Sekaria 14:1-21
14 “Nenge! Iyange ngi van, ka iyange i Yehova, zum u a kar ishar i i ye u* la sha ashe a ou yô.
2 Me kohol akuraior la cii aa va ta ityav sha Yerusalem; nahan a ngohol gar la, shi a ya ishar ken uya, a kighir kasev a yav a mi. Shi a yem a vegher u gar la u môm uikyangen, kpa ior mba vea shi her ken gar la yô, a tim ve kera ga.
3 “Yehova una due a za nôngo ityav a akuraior la,+ er ka a nôngo ityav sha iyange i utya nahan.+
4 Sha iyange la, una sôghor angahar sha Uwo u Olev+ u u lu Yerusalem sha ishi vegher u sha ityoughkitaregh la; nahan Uwo u Olev ua pav hen atô, hii sha ityoughkitaregh* yem shin ityôtar,* maa zegepev una gba hen atô; shi vegher u uwo la u môm una yem ken imbusutarimese, vegher ugen la di una yem ken imbusutariyan.
5 Ne yevese ne yem shin pev u iwo yam, sha ci u pev u iwo la una gbanger zan zan una ar shin Asel. Ne yevese er yange ne yevese tartenger sha ayange a Tor Ushia u Yuda la nahan.+ Nahan Yehova Aôndo wam una va, shi uicighanmbaiorov cii vea lu a na ityô.+
6 “Sha iyange la, iwanger i mondon ia lu ga+—akaa aa kundu.*
7 Nahan ia hingir iyange i môm, i a fa i̱ ér ka iyange i Yehova yô.+ A lu atetan ga, tugh kpa ga; a geman a luun aikighe yô, iwanger ia lu.
8 Sha iyange la, mngerem ma nan uma+ ma a due ken Yerusalem,+ tiôn u môm una kua a yem vegher u zegemnger+ u sha ityoughkitaregh* la, tiôn ugen la di una kua a yem vegher u zegemnger+ u shin ityôtar* la. Kwagh ne una er sha shighe u fam man sha shighe u hir.
9 Shi Yehova una tema Tor sha tar cii.+ Sha iyange la, Yehova una lu Aôndo tswen,+ shi dugh iti na sha yô, igen ia lu ga.+
10 “Tar la cii ua lu er Araba+ nahan, hii hen Geba+ yem Rimon,+ vegher u ken imbusutariyan i Yerusalem la; nahan una mough shi ior vea hide a tema ker,+ hii hen Hunda u Benyamin+ zan zan za ar hen ijiir i Hunda u Hiihii la, shi zan zan za nyôr sha Hunda u sha Zongo la, shi hii hen Iyou i Taven i Hananel+ la zan zan yem hen ahungwa a shoghor wain a tor la.
11 Shi ior vea hide a tema ken a na; shi mayange a kera tim un sha ci u i wa un ifyan ga,+ shi ior vea hide a tema ken Yerusalem bem bem.+
12 “Shi ka bouange u Yehova una ta ior cii, mba vea nôngo ityav a Yerusalem je ne:+ Inyam ve ia hôô er ve til sha angahar a ve la je, shi ashe a ve aa hôô ken ategher, shi iniombor ve kpa, ia hôô ken ijô ve kera.
13 “Sha iyange la, Yehova una va a anzughul kpishi hen atô ve; nahan hanmô ve nana kôr uwegh ku ijende i nan, shi uwegh ku hanmô ve kua hingir num a uwegh ku ijende i nan.*+
14 Yuda kpa una nôngo ityav mbi a lu nôngon ken Yerusalem la; shi a kohol akaa a akuraior a a kase la kpishi+ ijiir i môm, a lu zanaria man azurufa man akondo.
15 “Bouange u lun er bouange u yange vande van la nahan shi una va sha anyinya man mbaalfadari* man urakumi man ujaki, kua sha hanma zendenya u a lu ken afo la cii.
16 “Hanma or u nana shi ken akuraior, a aa va ta num sha Yerusalem la cii, nana zaan hanma inyom+ u za guren inya* sha ishigh ki Yehova u akum a sha,+ un u a lu Tor la, shi nana zaan u za eren Iniongo i Atumbe.*+
17 Kpa aluer ma or ken icombor i i lu shin tar la, za ken Yerusalem u za guren Yehova u akum a sha, un u a lu Tor la inya ga yô, ura ua nôô sha ci u nan ga.+
18 Shi aluer tsombor u ken Igipiti la va ga, shi u nyôr ker kpaa ga yô, ua zua a ura ga. Shi bouange u Yehova una va a mi sha akuraior, a a vende u za eren Iniongo i Atumbe la, una va a mi sha tsombor shon.
19 Ka mtsaha u una lu sha ci u isholibo i Igipiti man isholibo i akuraior cii, a aa venda u zan za eren Iniongo i Atumbe je la.
20 “Sha iyange la, a nger mkaanem man sha amemegh a anyinya ér, ‘Yehova ngu Icighan!’+ Shi atsua* a jiidi kwagh+ a ken iyou i Yehova aa lu er, agbande+ a sha atse a nan nagh la nahan.
21 Shi hanma tsua* u jiidi kwagh ken Yerusalem man ken Yuda una lu icighankwagh shi una lu kwagh u Yehova u akum a sha, nahan mba ve ve u nan nagh la cii, vea jiidi kwagh shin atsua ne agen. Sha iyange la, Orkaanan* nana kera lu ken iyou i Yehova u akum+ a sha ga.”
Ngeren mba shin kpe
^ Ka gar u i ter ken ivur i sha 2 la je la.
^ Shin “ape i iyange i dugh la.”
^ Zwa Heberu, “zegemnger.”
^ Shin “tenger ga,” er kwagh u a ndôhôr a gbe akpo nahan.
^ Ka Zegemnger u Mediterenia je la.
^ Ka Zegemnger u Kuugh je la.
^ Shin “or môm nana ta num sha orgen.”
^ Alfadari ka wan u jaki i unde nyinya a mar yô.
^ Shin “Ajiir a Tsan a Lun Gbem Ga.”
^ Shin “civir.”
^ Shin “atsua a gbanger zwa.”
^ Shin “tsua u gbanger zwa.”
^ Shin a fatyô u kaan ér, “or u eren kpenga.”
