Utor u sha Uhar 19:1-37
19 Tor Hesekia ongo kwagh ne yô, fese je a ande akondo a na, a hua ikyondo i zungwen,* a za hen iyou i Yehova.+
2 Maa a tindi Eliakim u nengen sha ya u tor la, man akawe Shebena, kua mbahemen upristi, hen profeti Yesaia+ wan u Amoshi; ve hua akondo a zungwen.*
3 Ve za kaa a na ér: “Ka kwagh u Hesekia a kaa je ne, ér, ‘Iyange ne ka iyange i ican man i ityuhwanev* man i ihyeenegh, sha ci u shighe kuma u a mar mbayev,* kpa agee nga a maren ga.+
4 Alaghga tsô Yehova Aôndo wou una ungwa akaa a Rabeshake a ôr cii, un u ter na tor u Ashiria a tindi un ér a va laha Aôndo u uma la,+ nahan una pine un kwagh sha akaa a Yehova Aôndo wou a ongo la. Yô, er msen+ sha ci u mba ve war, ve shi her ne.’”
5 Tsô mbatomov mba Tor Hesekia za hen Yesaia,+
6 nahan Yesaia kaa a ve ér: “Ka kwagh u ne za ôr a ter wen je ne, ner, ‘Ka kwagh u Yehova a kaa je ne, ér: “De cie sha ci u akaa a u ongo la ga,+ ka akaa a mbatomov mba tor u Ashiria ve ôr u lahan mo je la.+
7 Nenge, me wa mhen ken ishima na,* nahan una ungwa ibaver una hide a yem ken tar na; maa me na una za kpe sha sanker ken tar na.”’”+
8 Rabeshake ongo ér tor u Ashiria kura ikyav hen Lakishi kera yô,+ a hide a yem hen a na, a za kohol un lu nôngon ityav a Libena.+
9 Hen shighe ne, tor ungwa i ôr kwagh u Tirhaka tor u Etiopia ér: “Nenge, a due sha u va nôngon ityav a we.” Nahan shi a tindi mbaôron-loho+ hen Hesekia, a kaa ér:
10 “Ka kwagh u ne za ôr a Hesekia tor u Yuda je ne, ner, ‘De deen wer Aôndo wou u u suur sha a na la a bume u, a kaan ér: “A na Yerusalem sha ikyev i tor u Ashiria ga” ze.+
11 Nenge! U ungwa kwagh u ator a Ashiria a er a ityar igen ne cii; a tim i kera la.+ Nahan ka we ve u war yee?
12 Yange mbaaôndo mba akuraior a uter av tim a kera la yima ve kpa? Gosan man Haran+ man Resev man ior i Eden, mba ve lu ken Tel-asar la, mba hana?
13 Tor u Hamati ngu hana? Tor u Arpadi man tor u agar a Sefarvaim man tor u Hena man tor u Iva,+ mba hana?’”
14 Hesekia ngohol uwashika mbara sha uwegh ku mbaôron-loho mbara ôr. Hesekia maa kôndo za sha iyou i Yehova, za samber ve* sha ishigh ki Yehova.+
15 Hesekia maa gba eren msen+ sha ishigh ki Yehova kaan ér: “We Yehova Aôndo u Iserael, we u u tem sha ikyônough ki torough sha* ucerubi la.+ Ken ityartor i sha won cii,+ ka we tswen u lu Aôndo u mimi ye. U gba sha man tar.
16 We Yehova, kegh ato ungwa!+ Bugh ashe a ou+ nenge, we Yehova! Ungwa loho u Senakeribi a tindi sha u lahan Aôndo u uma ne.
17 Sha mimi yô Yehova, ator a Ashiria tim akuraior kua ityar ve.+
18 Shi ve haa mbaaôndo vev ken usu sha ci u ve lu mbaaôndo kpôô kpôô ga,+ kpa ve lu tom u ave a ior,+ ikyon man awen. Ka nahan ve, ve fatyô u timin ve ye.
19 Kpa hegen yô, we Yehova Aôndo wase, wea lumun yô, yima se sha ikyev na, sha er ityartor i sha won cii ia fa er i lu we Yehova tseegh u lu Aôndo yô.”+
20 Tsô Yesaia wan u Amoshi tindi loho ne hen Hesekia ér: “Ka kwagh u Yehova Aôndo u Iserael a kaa ne ér, ‘M ungwa msen u u er hen a mo+ sha kwagh u Senakeribi tor u Ashiria la.+
21 Ka kwagh u Yehova a ôr sha a na je ne, ér:
“Iniunkwase i Shion ngi lahan we, ngi nahan we tar.
