Sekaria 7:1-14
7 Tsô sha inyom i sha unyiin i Tor Dariu tema tor la, Yehova ôr kwagh a Sekaria+ sha iyange i sha unyiin, i uwer u sha utaankarunyiin, ka uwer u Kiselev* je la.
2 Ior i Betel tindi Shareser man Regem-meleki vea nomsombaiorov nav ér, ve̱ za zamber Yehova a zungwe ve mhôônom,
3 ve̱ pine upristi mba ken ya* u Yehova u akum a sha man uprofeti ér: “M vaa ken uwer u sha utaan+ shi m hôr kwaghyan, er m vande eren ken anyom kpishi a a kar la nahanaa?”
4 Shi Yehova u akum a sha ôr kwagh a mo, kaa ér:
5 “Ôr ior mba ken tar la cii, kua upristi wer, ‘Shighe u ne lu hôron kwaghyan shi ne lu vaan, zungwen ken uwer u sha utaan+ man ken uwer u sha utaankaruhar zan zan anyom 70 la,+ mimi je lu sha ci wam ne lu hôron kwaghyan yee?
6 Gema shighe u ne lu yan kwagh shi man kwagh la, lu sha ci wen ayol a en ne lu yan kwagh shi man kwagh gaa?
7 Yange gba u ma ne ungwa akaa a Yehova ôr sha ikyev i uprofeti mba ngise+ mbara gaa? Hen shighe ne, ior lu ken Yerusalem man agar a a kase un la, shi bem gba, shi ior lu ken Negebi man ken Shefela kpaa.’”
8 Shi Yehova ôr kwagh a Sekaria, kaa ér:
9 “Ka kwagh u Yehova u akum a sha a kaa ne ér, ‘Ôron nen ijir sha mimi+ shi doo nen ayol a en tsung+ shi zungwen nen mhôônom.
10 De nyighen nen kwasecôghol shin wan u a lu a ter ga,*+ shin shiror+ shin icanor+ kpaa ga; shi de henen nen ken asema a en, er ne er mbagenev ifer ga.’+
11 Kpa ve zer vendan u keghen ato,+ shi ve gema ijime a mo sha apera,+ shi ve cir ato a ve sha er vea ungwa ga yô.+
12 Ve taver ityough*+ shi ve venda u kuran tindi* shi dondon akaaôron a Yehova u akum a sha tindi sha jijingi na, sha ikyev i uprofeti mba ngise la.+ Sha nahan yô, ishima vihi Yehova u akum a sha tsung.”+
13 “Yehova u akum a sha kaa ér, ‘Er yange m yila ve kpa ve kegh ato ga yô,+ ve kpa vea yilam me kegh ato ga.+
14 Maa m sambe ve sha zegeuraahumbe, ve yem ken akuraior a ve fa a ga la cii,+ nahan ve undu tar la hingir ice, or môm lu karen ker shin hiden ker ga;+ sha ci u ve gema tar u doon la hingir kwagh u cieryol.’”
