Utor u sha Uhar 7:1-20
7 Tsô Elisha kaa ér: “Kegh ato a kwaghôron u Yehova. Ka kwagh u Yehova a kaa je ne, ér: ‘Kper er hen shighe ne nahan, a lu teen ikyaren i sea* i mwem ma i woo ma ma vie tsembelee yô, sha shekel môm,* shi a lu teen uikyaren mba sea uhar mba barli sha shekel môm hen hundagar u* Samaria.’”+
2 Maa orutya u vesen u tor suur sha a na yô, kaa a or u Aôndo u mimi la ér: “Aluer Yehova una bugh usha, samuyia ua haa je kpa, kwagh ne una fatyô u eren ga.”+ A gema a kaa ér: “U nenge a kwagh ne sha ashe a ou,+ kpa u ya ga.”+
3 Mbaamandev unyiin lu hen hundagar la,+ nahan ve kaa a ayol a ve ér: “Se tema heen zan zan se va kpe ser nyi?
4 Aluer se kaa ser, ‘Se nyôr ken gar,’ kpa er ijen i gbe ken gar yô,+ se kpe ker. Man aluer se tema heen kpa, se kpe. Nahan de se yem nen ken afo a Mbashiria. Aluer ve de se se mba uma yô, se lu uma, kpa aluer ve wua se yô, se kpe di je.”
5 Tsô ve mough aôndoaimegh ve za nyôr ken afo a Mbashiria. Mba za zurum a afo a Mbashiria yô, or môm lu her ga.
6 Gadia Yehova er Mbashiria mba ve lu ken afo a ve la ungwa iov i akekeautya man anyinya, lu iov i zegeikyumutya.+ Tsô ve kaa a ayol a ve ér: “Nenge! Tor u Iserael za yam utor mba Mbahiti man utor mba Mbaigipiti ér ve va nôngo ityav a vese!”
7 Fese je ve mough aôndoaimegh la, ve yevese ve undu utenti vev, man anyinya a ve man ujaki vev, ve undu hanma kwagh u ken afo la cii her gedee, ve yevese sha er vea war uuma vev yô.
8 Mbaamandev mban mba za aren hen akpe a afoogh yô, ve nyôr ken tenti môm ve gba yan kwagh shi man kwagh. Maa ve kura azurufa man zanaria man akondo ker, ve yem ve za yer. Shi ve hide ve va nyôr ken tenti ugen, ve kura akaa ker, ve yem a mi ve za yer.
9 Ken masejime yô, ve kaa a ayol a ve ér: “Kwagh u se lu eren ne doo ga. Nyian ka iyange i saan iyol, nahan se za ôr mbagenev loho u dedoo ne! Aluer se ta anu, se kegh zan zan sev av yô, se kuma mtsaha. De se za nen hegen se za ôr kwagh ne hen ya u tor.”
10 Tsô ve yem ve za yila mbakuranhundagar, ve kaa a ve ér: “Se za ken afo a Mbashiria, kpa or môm ngu ker ga—imo i or môm tsô kpa se ungwa ga. Ka anyinya man ujaki tseegh i zer a lu her ye, shi ve undu utenti her gedee.”
11 Fese je, mbakuranhundagar mbara za ôr loho ne genger genger hen ior mba ve lu hen ya u tor la.
12 Fese je, tor mough tugh kaa a mbatomov nav ér: “Nea lumun yô, de m ôr ne kwagh u Mbashiria ve er a vese yô. Ve fa er ijen i ker se yô,+ nahan ve undu afo, ve za yer ken toho, mba kaan ér, ‘Vea va duen ken gar yô, se kôr ve uma, maa se nyôr ken gar.’”+
13 Tsô môm ken mbatomov nav kaa a na ér: “Wea lumun yô, de ior mbagen ve tôô anyinya ataan ken anyinya a a shi ken gar la. Nenge! Kwagh ve una kure er kwagh u ikpelaior i Iserael i i shi heen ne cii nahan. Nenge! Kwagh ve una kure er kwagh u ikpelaior i Iserael i i tim kera cii la nahan. Nahan de se tindi nen ve ve due ken won se nenge.”
14 Tsô ve tôô akekeautya ahar a anyinya, maa tor tindi ve ér ve due ve za ken afo a Mbashiria, a kaa ér: “Za, za nenge nen.”
15 Ve tôv Mbashiria ijime zan zan nyôr Yordan; gbenda la cii iv a akondo man akaa a Mbashiria haa kera, er mciem gba ve iyol ve lu yevese la. Maa mbaôron-loho mbara hide va ôr tor kwagh ne.
16 Tsô ior due za ya ishar ken afo a Mbashiria, je yô i hingir u teen ikyaren i sea i mwem ma i woo ma vie tsembelee yô sha shekel môm, shi i lu teen uikyaren mba sea uhar mba barli sha shekel môm, vough er Yehova ôr nahan.+
17 Tor ver orutya u vesen u suur sha a na la, lu nengen sha hundagar, kpa ior ndyar un angahar hen hundagar a kpe, vough er or u Aôndo u mimi kaa a tor shighe u sen va hen a na la nahan.
18 Kwagh ne er vough er or u Aôndo u mimi la kaa a tor nahan, ér: “Kper er hen shighe ne nahan, a lu teen uikyaren mba sea uhar mba barli sha shekel môm, shi a lu teen ikyaren i sea i mwem ma i woo ma vie tsembelee yô, sha shekel môm hen hundagar u Samaria.”+
19 Kpa orutya u vesen la gema kaa a or u Aôndo u mimi la ér: “Aluer Yehova una bugh usha, samuyia ua haa je kpa, imbakwagh la ia fatyô u eren ga.” Elisha maa kaa ér: “U nenge a kwagh ne sha ashe a ou, kpa u ya ga.”
20 Lu kwagh u er un vough je la, sha ci u ior ndyar un angahar hen hundagar a kpe.
Ngeren mba shin kpe
^ Sea môm yange a lu ulita 7.33. Nenge Ngeren u Seer u B14 la.
^ Shekel môm yange a lu ugeram 11.4. Nenge Ngeren u Seer u B14 la.
^ Shin “ukasua mba.”
