpa i de kaan a ve ér ve gba ceke sha inyaregh ki i ne ve la ga, sha ci u i na ve jighjigh.”+
8 Shighe kar yô, zegepristi Hilkia kaa a akawe Shafan ér:+ “M zua a takeda u Tindi+ ken iyou i Yehova.” Hilkia maa gema takeda la na Shafan gba ôron.+
9 Tsô akawe Shafan za hen tor za kaa a na ér: “Mbatomov ou dugh inyaregh ki ken iyou la, ve gema ki ve wa sha ikyev i ior mba i tsough ve ér ve nengen sha tom u ken iyou i Yehova la.”+
10 Shi akawe Shafan kaa a tor ér: “Takeda ugen ngu+ u pristi Hilkia a nem yô.” Shafan maa gba ôron u sha ishigh ki tor.
11 Tor ongo akaaôron a ken takeda u Tindi la yô, fese je a ande akondo a na.+
12 Tsô tor kaa a pristi Hilkia man Ahikam+ wan u Shafan, man Akebor wan u Mikaia, man akawe Shafan, kua Asaia ortom u tor ér:
13 “Za nen, za pine nen Yehova kwagh sha kwagh u akaa a i ôr ken takeda u i zough a mi ne sha ci wam, man sha ci u ior kua sha ci u Yuda cii; gadia ishima vihi Yehova a vese pev,+ sha ci u uter asev ungwa akaa a i ôr ken takeda ne, sha u eren akaa a i nger ker sha kwagh wase la cii ga.”
14 Tsô pristi Hilkia man Ahikam man Akebor man Shafan kua Asaia, za hen profeti u kwase Hulda.+ Un lu kwase u Shalum wan u Tikiva, wan u Harhashi. Shalum lu or u nengen sha akondo. Hulda lu hen Vegher u He u gar u Yerusalem; lu her ve za lam a na ye.+
15 A kaa a ve ér: “Ka kwagh u Yehova Aôndo u Iserael a kaa ne ér, ‘Za kaa nen or u a tindi ne hen a mo la ner:
16 “Ka kwagh u Yehova a kaa ne ér, ‘Me va a kwaghtseren sha ijiir ne man sha ior mba ve tem her la, me er akaa a i nger ken takeda u tor u Yuda a ôr la cii.+
17 Er ve undum, ve yem ve lu za nanden mbaaôndo mbagen iniav, mnyim ma lu duen+ sha u vea vihim ishima sha tom u ave a ve cii yô,+ ishimavihin yam ia yegh sha ijiir ne je, or a fatyô u pirin i ga.’”+
18 Kpa tor u Yuda u a tindi ne ér ne va pine Yehova kwagh la yô, ka kwagh u ne ôr a na je ne, ner, “Ka kwagh u Yehova Aôndo u Iserael a kaa ne, ér: ‘Sha kwagh u akaa a u ongo la yô,
19 er u ongo akaa a m kaa mer me va a mi sha ijiir ne, man ior mba ve tem ker, mba m kaa mer ifyan ia kôr ve shi kwagh ve a kpiligh ior iyol la, nahan u vaa afanyô* shi u hidi a iyol you ijime+ sha ishigh ki Yehova shi u ande akondo a ou,+ u vaa sha ishigh yagh yô, mo kpa m ungwa u, kape Yehova a kaa la.
20 Ka nahan ve me yem a we u za kohol uter ou mba tsev* ye; a ii u ken uwar wou bem bem, nahan ashe a ou aa nenge a kwaghtseren u me va a mi sha ijiir ne cii la ga.’”’” Tsô ve hide ve va ôr tor nahan.
