Utor u sha Uhar 1:1-18
-
Eliya tsengaôron ér Ahashi una kpe (1-18)
1 Ahaba kpen kera yô, Moabi+ hemba Iserael ato.
2 Lu hen shighe ne, Ahashia osough sha ian i i tera ikyon sha mi, sha kpoyou na u sha, ken Samaria sen va gba vihi iyol ye. Nahan a tindi mbaôron-loho a kaa a ve ér: “Za, za pine nen Baal-sebu, aôndo u Ekeron+ fa nen, aluer ka u iyol i m vihi ne, ia bee yô.”+
3 Kpa ortyom u Yehova kaa a Eliya*+ Ortishibi la ér: “Mough za kohol mbaôron-loho mba tor u Samaria, kaa a ve wer, ‘Ka sha ci u Aôndo ngu ken Iserael ga ve, ne lu zan u za pinen Baal-sebu aôndo u Ekeron kwagh yee?+
4 Sha nahan yô, ka kwagh u Yehova a kaa ne, ér: “U mough sha gambe u u yav sha mi la ga, sha ci u u kpe kpee a bunde ga.”’” Eliya maa mough za.
5 Mbaôron-loho mbara mba hidi hen a na yô, fese je a pine ve ér: “Er nan ne hidi?”
6 Ve gema ve kaa a na ér: “Orgen kôndo va kohol se, kaa a vese ér, ‘Hide yem nen hen tor u a tindi ne la, za kaa un nen ner, “Ka kwagh u Yehova a kaa ne, ér: ‘Ka sha ci u Aôndo ngu ken Iserael ga ve, u tindi wer i za pine Baal-sebu aôndo u Ekeron kwagh yee? Sha nahan yô, u mough sha gambe u u yav sha mi la ga, sha ci u u kpe kpee a bunde ga.’”’”+
7 Maa a pine ve ér: “Or u a va kohol ne, a ôr ne mkaanem man la ngu nena?”
8 Ve gema ve kaa a na ér: “Or la a hua riga u aive a inyam,+ a tsule kwange u ikyôv hen iwenge.”+ Fese je a kaa ér: “Ka Eliya Ortishibi.”
9 Tor maa tindi orhemen iorov 50 vea ior nav 50 hen a na. Shighe u or ne kôndo za hen Eliya la, Eliya tema sha ityough ki uwoogh. Nahan a kaa a na ér: “Or u Aôndo u mimi,+ tor kaa ér, ‘Hungwa shin inya.’”
10 Kpa Eliya kaa a orhemen iorov 50 la ér: “Aluer m ngu or u Aôndo yô, usu u sen sha+ u hia u, we man ior ou mba 50 mban.” Maa usu sen sha, hia un man ior nav mba 50 mbara.
11 Tsô tor shi tindi orhemen iorov 50 ugen, vea ior nav 50 hen a na. Nahan a za, a za kaa a na ér: “Or u Aôndo u mimi, ka kwagh u tor a kaa je ne, ér, ‘Hungwa shin inya fese.’”
12 Kpa Eliya gema kaa a ve ér: “Aluer m ngu or u Aôndo u mimi yô, usu u sen sha u hia u, we man ior ou mba 50 mban.” Maa usu u Aôndo sen sha, hia un man ior nav mba 50 mbara.
13 Nahan tor shi tindi orhemen iorov 50 u sha utar, vea ior nav 50. Kpa orhemen u iorov 50 u sha utar la, kôndo za gure anu inya sha ishigh ki Eliya, gba zamber ér a zungwe un mhôônom, kaan ér: “Or u Aôndo u mimi, wea lumun yô, de uma wam man uma u mbatomov ou mba 50 mban, ve gba kwagh sha ashe a ou.
14 Usu vande senen sha hian mbahemen iorov 50 mba uhar mbara, hanma ve a ior mba nan 50. Kpa hegen yô, de uma wam a gba kwagh sha ashe a ou.”
15 Maa ortyom u Yehova kaa a Eliya ér: “Sen za vea na. De cian un ga.” Tsô a mough a sen vea na, ve va hen tor.
16 Eliya maa kaa a tor ér, “Ka kwagh u Yehova a kaa je ne, ér: ‘U tindi mbaôron-loho wer ve za pine Baal-sebu, aôndo u Ekeron+ kwagh. Ka sha ci u Aôndo ngu ken Iserael gaa?+ Er nan u pin un kwagh ga? Sha nahan yô, u mough sha gambe u u yav sha mi ne ga, sha ci u u kpe kpee a bunde ga.’”
17 Tsô a kpe, er Yehova kaa a Eliya nahan; kpa er lu a wan u nomso ga yô, Yehoram*+ kar tema tor sha ityough nagh, ken inyom i sha uhar i Yehoram,+ wan u Yehoshafati tema tor sha Yuda la.
18 Akaa agen ken yiase i Ahashia+ cii, man kwagh u er la, i nger ken takeda u yiase i sha ayange a ator a Iserael la.
