Utor u sha Uhar 23:1-37
23 Tsô tor tindi loho i za ôr mbatamen mba Yuda man Yerusalem cii ve kohol imôngo.+
2 Tor maa kôndo za ken iyou i Yehova vea ior i Yuda cii, man ior mba ken Yerusalem cii, man upristi kua uprofeti; ior cii, hii sha mbakiriki zan zan nyôr sha mbavesen. A ôr akaa a i nger ken takeda+ u ikyuryan,+ u i zua a mi ken iyou i Yehova la cii,+ ve ungwa.
3 Tor tile hen ityô, hide ya ikyur sha ishigh ki Yehova ér,+ una dondo Yehova shi una kuran atindi a na, shi una eren sha akaaumbur a na, man akaawan a na, a ishima na cii man a uma na cii, sha u eren sha akaaôron a ken ikyuryan ne, a yange i nger ken takeda ne la. Nahan ior cii lumun ikyuryan la.+
4 Tor maa kaa a zegepristi Hilkia+ man upristi mbagen mba ve cir ken a na la, man mbakuran hunda ér ve kura ikyav mbi i er sha ci u Baal, man sha ci u ityôgh ki akombough ki sha kon*+ la cii, kua mbi i er sha ci u akum a sha la cii, ve due a mi ken tempel u Yehova kera. Nahan a kura mbi, a za nande ken won u Yerusalem shin upev mba Kideron, maa a kura mtwem ma mbi, a yem a mi ken Betel.+
5 Nahan a na upristi mba mbaaôndo mbagen kera lu a kpenga ga, ka upristi mba utor mba Mbayuda tsua ve ver, ve lu nanden iniav sha ajiir a taven, mnyim lu duen ken agar a Yuda man ajiir a a kase Yerusalem la, kua mba ve nanden Baal nagh mnyim duen la, man iyange man uwer man azuku asan, kua asan agen cii.+
6 A due a ityôgh ki akombough ki sha kon*+ kira ken iyou i Yehova kera, a yem a ki ken akôngo a Yerusalem shin Pev u Kideron, a za nande ki+ shin Pev u Kideron, a wua ki hingir vue, maa a gema vue la, a tsenda sha iwar i ior.+
7 Shi a hembe ayou a nomso mba eren gbaga ken tempel,+ a a lu ken iyou i Yehova, man ape kasev tumen akondo a eren utenti sha ci u ityôgh ki akombough ki sha kon* la.
8 Tsô a due a upristi mbara cii ken agar a Yuda kera, shi a er ajiir a taven, ape upristi nanden iniav mnyim duen, hii hen Geba+ zan zan nyôr Bersheba la,+ kera doo u civir mbaaôndo mba aiev her ga. Shi a hembe ajiir a taven a ihindagar, a a lu hen hundagar u Yoshua orhemen u gar, a a lu ken imese u nyôron sha hundagar la.
9 Upristi mba sha ajiir a taven la, eren tom hen atse a nan nagh a Yehova ken Yerusalem ga,+ kpa ve gema ve yaan beredi u i we kwa sha mi ga la, vea anmgbianev vev.
10 Shi a er ijiir i Tofeti,+ i i lu shin Pev u Ônov mba Hinom*+ la kera doo u civir un her ga, sha er or môm nana de eren wan u nan u nomso shin u kwase a karen ken usu sha ci u Moleki ga yô.+
11 Shi a yange anyinya a utor mba Yuda tsegha* sha u civir iyange la, u karen hen kpoyou* u Natan-meleki, orvesen u eren tom hen ya u tor, i i lu hen uvarenda la, u nyôron ken iyou i Yehova, maa a nande akekeautya a civir iyange a mi la+ sha usu.
12 Tor shi hembe atse a nan nagh a utor mba Yuda er sha haav+ mbu kpoyou u sha, u Ahashi la, kua atse a nan nagh a Manase er ken ityembe i ihiar i iyou i Yehova la.+ A wua a hingir vue, maa a kura vue la a tsenda shin Pev u Kideron.
13 Tor shi er ajiir a taven a sha ishigh ki Yerusalem a a lu ken imbusutariyan* i Uwo u Mtim,* a Solomon tor u Iserael maa sha ci u Ashetaroti, inmgbianaôndo u ndôhôrshima u Mbashidon la; man sha ci u Kemoshi, aôndo u ndôhôrshima u Moabi; man sha ci u Milkom,+ aôndo u ndôhôrshima u Mbaamon la,+ kera doo u civir mbaaôndo mba aiev her ga.
14 A hembe mtôm ma akombom ma awenem avur avur, shi a gber mtôm ma akombom ma sha ikyon,*+ maa a kura akuhe a uumace a za iv ajiir a ve la a mi.
15 Shi a hembe atse a nan nagh a ken Betel kua ijiir i taven i Yeroboam wan u Nebati er, i i na Iserael er isholibo la.+ Hemben atse a nan nagh man ijiir i taven la yô, a nande ijiir i taven la, a wua i hingir vue, shi a nande ityôgh ki akombough ki sha kon* la.+
16 Yoshia gem ashe nengen a iwar i sha uwo la yô, a dugh akuhe a ken iwar la, a nande a sha atse a nan nagh, nahan a er atse la kera doo u civir mbaaôndo mba aiev her ga, vough er Yehova ôr sha ikyev i or u Aôndo u mimi, u tsengaôron ér akaa ne aa er la nahan.+
17 Tsô a pine ér: “Ka uwar u an m nenge a mi keela, i cir iwen sha mi laa?” Ior mba ken gar la gema kaa a na ér: “Ka uwar u or u Aôndo u mimi u ken Yuda,+ u yange tsengaôron akaa a u er sha atse a Betel ne la.”
