Utor u sha Uhar 6:1-33
6 Tsô ônov mba uprofeti+ kaa a Elisha ér: “Nenge! Ijiir i se lu her vea we ne, ndahar sha ci wase gande.
2 Wea lumun yô, de se za shin Yordan. De hanma wase nana tôô gungurkon her, nana er ijiir her ape se lu yô.” A gema a kaa ér: “Za ase nen.”
3 Maa môm ken a ve pine ér: “U fatyô u van vea mbatomov ou jee?” A gema a kaa ér: “Een, me va.”
4 Tsô a mough a za vea ve, mba za nyer shin Yordan yô, ve gba gberen ikyon.
5 Môm ken a ve ngur gberen kon yô, gbenger-ijembe tsua gba shin mnger, maa a ngor a kaa ér: “Kpei orvesen wam, m ngohol a ngohol ijembe ne!”
6 Or u Aôndo u mimi la gema pine ér: “Ka han u gbe?” Tsô a tese un ape u gbe la. Nahan a gber gbaakon a ker her, maa a er gbenger-ijembe la, due gba kuan sha mnger.
7 Tsô a kaa ér: “Kôr u due a mi.” Maa a za uwegh a kôr u a due a mi.
8 Hen shighe ne, tor u Shiria due za ér una za nôngo ityav a Iserael.+ Nahan a za idyu vea mbatomov nav, maa a kaa ér: “Me za haa afo hen ijiir ingin man ingila vea ven.”
9 Tsô or u Aôndo u mimi la,+ tindi loho hen tor u Iserael, kaa ér: “Wa ikyo, de karen hen ijiir ne ga, sha ci u ka her Mbashiria ve lu senen van ye.”
10 Tsô tor u Iserael tindi a loho hen ijiir i or u Aôndo u mimi, ta un icin sha kwagh u i la. A zer tan un icin, nahan a palegh ijiir la acin imôngo.*+
11 Kwagh ne na yô, ishima vihi tor u Shiria, nahan a yila mbatomov nav a pine ve ér: “Ôrom nen! Ka an ken a vese nan lu ken vegher u tor u Iserael?”
12 Tsô môm ken mbatomov nav kaa ér: “Ka mô wase môm ga, terem tor! Ka Elisha, profeti u ken Iserael la, ka a ôron tor u Iserael akaa a u ôron ken iyou you i tsan la ye.”+
13 A gema a kaa ér: “Za nen, za tôv fa nen ape a lu yô, sha er me tindi ior vea za kôr un yô.” Shighe kar yô, i va kaa a na er: “Ngu ken Dotan.”+
14 Fese je, a tindi anyinya man akekeautya her, kua ikyumutya i vesen; ve za tugh ve za kase gar la.
15 Wanye* u or u Aôndo u mimi la nderen pepe pepe, dugh ken won yô, a nenge a ikyumutya i i lu a anyinya man akekeautya yô, kase gar. Fese je wanye na la, kaa a na ér: “Kpei, orvesen wam! Se er nena?”
16 Kpa a kaa ér: “De cie ga!+ Gadia mba ve lu vea vese la, hemba ngeen a mba ve lu vea ve la.”+
17 Elisha maa gba eren msen, kaan ér: “Wea lumun yô Yehova, bugh un ashe a nenge.”+ Fese je, Yehova bugh wanye la ashe a nenge. Maa nenge! haregh u iwoogh la, iv a anyinya man akekeautya a usu+ kase Elisha ningir tser.+
18 Mbashiria mba senen mba ve yô, Elisha er msen hen Yehova kaa ér: “Wea lumun yô, pir ikyurior ne ashe.”+ Nahan a pir ve ashe, vough er Elisha sôn nahan.
19 Elisha maa kaa a ve ér: “Ka gbenda ne ga, shi ka gar shon ne kpaa ga. Dondo nen sha a mo, m hemen ne gbenda, m za a ven hen or u ne lu keren la.” Nahan kpa, a hemen ve gbenda a za a ve ken Samaria.+
20 Mba za nyer ken Samaria yô, Elisha kaa ér: “Yehova, bugh ve ashe ve nenge.” Nahan Yehova bugh ve ashe, ve nenge er ve lu hen atô u Samaria yô.
21 Tor u Iserael nengen a ve yô, a pine Elisha ér: “Terem, m wua vee, m wua vee?”
22 Kpa a kaa ér: “De woo ve ga. Ka wea kôr ior wea yemen a ve uikyangen yô, u wua ve sha sanker man ada? Na ve beredi ve ya, man mngerem ve ma,+ nahan ve hide ve yem hen ter ve.”
23 Tsô a er ve zegeiniongo, ve ya kwagh, ve ma kwagh, mba been yô, a kaa a ve ér ve hide ve yem hen ter ve. Hii shighe la je, ikwe i mbayan ishar i Mbashiria+ kera va ken tar u Iserael ga.
24 Shighe kar yô, Ben-hada tor u Shiria kohol ikyumutya* na cii imôngo, mough kôndo za kase Samaria+ ningir tser.
25 Tsô zegejen gba+ ken Samaria, shi ve kase un zan zan i va gema teen ityough ki jaki+ sha agbenger a azurufa 80, shi kwata u ikyaren u kab* u ambi a mkungu kpa i va gema teen sha agbenger a azurufa 5.
26 Tor u Iserael ngur karen sha kpekpe u gar yô, kwase ugen vaa a na genger genger, kaa ér: “Wase se, terem tor!”
27 A gema a kaa a na ér: “Aluer Yehova wase u ga yô, ka sha nyi gbenda me wase u we? U hen wer me fatyô u nan we kwaghyan shin wain shin mkuremee?”
28 Tor pine un ér: “Ka nyi i ze u iyolo?” A gema a kaa ér: “Kwase ne kaa a mo ér, ‘Va a wan wou u nomso, se ya nyian, kper di mo me va a wan wam u nomso, se ya.’+
29 Nahan se jiidi wan wam se ya.+ Kpernan yô, m kaa a kwase la mer, ‘Va a wan wou se ya.’ Kpa a za yer wan na.”
30 Tor ongo mkaanem ma kwase la yô, fese je a ande akondo a na.+ Tor ngur va karen sha kpekpe yô, ior nenge er a hoo ikyondo i zungwen* ken atô yô.
31 Tor maa kaa ér: “Aluer i gber Elisha, wan u Shafati ityough nyian ga yô, Aôndo a tsaham tsung!”+
32 Hen shighe ne, Elisha tema hen ya na, mbatamen lu vea na. Tor tindi or hemen a na, kpa cii ve orôron-loho la a za nyôr yô, Elisha kaa a mbatamen mbara ér: “Nenge nen, wan u orwuanor ne,+ tindi ér i va gberem ityough. Nengen nen, orôron-loho la una vaan yô, wuhe nen hunda kighir nen u, a lu ken won. Ka iov angahar i orvesen na i lu van un ken ijime gaa?”
33 Er lu lamen a ve zan la je, orôron-loho la va nyôr hen a na, maa tor kaa ér: “Ka Yehova a ve a ican ne ye. M za hemen u keghen Yehova mer nyi?”
