Utor u sha Uhar 11:1-21
11 Atalia+ ngô u Ahashia nengen er wan na a kpe yô,+ a mough a tim tsombortor la cii.*+
2 Nahan kpa, Yehosheba wan u Tor Yehoram u kwase, anngô u Ahashia, tôô Yehoashi+ wan u Ahashia; a ii un ken ônov mba tor mba lu u a wua ve la, za ver un vea yese na ken iyou i tsan i ken atô igen. Ve nôngo ve yer un, Atalia nenge a na ga, nahan i wua un ga.
3 A lu vea na anyom ataratar, a yer un ken iyou i Yehova. Hen shighe ne, Atalia lu hemen tar la.
4 Ken inyom i sha utaankaruhar la, Yehoyada tindi ér i za ôr mbahemen ior deri deri mba ve nengen sha Mbakariti mba ve eren tom u kuran la, kua mbakuran ya u tor la*+ ér ve va, nahan ve va hen a na hen iyou i Yehova. A ya ikyur a ve shi a kaa a ve ér ve bum hen iyou i Yehova ér, vea er sha ikyuryan ne, maa a tese ve wan u tor.+
5 A na ve wada ér: “Ka kwagh u ne er je ne: Pav nen ker ikwe itiar; kwe u môm u eren tom sha Iyange i Memen, u ver ishima zulee u kuran ya u tor,+
6 kwe ugen u lu hen hunda u i yilan ér Hunda u Ityôyoughough la, kwe ugen la di u lu hen hunda ken ijime i mbakuran ya u tor. Kuran nen ya la musan nen ker.
7 Iniongo yen i ihiar i i gbe u ia er tom sha Iyange i Memen ga la, i ver ishima zulee i kuran iyou i Yehova, sha er a kura tor yô.
8 Kase nen tor hanma vegher cii ningir tser nen, hanma or a ikyav mbi tswamev mbi nan ken uwe. Aluer or kar ape ushoja ve lu la nan yem ken hemen yô, i wua nan. Lu nen vea tor ape a lu zan cii.”*
9 Mbahemen ior deri deri+ er kwagh u pristi Yehoyada ôr la vough. Nahan hanma ve nan tôô ior mba nan mba ve yar tom sha Iyange i Memen la, kua ior mba ve yar tom sha Iyange i Memen ga la, ve va hen pristi Yehoyada.+
10 Pristi la maa na mbahemen ior deri deri awange man ipyerutya i gbilititi i Tor Davidi, i i lu ken iyou i Yehova la.
11 Tsô mbakuran ya u tor+ tile sha ajiir a ve, hanma ve a ikyav mbi tswamev mbi nan ken uwe, hii vegher u iyou la ken iyan, za nyôr vegher u iyou la ken imese, man hen atse a nan nagh la,+ kua hen iyou la ningir tor tser.
12 Nahan Yehoyada due a wan u tor,+ va cir un idyer i tor shi penda un Shiada+ sha ityo,* maa ve ver un tor shi ve shighe un mkurem. Tsô ve gba kuren ave, kaan ér: “Tor a lu uma gbem!”+
13 Atalia ongo iov i ior mba ve lu yevese la yô, fese je a va hen ior mba ve lu ken iyou i Yehova la.+
14 Maa a nenge tor tile her hen ityôgh kira, er i vanden eren nahan.+ Mbahemenev man mbatôngon ibusa+ lu vea tor, shi ior mba ken tar la cii lu ember tôngon ibusa. Atalia nengen kwagh ne yô, a ande akondo a na, a gba ôron genger genger ér: “I zua zwa sha a mo! I zua zwa sha a mo!”
15 Kpa pristi Yehoyada kaa a mbahemen ior deri deri,+ mba i tsua ve ve lu hemen ikyumutya la ér: “Due nen a na hen ior kera, shi aluer or dondo un ijime yô, wua nen nan sha sanker!” Gadia pristi kaa ér: “De woo un ken iyou i Yehova ga.”
16 Tsô ve kôr un, mba za nyer hen ijiir i anyinya nyôron hen ya u tor la yô,+ ve wua un her.
17 Yehoyada maa er tor man ior ya ikyur a Yehova ér,+ vea za hemen u lun ior mba Yehova, shi a er tor man ior ve ya ikyur.+
18 Mba been yô, ior mba ken tar la cii va hen iyou i* Baal, va hembe atse a na vindi vindi haa inya;+ ve hembe ieev nav avur avur,+ shi ve wua Matan, pristi u Baal+ sha ishigh ki atse la.
Maa pristi la tsua mbakuran ver ér ve nengen sha iyou i Yehova.+
19 Heela tseegh ga, a tôô mbahemen ior deri deri+ man Mbakariti mba eren tom u kuran man mbakuran ya u tor,+ kua ior mba ken tar la cii, ve mough hen iyou i Yehova ve ver tor gbenda ve sen, ve va kar hen hunda u mbakuran ya u tor, maa ve va nyôr hen ya u tor. Tsô a tema sha ikyônough ki torough ki utor.+
20 Nahan ior mba ken tar la cii ember, shi gar kpa huan ving, sha ci u i wua Atalia sha sanker hen ya u tor.
21 Yehoashi+ lu anyom ataankarahar shighe u tema tor la.+
