Utor u sha Uhar 21:1-26
21 Manase+ lu anyom 12 shighe u hingir tor la, a hemen anyom 55 ken Yerusalem.+ I yilan ngô na ér Hefeshiba.
2 A er kwaghbo sha ishigh ki Yehova, lu dondon aeren a ndôhôrshima a akuraior+ a Yehova zenda a sha ishigh ki ior i Iserael la.+
3 A hide a maa ajiir a taven a ter na Hesekia hembe kera la,+ shi a er atse a nan nagh sha ci u Baal, shi a tim ityôgh ki akombough ki sha kon,*+ vough er Ahaba tor u Iserael yange er nahan.+ Shi a gure akum a sha cii inya, a civir a.+
4 Shi a maa atse a nan nagh ken iyou i Yehova,+ i Yehova yange kaa ér: “Me ver iti yam ken Yerusalem” la.+
5 Shi a maa atse a nan nagh sha ci u akum a sha cii,+ hen ityembe ihiar i iyou i Yehova la.+
6 Shi a er wan na u nomso kar ken usu; lu eren ahir shi keren u fan akaa a ken hemen+ shi ver mbalamen a ujijingi mba mbakpenev man mbatsenganpasenakaa.+ A er kwaghbo u vesen sha ishigh ki Yehova, a vihi un ishima.
7 A ver eev mbu gban a gba, mbu ityôgh ki akombough ki sha kon*+ ki a er la, ken iyou i Yehova ôr a Davidi man wan na Solomon ér: “Me ver iti yam ia lu gbem sha won ken iyou ne, man ken Yerusalem, u m tsough un ken uipyaven mba Iserael cii la.+
8 Shi mayange me kera er angahar a Mbaiserael aa zende wue wue ken tar u m na uter vev la ga,+ aluer ve kundu ishima mba eren akaa a m kaa ve la cii yô,+ ka Tindi u ortom wam Mose wa ve ér ve kuran la cii je la.”
9 Kpa ve ungwa ga, shi Manase za hemen u hemen ve u eren kwaghbo, a na ve hemba eren ifer a akuraior a Yehova tim a sha ishigh ki Mbaiserael la.+
10 Yehova za hemen u ôron kwagh sha ikyev i mbatomov nav uprofeti,+ kaan ér:
11 “Manase tor u Yuda er akaa a ndôhôrshima ne cii; a hemba eren iferkwagh a Mbaamor+ mba ve vande lun a na la cii,+ shi a na Yuda er isholibo a ieev nav mbi ndôhôrshima* la.
12 Sha nahan yô, ka kwagh u Yehova Aôndo u Iserael a kaa ne, ér: ‘Nenge, me va a kwaghtseren sha Yerusalem+ man Yuda je yô, hanma or u nan ongo cii, a kpiligh nan iyol.*+
13 Shi me naregh kor u karen kwagh+ sha Yerusalem, me kar un a kor u karen kwagh u yange i kar Samaria la,+ man a ikyagh ki karen kwagh ér a lu jighilii ki* yange i kar ya u Ahaba a mi la,+ nahan me ese Yerusalem kera vindi vindi, vough er or ka nan ese gbande kera vindi vindi, nan gema nan cir inya nahan.+
14 Me undu ior mba ve mase shin ken dyako wam la,+ shi me na ve sha ikyev i mbahyomov vev, nahan mbahyomov vev cii vea yem a ve uikyangen shi vea ngohol ve akaa a yem a mi,+
15 sha ci u ve er kwaghbo sha ishigh yagh, shi ve za hemen u vihin mo ishima, hii sha iyange i uter vev due ken Igipiti la je zan zan nyian.’”+
16 Manase shi haa awambe a ior mba ishôôv inya kpishi je gande, zan zan a iv Yerusalem a awambe a ve, hii vegher ne za kighir vegher la.+ Kwagh ne wa isholibo i er, shi na Yuda kpa er sha u eren kwaghbo sha ishigh ki Yehova la ker ga.
17 Akaa agen ken yiase i Manase cii, man hanma kwagh u er cii, kua asorabo a a er cii, i nger ken takeda u yiase i sha ayange a utor mba Yuda la.
18 Tsô Manase kpe, i ii un vea uter nav ken sule u hen ya na, ka sule u Usa+ je la; maa wan na Amon kar tema tor sha ityough nagh.
19 Amon+ lu anyom 22 shighe u hingir tor la, a hemen anyom ahar ken Yerusalem.+ I yilan ngô na ér Meshulemeti, lu wan u Harushi, kwase u ken Yoteba.
20 A za hemen u eren kwaghbo sha ishigh ki Yehova, vough er ter na Manase er nahan.+
21 Lu zenden sha igbenda i ter na zende la cii, shi za hemen u civir ieev mbi ndôhôrshima mbi ter na civir la, shi guren mbi inya.+
22 Nahan a undu Yehova Aôndo u uter nav, shi a zende sha gbenda u Yehova ga.+
23 Shighe kar yô, mbatomov mba Amon zua zwa sha a na, wua tor hen ya na.
24 Kpa ior mba ken tar la wua mba ve zua zwa sha Tor Amon la cii, maa ve ver wan na Yoshia tor sha ityough nagh.+
25 Akaa agen ken yiase i Amon cii, man kwagh u er la, i nger ken takeda u yiase i sha ayange a utor mba Yuda la.
26 Tsô ve ii un ken uwar na ken sule u Usa,+ maa wan na Yoshia+ kar tema tor sha ityough nagh.
Ngeren mba shin kpe
^ Nenge Ngeren u Pasen Asember.
^ Nenge Ngeren u Pasen Asember.
^ Alaghga ishember i ken zwa Heberu i i gem nahan ne zua vea ishember i “ambi a uile,” u tesen ér kwagh la ndôhôr ishima.
^ Zwa Heberu, “ato a hingir nan jong.”
^ Shin “konmnger u.”
