Utor u sha Uhar 13:1-25
13 Ken inyom i sha 23 i Yehoashi+ wan u Ahashia+ lu tor u Yuda la, Yehoahashi wan u Yehu+ tema tor sha Iserael ken Samaria. A hemen anyom 17.
2 Lu eren kwaghbo sha ishigh ki Yehova, shi za hemen u eren isholibo i Yeroboam wan u Nebati na Iserael er la.+ A de i ga.
3 Nahan ishima vihi Yehova+ a Mbaiserael tsung,+ maa a na ve sha ikyev i Hasael+ tor u Shiria man sha ikyev i Ben-hada+ wan u Hasael, sha ayange a ve la cii.
4 Shighe kar yô, Yehoahashi zamber a Yehova ér a zungwe ve mhôônom,* maa Yehova kegh ato a na, gadia a nenge a ican i tor u Shiria va a mi sha Iserael la.+
5 Nahan Yehova na Iserael or u nana yima ve+ sha ikyev i Shiria yô. Mbaiserael maa hide lu ken uya vev, er yange ve vande lun nahan.*
6 (Nahan kpa, ve de u eren isholibo i ya u Yeroboam na Iserael er la ga.+ Ve za hemen u eren isholibo* ne, shi ityôgh ki akombough ki sha kon* la+ za hemen u lun ken Samaria her.)
7 Yehoahashi mase shin a mbautyaav mba hendan anyinya 50, man akekeautya 10, man ishoja i angahar iorov 10,000 tseegh, sha ci u tor u Shiria tim mbagen mbara kera,+ ndyar ve angahar er vuulevu u sha shighe u gbidyen iyiav nahan.+
8 Akaa agen ken yiase i Yehoahashi, hanma kwagh u er cii man tahav nav, i nger ken takeda u yiase i sha ayange a ator a Iserael la.
9 Maa Yehoahashi kpe i ii un vea uter nav, ve ii un ken Samaria;+ nahan wan na Yehoashi kar tema tor sha ityough nagh.
10 Ken inyom i sha 37 i Yehoashi lu tor u Yuda la, Yehoashi+ wan u Yehoahashi hingir tor u Iserael ken Samaria, a hemen anyom 16.
11 Un kpa za hemen u eren kwaghbo sha ishigh ki Yehova; a pav a asorabo a Yeroboam wan u Nebati yange na Iserael er la cii ga.+ A za hemen u eren asorabo* ne.
12 Akaa agen ken yiase i Yehoashi, hanma kwagh u er cii man tahav nav, kua er nôngo ityav a Amashia tor u Yuda la,+ i nger ken takeda u yiase i sha ayange a ator a Iserael la.
13 Maa Yehoashi kpe i ii un vea uter nav, nahan Yeroboam*+ kar tema sha ikyônough nagh ki torough. I ii Yehoashi ken Samaria vea ator a Iserael.+
14 Zum u Elisha+ gba angev mbu mbu va wua un ken masejime la, Yehoashi tor u Iserael sen va hen a na gba va vaan kaan ér: “Tereme, tereme! Ikyekyeutya i Iserael man mbahendananyinya a na!”+
15 Elisha maa kaa a na ér: “Tôô ada kua avaan.” Tsô a tôô ada kua avaan.
16 Nahan a kaa a tor u Iserael ér: “Penda uwegh ough sha ada.” Tsô a penda uwegh nagh sha ada, maa Elisha kpa ver ave a na sha ave a tor.
17 Tsô a kaa a na ér: “Bugh windou vegher u sha ityoughkitaregh la.” Nahan a bugh. Elisha kaa a na ér: “Ker!” Maa a ker. Nahan a kaa ér: “Ka ivaan i Yehova i mhembe,* ka ivaan i hemban Mbashiria ityav! U wua* Mbashiria hen Afeki+ zan zan u kar timin ve.”
18 Elisha shi kaa ér: “Tôô avaan,” nahan a tôô a. Maa a kaa a tor u Iserael ér: “Gbidye a hen inya.” Nahan a gbidye a hen inya kwa tar, maa a de.
19 Tsô ishima vihi or u Aôndo u mimi la a na, a kaa ér: “Ashen ma u gbidi avaan la hen inya kwa taan shin kwa ataratar! Nahan ma u hembe Mbashiria zan zan ma u kar timin ve been. Kpa hegen yô, u hemba Mbashiria kwa tar tseegh.”+
20 Shighe kar yô, Elisha kpe i ii un. Ikwe i yan ishar i Mbamoabi+ ve va ken tar la sha mhii u inyom.*
21 Er ior mbagen lu iin orkpen yô, ve nenge mbayanishar mbara lu van, maa fese je ve gema ikyom i orkpen la ve kende shin uwar u Elisha, ve yevese ve yem. Orkpen la benden a akuhe a Elisha yô, a nder+ a mough a tile sha angahar a na.
22 Hasael+ tor u Shiria yange er Mbaiserael ican+ sha ayange a Yehoahashi la cii.
23 Nahan kpa, kunya kôr Yehova a ve a zungwe ve mhôônom,+ shi a tese ve ikyo i wan sha ci u ikyur i ya vea Aberaham+ man Isaka+ man Yakob+ la. Yange soo u timin ve ga, shi a zenda ve sha ishigh nagh kera ga zan zan nyian.
24 Hasael tor u Shiria yange kpen yô, wan na Ben-hada kar tema tor sha ityough nagh.
25 Yehoashi wan u Yehoahashi hide ngohol agar a Hasael ter u Ben-hada yange nôngo ityav a ter na Yehoahashi ngohol la. Yehoashi yange nôngo ityav a Ben-hada kwa tar hemba un,+ nahan hide ngohol agar a Iserael la.
Ngeren mba shin kpe
^ Shin “er kwagh u ishima a gba Aôndo shimi yô.”
^ Ka ken bem man ken mkpeyol je la.
^ Zwa Heberu, “lu zenden ken i.”
^ Nenge Ngeren u Pasen Asember.
^ Zwa Heberu, “zenden ken asorabo.”
^ Ka Yeroboam u sha Uhar je la.
^ Shin “myom.”
^ Shin “hemba.”
^ Zwa Heberu, “shighe u i kôr ken inyom igen yo,” a shi nan kpa, lu sha shighe u fam.
