Sekaria 4:1-14
4 Ortyom u lu vanden lamen a mo la hide va, va nderem, er ka i nder or shighe u nan lu yaven nahan.
2 Maa a pinem ér: “Ka nyi u nenge a mini?”
Nahan m kaa mer: “M nenge a daarimenger, i er un sha zanaria+ tseegh, i penda gbande sha mi. Amenger nga sha mi ataankarahar,+ een, ataankarahar je, shi amenger a a lu sha mi la nga a ihyo itiankarihiar.
3 Nahan ikyon i olev ihiar+ lu ikyua a daarimenger la, u môm lu gbande la ken iyan, ugen la di lu gbande shon ken imese.”
4 Tsô m pine ortyom u lu lamen a mo la mer: “Terem, inja i akaa ne ér nyi?”
5 Ortyom u lu lamen a mo la pinem ér: “U fa inja i akaa ne gaa?”
M kaa mer: “Ei, terem, m fa ga.”
6 Nahan a kaa a mo ér: “Ka kwagh u Yehova a kaa ér we u ôr Serubabel je ne: ‘“Ka sha agee a ushoja shin agee a ior ga,+ kpa ka sha jijingi wam,”+ ka kwagh u Yehova u akum a sha a kaa la.
7 We zegewo ne, u ngu nyi je? Ú hingir tar u vaanaa+ sha ishigh ki Serubabel.+ Una va a iwen i sha atô la hen ape ior ve lu ngoron, kaan ér: “Kpilighyol tsôô! Kpilighyol tsôô!” la.’”
8 Shi Yehova ôr kwagh a mo kaa ér:
9 “Serubabel wa ityô i iyou+ ne sha ave a na je, shi una maa i a kure sha ave a na.+ Ka nahan ne fa er i lu Yehova u akum a sha la a tindim hen a ven ye.
10 Ka an nana cihi a laha iyange i mhii u akaa a kiriki?+ Gadia vea ember shi vea nenge a konmnger ken uwegh ku Serubabel. Akaa a ataankarahar ne ka ashe a Yehova, a a lu kenger shin tar cii la.”+
11 Tsô m pine un mer: “Ikyon i olev i ihiar, i i lu daarimenger la ken iyan man ken imese la inja na ér nyi?”+
12 Shi m pine un sha kwa har mer: “Agbaa a ikyon i olev i ihiar, a a lu haan zar u zanaria, u u lu duen ken ihyo i zanaria i ihiar la inja na ér nyi?”
13 Tsô a pinem ér: “U fa inja i akaa ne gaa?”
M kaa mer: “Ei, terem, m fa ga.”
14 A kaa ér: “Mba uhar mban ka mba i shigh ve mkurem, mba ve til vea Ter u tar cii la.”+
