Sekaria 8:1-23
8 Yehova u akum a sha shi ôr kwagh, kaa ér:
2 “Ka kwagh u Yehova u akum a sha a kaa ne, ér: ‘Me tese gbashima sha kwagh u Shion, man a lu gbashima u vesen je,+ shi me tese gbashima sha kwagh na a ishima i vihin tsung.’”
3 “Ka kwagh u Yehova a kaa ne, ér: ‘Me hide ken Shion,+ shi me tema ken Yerusalem;+ nahan a yila Yerusalem ér gar u mimi,*+ man uwo u Yehova u akum a sha ér, icighanwo.’”+
4 “Ka kwagh u Yehova u akum a sha a kaa ne, ér: ‘Nomso man kasev mba been iyol vea hide a tema hen ityembe i Yerusalem, hanmô ve a gbough ku nan ken uwe sha ci u ve tsa anyom kpishi.*+
5 Shi mbayev mba nomso man mba kasev kpishi vea lu numben hen ityembe i gar la.’”+
6 “Ka kwagh u Yehova u akum a sha a kaa ne, ér: ‘Er sha ayange la alaghga ior mba vea shi ken ior mban vea nenge ér kwagh ne ka kwagh u ican nahan kpa mo yô, a lum kwagh u ican ga,’ kape Yehova u akum a sha a kaa la.”
7 “Ka kwagh u Yehova u akum a sha a kaa ne, ér: ‘M ngu duen a ior av ken tar u sha ityoughkitaregh man u shin ityôtar la kera.*+
8 Nahan me va a ve vea va tema ken Yerusalem;+ shi vea hingir ior av, nahan me hingir ve Aôndo+ u mimi* man u perapera.’”
9 “Ka kwagh u Yehova u akum a sha a kaa ne, ér: ‘Ave a en a taver,*+ ne mba hegen ne lu ungwan akaaôron ne sha ijô i uprofeti la,+ ka akaaôron shon a yange i ôr sha iyange i i wa ityô i iyou i Yehova u akum a sha, sha u maan tempel je la.
10 Cii man shighe la yô, injar lu sha ci u or shin zendenya ga;+ shi or môm lu fantyô u duen shi nyôron ken bem ga, sha ci u orhyom; gadia m gema ior cii hingir ihyom ayol a ve.’
11 “Yehova u akum a sha kaa ér: ‘Kpa hegen yô, me kera er kwagh a ior mba ve shi ken ior mban ne, er sha ayange a tsuaa la nahan ga.+
12 Gadia a lôô ivor i bem; shi itinekon u wain ua ume atam, shi tar ua na iyiav,+ shi usha vea na avure; nahan me na mba ve shi ken ior mban ne vea ya dyako u akaa ne cii.+
13 Shi we ya u Yuda man ya u Iserael, er yange i wa ne ifyan ken akuraior nahan,+ kape me yima ne shi me na ne hingir iveren+ je la. De cie nen ga!+ Ave a en a taver.’*+
14 “Gadia ka kwagh u Yehova u akum a sha a kaa ne, ér: ‘“Er yange m kange ishima u van a kwaghbo sha a ven, sha ci u uter enev na ishima vihim je, m kera vaa afanyô ga+ la nahan,” ka kwagh u Yehova u akum a sha a kaa ne,
15 “kape m kange ishima hen shighe ne u eren kwagh u dedoo a Yerusalem man ya u Yuda+ je la. De cie nen ga!”’+
16 “‘Ka akaa a i gbe u ne er je ne: Ôron nen kwagh u mimi ayol a en,+ shi ôron nen ajir hen ihindagar yen sha mimi man ken bem.+
17 Shi de henen nen ken asema a en, er ne er mbagenev kwaghbo ga,+ shi ibumun i aiegh+ i môm i de doon ne ishima ga; sha ci u akaa ne cii m kôr a ihyom,’+ kape Yehova a kaa la.”
18 Shi Yehova u akum a sha ôr kwagh a mo, kaa ér:
19 “Ka kwagh u Yehova u akum a sha a kaa ne, ér, ‘Kwaghyan u hôron u uwer u sha unyiin+ man kwaghyan u hôron u uwer u sha utaan+ man kwaghyan u hôron u uwer u sha utaankaruhar+ man kwaghyan u hôron u uwer u sha pue+ cii, vea lu ashighe a msaanyol man a ember sha ci u ya u Yuda—vea lu uiniongo mba ember.+ Nahan mimi man bem ve doo ne ishima.’
20 “Ka kwagh u Yehova u akum a sha a kaa ne, ér: ‘Shighe ngu van u ior man mba ve tem ken agar kpishi la vea va hen gar ne;
21 nahan mba ve tem hen gar ngun vea yem hen ior mba ve tem ken gar ngura, vea za kaa ér: “Se za zamber nen Yehova tsung, a zungwe se mhôônom, shi se ker Yehova u akum a sha. Mo kpa m ngu zan.”+
22 Shi ior kpishi man akuraior a ageegh aa va u va keren Yehova u akum a sha ken Yerusalem+ shi zamber Yehova ér a zungwe ve mhôônom.’
23 “Ka kwagh u Yehova u akum a sha a kaa ne, ér: ‘Sha ayange la, iorov pue mba ken ijô i akuraior+ cii vea kôr, een, vea kôr ikyondo i Oryuda* gbang, vea kaa ér: “Se soo u zan vea ven imôngo,+ sha ci u se ungwa ser Aôndo ngu a ven.”’”+
