Utor u sha Uhar 12:1-21
12 Ken inyom i sha utaankaruhar i Yehu+ la, Yehoashi+ tema tor; a hemen ken Yerusalem anyom 40. I yilan ngô na ér Shibia, un lu kwase u ken Bersheba.+
2 Yehoashi lu eren kwagh u vough sha ishigh ki Yehova, sha ayange a pristi Yehoyada lu wan un kwagh la cii.
3 Nahan kpa, i bee a ajiir a taven+ la ga, shi ior lu nan iniav shi ve lu nanden iniav, mnyim lu duen sha ajiir a taven la her.
4 Tsô Yehoashi kaa a upristi ér: “Tôô nen inyaregh ki i ve a mi hen iyou i Yehova sha ci u nan hanma icighannagh+ a mi la cii, ka inyaregh ki i gbe u hanma or nana ta kpandegh,+ man inyaregh ki i ngohol hen ior mba ve er iceghzwa, man inyaregh ki hanma or u ishima i mgbegha nan u van a mi hen iyou i Yehova cii je la.+
5 Upristi ve ngohol inyaregh kira ayol a ve hen mba ve ve a mi la,* ve er tom a mi u sôron iyou la, hanma ijiir i iyou shon i vihi cii.”*+
6 Ken inyom i sha 23 i Tor Yehoashi la je kpa, upristi lu a sôr ajiir a a vihi sha iyou la ga.+
7 Nahan Tor Yehoashi yila pristi Yehoyada+ man upristi mbagen kaa a ve ér: “Er nan ne lu sôron ajiir a a vihi sha iyou la ga? Sha nahan yô, de kera ngohol nen inyaregh hen ior mba ve lu van a ki la ga, saa aluer ne mba eren tom a mi u sôron iyou la di je.”+
8 Nahan upristi lumun ér vea kera ngohol inyaregh hen ior ga, shi vea kera lu uwegh sha tom u sôron iyou la kpaa ga.
9 Tsô pristi Yehoyada tôô akwati,+ pev ihura sha ityough nagh, za ver ken iyan hen atse a nan nagh, ape or nana nyôron ken iyou i Yehova ve nan kar la. Ka her upristi mba ve eren tom u kuran hunda la, haan inyaregh ki i vaan a mi hen iyou i Yehova cii ye.+
10 Hanma kwa u ve nenge ér i haa inyaregh kpishi ken akwati la yô, akawe u tor man zegepristi ve kôndo ve va kohol* inyaregh ki i ve a mi ken iyou i Yehova la, ve ôr.+
11 Maa ve na ior mba i tsough ve ér, ve nengen sha tom u i lu eren sha iyou i Yehova la inyaregh ki i ôr iyenge i ki la. Ve di ve gema ve kimbi mbakapinta man mbamaankwagh mba ve lu eren tom sha iyou i Yehova la,+
12 kua mbamaankwagh a awen man mbatôndonawen. Shi ve yam ikyon man awen a kuan sha u sôron ajiir a a vihi sha iyou i Yehova la, shi ve er tom a inyaregh kira u kimbin akaa agen cii, a i sôr sha iyou shon la.
13 Nahan kpa, i er tom a inyaregh ki i va a mi hen iyou i Yehova la, u eren ugbangi mba sha azurufa shin akaa a pirin usu a mi shin agbande shin ibusa+ shin ma kwagh ugen, u i er un sha zanaria, shin i er un sha azurufa sha ci u iyou i Yehova ga.+
14 Lu mba ve lu eren tom la tseegh ve na ve ki ye, nahan ve er tom a mi u sôron iyou i Yehova.
15 I ôron a nomsombaiorov mba i na ve inyaregh ki kimbin mbatomov la ér, ve va gba ceke sha inyaregh ki ve ne mbatomov la ga, sha ci u i na ve jighjigh.+
16 Nahan kpa, inyaregh ki i zuan a mi sha iniav mbi iboov+ man inyaregh ki i zuan a mi sha iniav mbi isholibo la yô, i vaan a mi hen iyou i Yehova ga; sha ci u ki lu kwagh u upristi.+
17 Lu hen shighe ne, Hasael+ tor u Shiria kôndo za u za nôngon ityav a Gati+ ye, maa a ngohol un. Ngohol un kera yô, a wa ishima u za tan num* sha Yerusalem.+
18 Nahan Yehoashi tor u Yuda tôô hanma icighan nagh ku uter nav, Yehoshafati man Yehoram man Ahashia, utor mba Yuda mban yange ve tsegha la cii, kua icighannagh nagh man zanaria u i zua a mi ken ayou a koson akaainjaa ken iyou i Yehova man iyou i tor la cii, tindi a mi hen Hasael tor u Shiria.+ Tsô Hasael kar hen Yerusalem kera.
19 Akaa agen ken yiase i Yehoashi cii, akaa a a er la cii, i nger ken takeda u yiase i sha ayange a ator a Yuda la.
20 Nahan kpa, mbatomov mba Yehoashi zua zwa sha a na,+ wua un hen iyou i Igyungu,*+ sha gbenda u senen hen Sila la.
21 Lu mbatomov nav Yosakar wan u Shimeati man Yehoshabadi wan u Shomer, ve wua un ye.+ Ve ii un vea uter nav ken Gar u Davidi, maa wan na Amashia kar tema tor sha ityough nagh.+