18 Nahan a kaa ér: “Or môm nana de benden akuhe a na ave ga. De nen a lu er a lu nahan.” Nahan ve bende akuhe a na ave ga, kua akuhe a profeti u yange mough ken Samaria va la.+
19 Yoshia shi bee a ayou a civir mbaaôndo mba aiev a a lu sha ajiir a taven a ken agar a Samaria,+ a utor mba Iserael maa sha u vihin Aôndo ishima la cii; lu kwagh u yange er hen Betel la, er a a ye.+
20 Nahan a kôr upristi mba sha ajiir a taven mba ve lu her la cii, a na nagh a mi sha atse la, shi a nande akuhe a uumace sha a.+ Been yô, a hide ken Yerusalem.
21 Tsô tor kaa a ior cii ér: “Er nen Paseka+ sha ci u Yehova Aôndo wen, er i nger ken takeda u ikyuryan ne nahan.”+
22 Hii sha ayange a mbaajiriv lu ôron Iserael ijir, shin sha ayange a utor mba Iserael man utor mba Yuda la cii je, mba a er Paseka er ngun nahan ga.+
23 Kpa ken inyom i sha 18 i Yoshia tema tor la, i er Paseka ne sha ci u Yehova ken Yerusalem.
24 Yoshia shi bee a mbalamen a ujijingi mba mbakpenev man mbatsenganpasenakaa+ man ieev mbi terafim,*+ man ieev mbi ndôhôrshima,* man akaa a ndôhôrshima a yange lu ken tar u Yuda man Yerusalem la cii, sha er a er akaa a i ôr ken Tindi la,+ a yange i nger ken takeda u pristi Hilkia zua a mi ken iyou i Yehova la yô.+
25 Tor môm vande lun er un nahan, u nan hide hen Yehova a ishima i nan cii, man a uma u nan cii,+ man a agee a nan cii, vough er i ôr ken Tindi u Mose la cii nahan ga; shi or môm kera lu er un nahan kpaa ga.
26 Nahan kpa, ishima za hemen u vihin Yehova a Yuda her tsung, sha ci u akaabo a Manase yange er u vihin Un ishima la cii.+
27 Yehova kaa ér: “Shi me kar a Yuda sha ishigh yagh kera,+ vough er m kar a Iserael kera nahan;+ shi me venda Yerusalem, gar u m tsough ne, kua ya u m ôr kwagh na mer, ‘iti yam ia za hemen u lun her’ la.”+
28 Akaa agen ken yiase i Yoshia cii, akaa a a er cii, i nger ken takeda u yiase i sha ayange a utor mba Yuda la.
29 Sha ayange a na la, Farou Neko tor u Igipiti due va kohol tor u Ashiria hen Ifi u Uferati, Tor Yoshia maa due u za nôngon ityav a na; kpa Neko nengen a na yô, a wua un hen Megido.+
30 Nahan mbatomov nav tôô ikyom na shin ikyekyeutya hen Megido, hide a mi ken Yerusalem, va ii un ken uwar na. Maa ior i tar la tôô Yehoahashi wan u Yoshia shighe un mkurem, ver un tor sha ityough ki ter na.+
31 Yehoahashi+ lu anyom 23 shighe u hingir tor la, a hemen iwer itiar ken Yerusalem. I yilan ngô na ér Hamutal,+ lu wan u Yeremia, u hen Libena.
32 Tsô a gba eren kwaghbo sha ishigh ki Yehova, vough er uter nav er cii nahan.+
33 Farou Neko+ kôr un za wuhe hen Ribela+ ken tar u Hamati, sha u a de kera hemen ken Yerusalem ga yô; maa a wa tar la kpandegh azurufa utalenti* 100 man zanaria talenti môm.+
34 Heela tseegh ga, Farou Neko tôô Eliakim wan u Yoshia, ver un tor sha ityough ki ter na Yoshia, maa a gema un iti hingir Yehoyakim; kpa a hide a Yehoahashi ken Igipiti,+ a lu ker zan zan a kar kpen.+
35 Yehoyakim na Farou azurufa man zanaria, kpa a wa tar la kpandegh sha er una zua a azurufa u Farou kaa ér a na la yô. A ngohol kpandegh ku azurufa man zanaria hen ior mba ken tar la, hanma or sha indi i nan, za na Farou Neko.
36 Yehoyakim+ lu anyom 25 shighe u hingir tor la, a hemen anyom 11 ken Yerusalem.+ I yilan ngô na ér Sebida, un lu wan u Pedaia, kwase u ken Ruma.
37 A za hemen u eren kwaghbo sha ishigh ki Yehova,+ vough er uter nav er cii nahan.+
Ngeren mba shin kpe
^ Nenge Ngeren u Pasen Asember.
^ Nenge Ngeren u Pasen Asember.
^ Nenge Ngeren u Pasen Asember.
^ Nenge Ngeren u Pasen Asember, “Gehena.”
^ Zwa Heberu, “na.”
^ Shin “iyou i yan kwagh.”
^ Zwa Heberu, “ken iyan.” Ka imbusutariyan, aluer or ver ishigh sha ityoughkitaregh je la.
^ Ka Uwo u Olev, hemban je yô, ape uwo ne u za bee vegher u ken imbusutariyan la. Shi i yila u kpaa ér Uwo u Isholibo.
^ Nenge Ngeren u Pasen Asember, “Ityôgh ki akombough ki sha kon.”
^ Nenge Ngeren u Pasen Asember.
^ Alaghga ishember i ken zwa Heberu i i gem nahan ne zua vea ishember i “ambi a uile,” u tesen ér kwagh la ndôhôr ishima.
^ Shin “mbaaôndo mba hen ya; ieev.”
^ Talenti môm yange a lu ukilogeram 34.2. Nenge Ngeren u Seer u B14 la.
