Utor u sha Uhar 5:1-27
5 Hen shighe ne, Naaman kurutya u tor u Shiria, lu or u duen iti, u orvesen na naan un icivir yô, sha ci u lu sha ikyev na, Yehova na Shiria mhembe* ye. Er lu orimande* nahan kpa, lu orutya u ageegh.
2 Iyange igen Mbashiria mba za te ityav sha tar u Iserael yô, ve kôr wankwase u kiriki ugen, ve hide a na, va hingir u shiren kwase u Naaman.
3 Wankwase la kaa a kwase u Naaman ér: “Luun er terem za hen profeti+ u ken Samaria la yô, ma a bee un imande.”+
4 Nahan a* za, a za ôr orvesen na kwagh u wankwase u ken Iserael a ôr la.
5 Maa tor u Shiria kaa ér: “Za ase! Me tindi a washika hen tor u Iserael.” Tsô a mough a za, a za a azurufa utalenti* pue, man agbenger a zanaria 6,000, man akondo a huan pue.
6 A za na tor u Iserael washika la, i nger ker ér: “M tindi wanye wam Naaman hen a we a washika ne mer, bee un imande.”
7 Tor u Iserael ôron washika la yô, fese je a ande akondo a na, a kaa ér: “M ngu Aôndo, ve me fatyô u wuan or shi nderen nan yee?+ A tindi or ne hen a mo ér mo m bee nan imande! Ne nenge ayol a en er or ne, a lu hiin mo iyongo kpa?”
8 Kpa Elisha or u Aôndo u mimi la ongo ér tor u Iserael ande akondo a na yô, fese je a tindi loho hen tor, a kaa ér: “Er nan u ande akondo a ouwe? Wea lumun yô, kaa un a va hen a mo, sha er una fa er profeti a lu ken Iserael yô.”+
9 Nahan Naaman za a anyinya a na man akekeautya na, za tile sha hunda u ya u Elisha.
10 Nahan kpa, Elisha tindi orôron-loho ér a za kaa un ér: “Za ôô iyol shin Yordan+ kwa taankaruhar,+ nahan kwavyolough wou ua hide her, u hingir wang.”
11 Tsô ishima vihi Naaman tsung, a gba yemen kaan ér: “Ashen m hen mer, ‘Una due una va hen a mo, una va tile heen, una yila sha iti i Yehova Aôndo na, una ovur uwegh sha imande ne, una wanger i.’
12 Uifi mba ken Damaseku,+ Abana man Farpar, ve hemba doon a mngerem ma ken Iserael cii gaa? Me fatyô u ôôn iyol shin ve, hingir wang gaa?” Maa a goom sha ishimavihin a gba yemen.
13 Mbatomov nav maa kporom hen a na, kaa ér: “Terem, profeti la una kaa a we ér, we u er zegekwagh nahan, ma u er gaa? Man hegen u a kaa a we ér, ‘Ôô iyol hingir wang’ ne ve, u kera er ga yee?”
14 Tsô a yem shin Yordan, a za ôô iyol shimi kwa taankaruhar, vough er or u Aôndo u mimi kaa nahan.+ Maa kwavyolough na hingir er u wanye u kiriki nahan,+ nahan a hingir wang.+
15 Been yô, a hide a yem hen or u Aôndo u mimi la,+ un vea ior mba ve lu vea na* la cii, a za tile sha ishigh nagh, a kaa ér: “Hegen yô m fa, Aôndo ngu ijiir igen i môm sha tar ga, saa ken Iserael.+ Wea lumun yô, ngohol iyua* hen wanye wou.”
16 Nahan kpa, Elisha kaa ér: “Mimi je, er Yehova un u m eren un tom,* a lu u uma ne, me ngohol i ga.”+ A zamber a na ér a ngohol, kpa a venda.
17 Ken masejime yô, Naaman kaa ér: “Aluer ka nahan ga yô, de i na wanye wou inya i Iserael, i yuhwan kuman ikyav mbi mbaalfadari* uhar vea tôô yô, gadia wanye wou, una kera na nagh ku nanden shin ma nagh ku gen hen ma aôndo ugen ga, saa Yehova.
18 Kpa Yehova a de wanye wou kwaghbo sha kwagh môm ne tsô: Shighe u terem a ze ken iyou i* Rimon, u za guren civir un yô, ka a yier sha uwegh agh, nahan i gba u me gure inya ken iyou i Rimon. Shighe u m gur inya ken iyou i Rimon yô, Yehova a de wanye wou a kwaghbo ne.”
19 Tsô Elisha kaa a na ér: “Yem bem bem.” Naaman karen yemen gbe ica yô,
20 Gehashi,+ wanye u Elisha or u Aôndo u mimi la,+ kaa ken ishima ér: ‘Orvesen wam de Naaman Orshiria ne+ gba yemen tsô, a ngohol kwagh môm u a ve a mi ga. Mimi je er Yehova a lu u uma ne, me zenda un ijime, me za ngohol kwagh hen a na.’
21 Tsô Gehashi zenda Naaman ijime. Naaman nengen ér or ngu zendan un ijime yô, a hungwa sha ikyekyeutya na, a za kohol un, a pine ér: “Kwagh za iyolo?”
22 A gema a kaa ér: “Kwagh môm za iyol ga. Orvesen wam tindim hen a we, a kaa ér: ‘Nenge! Agumaior ahar mough hen haregh u iwoogh u Eferaim, ka ônov mba uprofeti, ve va hen a mo hegen. Nahan wea lumun yô, na ve talenti u azurufa man akondo a huan ahar.’”+
23 Naaman gema kaa ér: “Dugh talenti uhar.” A zer zamber a na,+ maa a wa utalenti mba azurufa uhar ken aba ahar, kua akondo a huan ahar, a na mbatomov nav uhar, ve tôô ve hemen un gbenda.
24 Gehashi za nyôron hen Ofel* yô, a ngohol akaa la hen a ve, a ver ken iyou, maa a kaa a ior mbara ér ve hide ve yem. Mba yemen yô,
25 a nyôr a za hen orvesen na. Elisha maa pine un ér: “Gehashi, ka han u ze?” Kpa a gema a kaa ér: “Wanye wou za mape môm ga.”+
26 Elisha kaa a na ér: “Ishima yam ashen i ze a we shighe u or la a hongo sha ikyekyeutya na u va kohol we la gaa? Ka shighe u ngohol azurufa shin akondo shin ishuleikyon i olev shin ishuleikyon i wain shin iyôngo shin ibua shin ikpan i nomso, gayô ikpan i ukase nee?+
27 Hegen yô, imande i Naaman+ la ia hide sha a we man ônov ou, gbem sha won.” Her ave ave je, a due sha ishigh nagh a imande iyol, a kungu puung er senou nahan.+
Ngeren mba shin kpe
^ Shin “myom.”
^ Shin “lu a angev mbu sha kwavyolough.”
^ A fatyô u lun Naaman.
^ Talenti môm yange a lu ukilogeram 34.2. Nenge Ngeren u Seer u B14 la.
^ Zwa Heberu, “iveren.”
^ Zwa Heberu, “afo.”
^ Zwa Heberu, “m tilen sha ishigh nagh.”
^ Alfadari ka wan u jaki i unde nyinya a mar yô.
^ Shin “tempel u.”
^ Ijiir igen ken Samaria; a fatyô u lun igyungu shin ijiir i i maa i kase yô.
