Sekaria 1:1-21
1 Ken uwer u sha anigheni, ken inyom i sha uhar i Dariu+ tema tor la, Yehova kaa a profeti Sekaria,* wan u Berekia,+ wan u Ido ér:
2 “Yange ishima vihi Yehova a uter enev tsung.+
3 “Ôr a ve wer, ‘Ka kwagh u Yehova u akum a sha a kaa ne: “‘Hide nen hen a mo,’ kape Yehova u akum a sha a kaa ne, ‘nahan mo kpa, me hide hen a ven,’+ kape Yehova u akum a sha a kaa la.”’
4 “‘De hingir nen er uter enev mba uprofeti mba tsuaa mbara ôr kwagh ne a ve la ga, ér: “Ka kwagh u Yehova u akum a sha a kaa ne, ‘Undu nen igbenda yen i ifer man aeren a en a ifer la.’”’+
Yehova kaa ér, “‘Kpa ve ungwa ga, shi ve kegh ato a mo kpaa ga’.+
5 “‘Uter enev mba hana hegene? Man uprofeti mbara tsôr kpa?
6 Nahan kpa, mkaanem am man atindi a am, a m ôr mbatomov av uprofeti la kure sha uter enev, vough er m kaa nahan, shin lu nahan ga?’+ Tsô ve hide hen a mo ve va kaa ér: ‘Yehova u akum a sha, er kwagh a vese sha igbenda yase man sha aeren a ase, vough er yange wa ishima u eren nahan.’”+
7 Sha uwer u sha 11, ayange 24, ka uwer u Shebati* je la, Yehova kaa a profeti Sekaria, wan u Berekia, wan u Ido, ken inyom i sha uhar i Dariu+ tema tor la ér:
8 “Yange m nenge a mpase u sha mnenge tugh. Or henda nyinya u nyian, va tile hen atô u ikyon i metur,* shin pev u zan kweng; anyinya a nyian, man a nyian kang man a pupuu gema lu un ken ijime.”
9 Tsô m pine mer: “Terem, ka unô nee?”
Ortyom u lu lamen a mo la gema kaa ér: “Me tese u ior mba ve lu yô.”
10 Maa or u za tile hen atô u ikyon i metur la kaa ér: “Mban ka mba Yehova a tindi ér ve zende shin tar je ne.”
11 Nahan ve kaa a ortyom u Yehova u tile hen atô u ikyon i metur la ér: “Se zende shin tar, man nenge! tar cii huan, shi zayol ngu ga.”+
12 Tsô ortyom u Yehova kaa ér: “Yehova u akum a sha, ú kera zungwe Yerusalem man agar a Yuda mhôônom ga a kuma shighe nan je?+ Gadia ishima vihi u a ve ka anyom 70 je ne.”+
13 Nahan Yehova na ortyom u lu lamen a mo la mlumun sha mkaanem ma kundu kundu man ma surun ishima.
14 Maa ortyom u lu lamen a mo la, kaa a mo ér: “Ôr genger genger wer, ‘Ka kwagh u Yehova u akum a sha a kaa ne, ér: “M ngu a gbashima sha kwagh u Yerusalem man Shion, ka gbashima u vesen je.+
15 Ishima vihim tsung a akuraior a a tem bem bem la,+ sha ci u ishima yange vihim kpuaa,+ kpa ve na kwaghbo seer a seer.”’+
16 “Sha nahan yô, ka kwagh u Yehova a kaa ne: ‘“Me hide hen Yerusalem me va zungwe un mhôônom,+ nahan a maa ya wam ken a na,+ shi a naregh kor u karen kwagh a mi sha Yerusalem,”+ ka kwagh u Yehova u akum a sha a kaa ne.’
17 “Shi ôr kwagh genger genger kaa wer, ‘Ka kwagh u Yehova u akum a sha a kaa ne, ér: “Erdoo una hide a ngee ken agar a am; shi Yehova una hide a sur Shion ishima,+ shi una hide a tsua Yerusalem.”’”+
18 Tsô m kenden ashe sha yô, m nenge a akor anyiin.+
19 Nahan m pine ortyom u lu lamen a mo la mer: “Ka nyi akaa nee?” A kaa a mo ér: “Ka akor a yange sambe Yuda+ man Iserael+ man Yerusalem je ne.”+
20 Yehova maa tesem mbafantomaveegh iorov unyiin.
21 Tsô m pine mer: “Mban ne mba van vea va er nyi?”
A kaa ér: “Mban ne ka akor a yange sambe Yuda je yô, or môm fatyô u moughon ityough sha ga je ne. Mbagen mban ne di vea va ta ve mciem iyol, sha er vea zôhô akor a akuraior, a yange kende akor a ve sha tar u Yuda sha u vea sambe un la.”
Ngeren mba shin kpe
^ Inja na yô ér, “Yehova umbur.”
^ Nenge Ngeren u Seer u B15 la.
^ Kon ne ka u engem ahu, shi u lu a ufaluwa mba pupuu mba human doon.
