Utor u sha Uhar 10:1-36
10 Hen shighe ne, Ahaba+ lu a ônov mba nomso 70 ken Samaria. Tsô Yehu nger uwashika tindi a mi ken Samaria, hen mbahemenev mba Yesereel man mbatamen+ kua mbanengen sha ônov mba Ahaba,* a kaa ér:
2 “Ne mba vea ônov mba ter wen, shi ne mba a akekeautya man anyinya man gar u i wa un gir u taver yô, kua ikyav mbi utyaav. Nahan washika ne una nyôron a ven yô,
3 tsua nen wan môm ken ônov mba ter wen u nan hembe doon inja shi nan hembe eren kwagh sha mimi yô, ver nen nan sha ikyônough ki torough ki ter u nan. Nahan nôngo nen kwagh sha ci u ya u ter wen.”
4 Kpa cier ve iyol, ve kaa ér: “Nenge! Aluer ator ahar fatyô u tilen sha ishigh nagh ga yô,+ ka se se fatyô u tilen yee?”
5 Tsô ornengen sha ya u tor, man gomna u gar la man mbatamen kua mbanengen sha ônov mbara, tindi loho hen Yehu, kaa ér: “Se mba mbayev ou, nahan se er hanma kwagh u u kaa wer se er cii. Se ver or môm tor ga. Er hanma kwagh u u nenge i doo u cii.”
6 Nahan a nger ve washika u sha uhar, a kaa ér: “Aluer ne mba ken vegher wam shi ne kegh iyol u ungwan imo yam yô, va nen a mtom ma ônov mba ter wen hen a mo kper, hen shighe ne ken Yesereel.”
Hen shighe ne, ônov mba tor mba 70 mbara lu vea ashagbaaior a ken gar, a a lu yesen ve la.
7 Washika la nyer a ve yô, fese je ve kôr ônov mba tor mbara ve sôngo, lu nomso 70,+ maa ve wa mtom vem shin akese, ve tindi ma hen a na ken Yesereel.
8 Mbaôron-loho nyôr va ôr a na ér: “Ve va a mtom ma ônov mba tor mbara.” Nahan a kaa ér: “Penda ma atihi ahar hen hundagar zan zan sev mbu av.”
9 Tsô a due pepe, a za tile sha ishigh ki ior cii, a kaa ér: “Ne mba a ibo ga.* Ka mo yange m zua zwa sha terem m wua un ye,+ kpa mban cii, ka an nan woo ve?
10 Fa nen nahan ner, kwaghôron u Yehova môm u Yehova a ôr sha ya u Ahaba una bunde ga,*+ shi Yehova er kwagh u yange ôr sha ikyev i ortom na Eliya la.”+
11 Heela tseegh ga, Yehu wua mba ve mase shin hen ya u Ahaba ken Yesereel cii, kua ashagbaaior a na cii, man azende a na, kua upristi nav,+ zan zan undu or môm uma ga.+
12 Maa a mough a gba yemen ken Samaria. Iyou i mbakuranilev tôndon* iyôngo aive ker yô, lu sha gbenda shon.
13 Yehu za zua a anmgbianev mba Ahashia+ tor u Yuda her, maa a pine ve ér: “Ne mba unô?” Ve gema ve kaa ér: “Se mba anmgbianev mba Ahashia. Se mba senen zan sha u se za pine se fa aluer ônov mba tor man ônov mba torkwase* mba dedoo yô.”
14 Fese je a kaa ér: “Kôr ve uma!” Nahan ve kôr ve uma ve za sôngo ve hen ijôr i i lu hen iyou i tôndon iyôngo aive la, lu nomso 42. A de mô ve môm uma ga.+
15 Er mough her lu yemen la, a za zua a Yehonadabi+ wan u Rekabi+ u lu van u va kohol un la. Yehonadabi sughun un* yô, a pine un ér: “Ishima you ngi a mo vindi vindi,* er ishima yam i lu a ishima you nahan kpa?”
Yehonadabi gema kaa ér: “Een, ngi a we.”
“Aluer ka nahan yô, nam uwegh.”
Tsô a na un uwegh, maa Yehu urugh un nyôr a na shin ikyekyeutya, kohol un shimi.
16 Maa a kaa ér: “Va vea mo va nenge er me lumun mer i hendan kwagh a Yehova ga yô.”*+ Tsô Yehu tôô un shin ikyekyeutya na yem vea na.
17 A va ken Samaria, a va wua mba ve mase shin hen ya u Ahaba ken Samaria la cii, zan zan a tim ve cii,+ vough er Yehova yange ôr a Eliya nahan.+
18 Heela tseegh ga, Yehu kohol ior cii imôngo, maa a kaa a ve ér: “Ahaba yange civir Baal cuku tseegh tsô,+ kpa Yehu una civir un a hemba nahan ica je.
