Sekaria 5:1-11
5 Shi m kenger sha yô, m nenge a ihyurenruamabera lu purugh.
2 Ortyom la pinem ér: “Ka nyi u nenge a mini?”
M kaa mer: “M nenge a ihyurenruamabera ngu purugh; ilihen na ngi aseva 20,* igbanger na di aseva 10.”
3 Nahan a kaa a mo ér: “Ngun ka ifyan i i dugh, i lu zan hanma ijiir sha tar cii je ne, sha ci u hanma or u nan ii+ yô, i tsaha nan ga, er i nger sha vegher na u môm la nahan; shi hanma or u nan bum+ yô, i tsaha nan ga, er i nger sha vegher na ugen la nahan.
4 Yehova u akum a sha kaa ér, ‘M tindi ifyan la due yem, shi ia nyôr ken ya u ormbaiv man ken ya u or u nan bumun sha aie ken iti yam la; nahan ia lu ken iyou la, ia vihi i vindi vindi kua ikyon man awen a i cii.’”
5 Tsô ortyom u lu lamen a mo la kporom, kaa a mo ér: “Wea lumun yô, kenger sha, nenge kwagh u a lu duen yemen la.”
6 Nahan m pine mer: “Ka nyi la?”
A kaa ér: “Ka ikyagh ki efa,* u a lu duen yemen je ne.” Shi a kaa ér: “Ka mluashe ve sha tar cii je ne.”
7 Shi m nenge i bugh kuur u lun gbilititi, u i er un sha inyelegh yô, kwase tema lu shin ikyagh ki shon.
8 Tsô a kaa ér: “Ngun ka Iferkwagh je ne.” Nahan a kighir kwase la hide nyôr shin ikyagh ki efa la, maa a daa kuur la fese a cir sha ikyagh ki efa shon.
9 Tsô m kenden ashe sha yô, m nenge kasev uhar lu van, ve lu purugh ken ahumbe van fiing. Ve lu a akper er ayamcambem nahan. Nahan ve tôô ikyagh kira ve lu karen hen atô u tar man sha.
10 Tsô m pine ortyom u lu lamen a mo la mer: “Mba yemen a ikyagh ki efa la hana?”
11 A kaa ér: “Mba yemen a mi ken tar u Shinar*+ u za maan un ya; a maan a been yô, a za ver un hen ijiir na, ape i doo u una lu la.”
Ngeren mba shin kpe
^ Ishiva i môm ka usentimita 44.5. Nenge Ngeren u Seer u B14 la.
^ Zwa Heberu, “Ka efa.” Efa u i lu ôron kwagh na heen ne, ka ikyagh shin ikyese i karen efa a mi. Efa môm yange a lu ulita 22. Nenge Ngeren u Seer u B14 la.
^ Ka Babilonia je la.
