Se sôn ser ior kpishi ma ve ungwa icintan yase ne, shi ma ve va civir Yehova a vese imôngo hegen. Kpa mba ve vende u keghen ato a vese hegen kua ior asev mba doon se ishima mba ve civir Yehova ga la di ye? Alaghga mbagenev mba vea nenge mtim u Zegebabilon ve vea gema asema la, Yehova una yima ve. Aluer ka nahan yô, hemba kan hange hange u se za hemen u tan ve icin hegen cii. Alaghga akaa a se lu pasen ve hegen ne vea va umbur a hen shighe la. (Nenge Esekiel 33:33.) Alaghga vea hide vea umbur akaa a yange se lu tan ve icin sha mi la, nahan vea va kohol se ken mcivir u mimi ne cii ve tso a kua a kar ihyongo ye. Ve mbagenev mba ve vende loho wase hegen ne alaghga vea va gema ishima shighe u vea nenge mtim u Zegebabilon la, vough er or u kuran purusu u ken Filipi yange gema ishima shighe u nenge “tar tenger sha utaha tsung” la nahan.—Aer. 16:25-34. w24.05 17 ¶9-10

Se hen kwagh u injaa ugen ken kwagh u apostoli Paulu nger hen Mbakristu mba ve lu Mbaheberu yô. Ve mbagenev yange ve de ijende i ve ya vea Yehova la kera taver ga; ve “hide [ve] hingir mba i gbe u a na ve atumba, a lu kwaghyan u [ken jijingi u] taver ga yô.” (Heb. 5:12) Yange ve venda u henen akaa a he a Yehova lu tesen ve sha ikyev i tiônnongo la. (Anz. 4:18) Ikyav i tesen yô, Mbayuda mbagenev kpishi yange ve lu kuran Atindi a Mose her, shin er nagh ku Yesu yange na la ku kar a Atindi a Mose kera anyom kar kuma 30 nahan kpaa. (Titu 1:10) Er anyom kar 30 yô, kuma u Mbakristu mba ve lu Mbayuda mban vea kav er i lu u vea kera kuran Atindi a Mose ga yô! Nahan Paulu lu nôngon ér una wase ve ve fa atesen a zan shimi a un lu tesen ve la. Washika na ne yange wase ve u fan er gbenda u he u Yehova tese ér i civir un ken iti i Yesu la, u hembe doon yô. Shi kwagh la yange wase ve u taver ishima pasen kwagh shin er Mbayuda mbagenev lu hendan a ve nahan kpaa.—Heb. 10:19-23. w24.04 6 ¶15

Hii shighe u Adam man Ifa yange ve kohol Satan ve hemba Aôndo ato la zan zan hegen, uumace kpe kuma ubiliôn imôngo. Ka nyi i lu keghen ve cii? Mbadondon Yesu mbajighjigh mbagenev kpuaa, mba ve kom iorov 144,000 la, a nder ve vea yem sha vea za zua a uma u kpen ga la. (Mpa. 14:1) Nomso man kasev mbajighjigh kpishi mba Yehova a doo ve ishima la cii vea lu ken ‘mbaperapera mba a nder ve shin ku’ la, nahan vea lu uma shin tar gbem sha won, aluer ve za hemen u lun mbaperapera hen shighe u Hemen u Kristu u Anyom Dubu la man ikyaren i masetyô la yô. (Dan. 12:13; Heb. 12:1) Shi hen shighe u Anyom Dubu la a na “mbaperapera ga,” ka mba yange ve civir Yehova ga, shin ve “er akaa a bo la” je kpaa ian i geman hingir mbacivir Yehova Aôndo sha mimi. (Yoh. 5:29; Luka 23:42, 43) Nahan kpa, uumace mbagenev yange ve wa ifer gande, nahan Yehova kure kwagh ve ér una va nder ve shin ku ga kuaa.—Luka 12:4, 5. w24.05 2 ¶3; 5 ¶15; 6 ¶17

