Sekaria 12:1-14
12 Kwaghyôôn:
“Ka kwagh u Yehova a ôr sha Iserael je ne,” kape Yehova a kaa la,Un u a naregh usha,+Un u a we imaagh ki tar,+Shi a ne or iôôn* i uma la.
2 “Me gema Yerusalem una hingir iyongo, i ia* na ior mba ve kase un la cii vea zende ze-ze-ze yô; shi a wa Yuda man Yerusalem cii atô a ningir a tser.+
3 Sha iyange la, me er Yerusalem una hingir iwen i yuhwan* hen ior cii. Mba vea kende a i sha cii vea vihi iyol kehelee;+ shi akuraior a shin tar cii aa kohol aa va num sha a na.”+
4 Yehova kaa ér: “Sha iyange la, me ta hanma nyinya mciem iyol shi me ta orhendan i ihyundugh. Me ver ashe a am sha ya u Yuda, kpa me pir anyinya a ior cii ashe.
5 Nahan mbahemen uipyaven mba ken Yuda vea kaa ken asema a ve ér, ‘Mba ve tem ken Yerusalem la, nam agee sha ikyev i Yehova u akum a sha, u a lu Aôndo ve la.’+
6 Sha iyange la, me er mbahemen mba uipyaven mba ken Yuda vea hingir er akaausu a kpenger kpenger a a lu hen atô u ikyon nahan, man er ikyaghusu i i lu hen atô u aile a samuyia a i sondo la nahan,+ shi vea ya ior mba ve kase ken iyan man ken imese la cii;+ shi ior vea hide a tema ken Yerusalem hen ijiir i i lu i na jim jim la, ka ken Yerusalem je la.+
7 “Shi Yehova una hii yiman utenti mba Yuda sha er mdoom ma* ya u Davidi man mdoom ma* ior mba ve tem ken Yerusalem la, ma a hemba ngeen a mdoom ma Yuda ga yô.
8 Sha iyange la, Yehova una lu perutya u mba ve tem ken Yerusalem cii;+ shi sha iyange la, or u nana nôngo gbeev* ken a ve la, nana lu er Davidi nahan, shi ya u Davidi una lu er Aôndo nahan, man er ortyom u Yehova u a hemen ve gbenda la nahan.+
9 Shi sha iyange la, me tim akuraior a a va ta num sha Yerusalem la cii, a bunde ga.+
10 “Me haa jijingi wam sha ya u Davidi man sha mba ve tem ken Yerusalem la, nahan me lumun ve shi vea er mbamsen mba zamber mo, shi vea kenger sha un u ve kuma un la,+ shi vea vaa un, er vea vaa wan ve u môm môm nahan; shi vea zungwe tsung sha kwagh na, er vea zungwe sha kwagh u wan ve u iunda nahan.
11 Sha iyange la, a vaa ken Yerusalem tsung, er yange i vaa ken Hadadi-rimon shin Pev u Megido+ la nahan.
12 Tar la ua vaa, hanma tsombor ua za vaa kwagh u ú; hanma or hen ya u Davidi nana vaa, nomso vea vaa kposo, kasev kpa nahan; shi hanma or hen ya u Natan+ nana vaa, nomso vea vaa kposo, kasev kpa nahan;
13 hanma or hen ya u Levi+ nana vaa, nomso vea vaa kposo, kasev kpa nahan; shi hanma or hen tsombor u Shimei+ nana vaa, nomso vea vaa kposo, kasev kpa nahan;
14 hanma tsombor u ua mase shin cii ua vaa, nomso vea vaa kposo, kasev kpa nahan.