Wankwase u Yerusalem ngu sen we jingir ityough.
22 Ka an u toho shi u lam sha a nan dang-na?+
Ka an u nande a nanaa?+
Shi ka an u kenger nan sha igbongoro?
Ka Icighan u Iserael u er akaa ne a na ye!+
23 U tuhwa Yehova+ sha ikyev i mbaôron-loho ou,+ u kaa wer,‘Me unde iwo i tavenAa akekeautya a am a ngeen la,Sha ajiir a Lebanon a a hembe gban ica la.
Me gber ikyon na i sedar i taven la, man ikyon na i yunipa i hemban doon la.
Me nyôr ken ajiir a na a yeren a hemban gban ica la, man ken akô a na a a we civirii la.
24 Me time azôr shi me ma mngerem ma ken tar ugen;Me uma iwagh* i ken Igipiti cii sha akevangahar a am.’
25 U ngu a ungwa gaa? M kange ishima u eren* kwagh ne ngise je.+
Ken ayange a ken ijime la je, m sôr kwagh ne m ver.+
Hegen yô, me er kwagh ne.+
Ú gema agar a i we a ugir mba taver yô, aa hingir atihi a alôgh.+
26 Or a lu u wasen mba ve tem ker la ga;Mciem ma a gba ve iyol shi vea ya kunya.
Vea hingir er imendenev mbi ken toho man toho u ndor nahan,+Er toho u sha toryoughough u ahumbe a sha ityoughkitaregh a va use u nahan.
27 Kpa m fa shighe u u tem inya, man shighe u u dugh, man shighe u u nyer la dedoo,+Kua shighe u ishima i vihi u a mo la kpaa,+
28 Sha ci u ato a am ungwa+ akaa a u ôr sha a mo sha ishimavihin la,+ kua kume u u lu tan la.
Nahan me wa u tsue wam ken ahenga, shi me wa u lijam+ wam sha zwa,Nahan me hide a we sha gbenda u u ve sha mi la.”+
29 “‘Man ka ikyav i u* nenge a mi je ne: Inyom ne u ya iyiav mbi mbi mende iyol i mbi yô;* ken inyom i sha uhar la di u ya iyiav mbi mbi hidi mbi mende hen ijiir shon i môm la;+ kpa ken inyom i sha utar la yô, u lôô iyiav shi u sunda, u kaha ishuleikyon i wain shi u ya atam a i.+
30 Mba ve war hen ya u Yuda la, ka mba ve shi her je la;+ vea lu er ikyon i i um atam kpishi, sha ci u i wa amise yem shin inya la nahan.
31 Gadia mba ve shi her la, vea due ken Yerusalem, man mba ve war la, ken Uwo u Shion. Yehova u akum a sha una er kwagh ne sha gbashima.+
32 “‘Sha nahan yô, ka kwagh u Yehova a ôr sha tor u Ashiria je ne, ér:+
“Una nyôr ken gar ne ga+Shi una ker ivaan her gaShi una va ta ityav sha mi a perutya gaShi una ta tihi u inyaagh ken kpekpe na u ken won u nôngon ityav a na kpaa ga.+
33 Una hide una yem sha gbenda u a ve la;Una nyôr ken gar ne ga,” kape Yehova a kaa ne.
34 “Me kura gar ne+ shi me yima un sha ci wam+Man sha ci u ortom wam Davidi.”’”+
35 Hen tugh mbura je, ortyom u Yehova due, za wua ior mba ken afo a Mbaashiria iorov 185,000.+ Ior mba nderen pepe pepe yô, ve nenge a ior mba ve kpe la cii.+
36 Nahan Senakeribi tor u Ashiria mough hide yem ken Ninive+ za lu ker.+
37 Tsô er za gure inya ken iyou i* aôndo na Niseroki la, ônov nav, Adrameleki man Shareser, za wua un sha sanker,+ maa ve yevese ve yem ken tar u Ararati.+ Wan na Esar-hadon+ maa kar tema tor sha ityough nagh.
Ngeren mba shin kpe
^ Shin “ibyashôhô.”
^ Shin “abaasôhô.”
^ Shin “nan ibo.”
^ Zwa Heberu, “ve va sha zwa u sagh.”
^ Zwa Heberu, “jijingi ken a na.”
^ Zwa Heberu, “un.”
^ Shin a fatyô u kaan ér, “hen atô u.”
^ Shin “iwagh i Nil.”
^ Zwa Heberu, “m er.”
^ Shin “samuyia u u hee hen inya, u mende yô.”
^ Ka Hesekia je la.
^ Shin “tempel u.”
