Utor u sha Uhar 16:1-20
16 Ken inyom i sha 17 i Peka wan u Remalia la, Ahashi+ wan u Yotam tor u Yuda hingir tor.
2 Ahashi lu anyom 20 shighe u tema tor la, a hemen ken Yerusalem anyom 16. A er kwagh u dedoo sha ishigh ki Yehova Aôndo na, er ter na u tamen Davidi er nahan ga.+
3 Kpa a gema a zende sha gbenda u ator a Iserael,+ shi a er wan na u nomso kar ken usu je kpaa.+ Lu dondon aeren a ndôhôrshima a akuraior+ a Yehova zenda a sha ishigh ki Mbaiserael kera la.
4 Lu nan iniav shi nanden iniav, mnyim duen sha ajiir a taven,+ man sha agungu man shin hanma itinekon u lun gese gese.+
5 Lu hen shighe ne, Reshin tor u Shiria man Peka wan u Remalia tor u Iserael, kôndo va u va nôngon ityav a Yerusalem ye.+ Ve kase Ahashi ve wa un atô, kpa ve fatyô u ngohol gar la ga.
6 Hen shighe la, Reshin tor u Shiria ngohol Elati+ hide na Edom. Been yô, a zenda Mbayuda* ken Elati ve due kera. Maa Mbaedom kar nyôr ken Elati, mba her zan zan nyian.
7 Tsô Ahashi tindi mbaôron-loho hen Tigelati-pileser+ tor u Ashiria kaa ér: “M ngu ortom wou man wan wou. Kôndo va yimam sha ikyev i tor u Shiria man sha ikyev i tor u Iserael, mba ve lu tan num sha a mo la.”
8 Nahan Ahashi tôô azurufa man zanaria u i zua a mi ken iyou i Yehova, kua ken ayou a koson akaainjaa hen ya u tor la, tindi a mi hen tor u Ashiria sha u yamen un.+
9 Tor u Ashiria maa er kwagh u kaa la; tor u Ashiria kôndo za hen Damaseku za ngohol un shi kura ior mba ker yem a mi uikyangen ken Kir,+ shi a wua Reshin.+
10 Tsô Tor Ahashi za u za nengen a Tigelati-pileser tor u Ashiria hen Damaseku. Tor Ahashi nengen a atse a nan nagh a ken Damaseku la yô, a tindi pristi Uriya a foto u atse shon, u i kpela i tese er a lu, man gbenda u i er a la.+
11 Nahan pristi Uriya+ maa atse a nan nagh,+ vough er tor Ahashi tese ken Damaseku ér, i er la nahan. Pristi Uriya maa a bee cii ve, Tor Ahashi mough ken Damaseku hide ye.
12 Tor hidi ken Damaseku va nengen a atse shon yô, a kporom a za hen atse shon, a za na iniav sha mi.+
13 A za hemen u nan iniav nav mbi nanden man iniav nav mbi sha samuyia, mnyim duen sha atse la; shi a haa iniav nav mbi kwaghman shi a mishi awambe a iniav nav mbi bem sha mi.
14 Nahan a tôô atse a nan nagh a sha togula,+ a a lu sha ishigh ki Yehova, ape i ver a sha ishigh ki iyou la, hen atô u atse a na man iyou i Yehova la kera, a za ver a hen atse a na, vegher u ken imbusutarimese la.
15 Tor Ahashi maa kaa a pristi Uriya+ ér: “Er iniav mbi nanden mbi pepe la, mbi due mnyim sha atse a vesen la,+ kua nagh ku sha samuyia ku aikighe,+ man nagh ku nanden ku tor, man nagh nagh ku sha samuyia, kua iniav mbi nanden man iniav mbi sha samuyia man iniav mbi kwaghman mbi ior cii. Shi mishi awambe a iniav mbi nanden cii man awambe a iniav mbigenev cii sha mi. Kpa atse a sha togula la yô, de m nenge kwagh u me er a a yô.”
16 Nahan pristi Uriya er hanma kwagh u Tor Ahashi kaa un cii.+
17 Heela tseegh ga, Tor Ahashi num akaa a tôôn ikyav a mi la,+ shi pav ikpande i a, i ken ambusu la avur avur, shi dugh ugbangi mba ve lu sha a la kpa kera,+ shi a tôô Zegegbangi u Mnger u i penda sha anomabua a sha togula+ a a sue un la kera, a za ver hen tembe u awen.+
18 A tôô haav mbu i er ikyua a tempel sha ci u Iyange i Memen la kera, shi a cir gbenda u tor karen nyôron ken iyou i Yehova la. Yange er kwagh ne sha ci u tor u Ashiria.
19 Akaa agen ken yiase i Ahashi cii, kwagh u a er la, i nger ken takeda u yiase i sha ayange a ator a Yuda la.+
20 Tsô Ahashi kpe, i ii un vea uter nav ken Gar u Davidi; nahan wan na Hesekia*+ kar tema tor sha ityough nagh.