19 Nahan yila nen uprofeti mba Baal cii,+ man mbacivir un cii kua upristi nav cii,+ ve va hen a mo. Or ve môm nana de bundu ga, sha ci u m ngu a zege nagh ku nan Baal. Aluer or bunde yô, a wua nan.” Kpa Yehu lu eren kwagh sha ayom, sha u una tim mbacivir Baal yô.
20 Yehu shi kaa ér: “Yôô* nen icighanmkohol u vesen sha ci u Baal.” Tsô ve yôô mkohol shon.
21 Yehu maa tindi a loho ken Iserael cii, nahan mbacivir Baal cii va. Or ve môm u nan va ga yô, nan lu ga. Ve nyôr ken iyou i* Baal,+ nahan iyou i Baal iv poo, hii vegher ne za nyôr vegher la.
22 Tsô a kaa a or u nengen sha iyou i koson akondo la ér: “Due a akondo va na mbacivir Baal cii.” Nahan a due a akondo a va na ve.
23 Maa Yehu man Yehonadabi+ wan u Rekabi nyôr ken iyou i Baal la. Nahan a kaa a mbacivir Baal ér: “Ker nen vighe vighe nenge nen aluer mbacivir Yehova mba heen ga, ka mbacivir Baal tseegh yô.”
24 Ken masejime yô, ve nyôr u nan iniav shi nanden iniav. Yehu vande veren ior nav 80 ken won, kaa a ve ér: “Aluer ma or ken ior mba m lu wan ve sha ikyev yen ne, nan yevese nan war yô, me wua or u nan de nan ér nana yevese nana war la.”
25 Mba ne iniav mbi nanden mba been yô, fese je Yehu kaa a mbakuran* man mbautyaav mba vesen ér: “Nyôr za wua nen ve! Mô ve môm nana de yevese waren ga!”+ Nahan mbakuran man mbautyaav mba vesen mbara wua ve sha sanker haa ken won; ve yem zan zan ve nyôr ken atôatô u ijiir i* ken iyou i Baal la.
26 Maa ve due a mtôm ma akombom ma awenem+ ma ken iyou i Baal la, ve va nande ma cii.+
27 Ve hembe mtôm ma akombom ma awenem+ ma Baal mara, shi ve hembe iyou i Baal,+ ve gema i hingir ahungwa akôngo, maa ka nahan zan zan nyian.
28 Kape Yehu bee a kwagh u Baal ken Iserael je la.
29 Nahan kpa, Yehu gema ijime a asorabo a Yeroboam wan u Nebati na Iserael er sha kwagh u ônov mba ibuav mba sha zanaria, mba ve lu ken Betel man ken Dan la ga.+
30 Nahan Yehova kaa a Yehu ér: “Er u er kwagh u dedoo man u vough sha ashe a am, u er hanma kwagh u yange m wa ishima u eren a ya u Ahaba la cii yô,+ ônov ou ikyov inyiin vea tema sha ikyônough ki torough ki Iserael.”+
31 Kpa Yehu ver ishima zende sha Tindi u Yehova Aôndo u Iserael, a ishima na cii ga.+ A gema ijime a asorabo a Yeroboam na Iserael er la ga.+
32 Sha ayange la, Yehova hii u panden haregh u Iserael kure kure. Hasael za hemen u tan ityav sha a ve hen haregh u Iserael cii,+
33 hii hen Yordan vegher u sha ityoughkitaregh la, tar u Gileadi cii, ape Mbagadi man Mbaruben man Mbamanase lu la.+ Kwagh ne wa haregh u a hii hen Aroer, ikyua a Pev u Arnon,* a yem zan zan a nyer Gileadi man Bashan la kpa ker.+
34 Akaa agen ken yiase i Yehu cii, akaa a a er cii, kua ityom na i ageegh cii, i nger ken takeda u yiase i sha ayange a ator a Iserael la.
35 Maa Yehu kpe, i ii un vea uter nav, ken Samaria; nahan wan na Yehoahashi+ kar tema tor sha ityough nagh.
36 Shighe u* Yehu hemen Iserael ken Samaria yô, lu anyom 28.
Ngeren mba shin kpe
^ Zwa Heberu, “mbanengen sha Ahaba.”
^ Shin “ne mba perapera.”
^ Zwa Heberu, “una gba inya ga.”
^ Zwa Heberu, “kangen.” A shi nan kpa lu ijiir i i kangen iyôngo sha er a tôndo i aive yô.
^ Ka torkwase Yesebel, ngô u Tor Yehoram je la.
^ Shin “veren un doo doo.”
^ Zwa Heberu, “ishima you ngi a mo jighilii.”
^ Shin “er me tese gbashima sha kwagh u Aôndo yô.”
^ Zwa Heberu, “tsegha.”
^ Shin “tempel u.”
^ Zwa Heberu, “mbayevese.”
^ Zwa Heberu, “gar,” alaghga ka zegeimaagh ki taver iyol.
^ Shin “Uwagh u Arnon.”
^ Zwa Heberu, “Ayange a.”