Or u nan soo ér Yehova a lumun nan ken tenti na yô, gba u nana “[ôron] mimi ken ishima i nan.” (Ps. 15:2) Inja na yô, gba u se palegh u eren aie tseegh ga. Yehova soo ér se ôron shi se eren hanma kwagh cii sha mimi. (Heb. 13:18) Kwagh ne ka kwagh u vesen sha ci u “or u ayomough ndôhôr Yehova ishima, Kpa mbamimi yô ka a ya ikyar a ve kôôsôô.” (Anz. 3:32, ) Mba ve ‘ôron kwagh sha mimi ken asema a ve’ yô, mba ungwan imo i Yehova shighe u ior ve lu nengen a ve tseegh, geman eren akaabo myer ga. Mba eren iferkwagh ga. Iferor ka nan hii u nengen ér ka hanma shighe i gbe u nana kura atindi a Yehova ga. (Yak. 1:5-8) Alaghga nana per atindi a Yehova a nan nenge ér ka a kiriki yô. Aluer nan nenge ér kwaghbo due ken atindi a nan per la ga yô, alaghga nana hii u eren akaa a vihin hemban a ngara je kpaa. (Orpa. 8:11) Kpa se yô, se soo ser se eren kwagh sha mimi hanma shighe cii. w24.06 10 ¶7-8

Mimi u a lu ken Mkaanem ma Aôndo la doo ior mba Yehova ishima. Hanma kwagh u se ne jighjigh a mi cii due ka ken Mkaanem ma Aôndo. (Rom. 10:17) Se na jighjigh ser Yehova ver tiônnongo u Kristu ér a lu “ityôgh man imaagh ki ki sue mimi yô.” (1 Tim. 3:15) Satan soo ér se de ne kwagh u Bibilo i ôr kua kwagh u nongo u Yehova u ôr la jighjigh ga. (Ef. 4:14) Ica a gba ga tsô Diabolo una er mbaaie mba vea na tar cii ua mough num a Yehova yô. (Mpa. 16:13, 14) Shi se fa ser Satan una er tom kpoghuloo sha u tsughun ior mba Yehova. (Mpa. 12:9) Sha nahan yô, gba u se tsaase iyol yase u fan mkposo u mimi a mbaaie mba Satan a eren la shi se dondon kwagh u a lu u mimi la. (Rom. 6:17; 1 Pet. 1:22) Saa se er nahan ve se fatyô u va waren zegecan u a lu van la ye! w24.07 8 ¶1-3

Yehova yange ne Mbaiserael atindi a na yô, ve lumun ér vea kuran a. Lu u vea kuran atindi a na yô, una na ve iveren shi una kuran ve. Kpa aluer mba kuran atindi a na ga, shin ve tsua u za civir mbaaôndo mbagenev yô, una de u kuran ve, nahan vea ya ican. Nahan kpa, a tese ér Aôndo ta ve kera kuaa ga. Lu u vea soo yô vea “hide hen Yehova, Aôndo [ve, vea] ungwa imo Na.” (Dut. 30:1-3, 17-20) Inja na yô, vea fatyô u geman ishima. Lu u vea er nahan yô, Yehova una kporom hen a ve shi una hide a ver ve doo doo. Ior mba Yehova tsua ne, yange ve hemba un ato acin imôngo. Akaa ne na yô ve ya ican. Kpa Yehova hungur a ior nav mba hemban ato mban ga. Yange tindi uprofeti acin imôngo ér ve za ta ior nav icin ve gema asema ve hide hen a na.—2 Utor 17:13, 14. w24.08 9 ¶4-5

Mbaheberu mba ken Yerusalem man Yudia mba ve lu Mbakristu la tagher a mbamtaver kpishi. Yange mba veren tiônnongo u Kristu ica gbe ga yô, ior mough u tôvon ve a ican kpoghuloo. Anyom nga karen er 20 nahan yô, Mbakristu mban shi nyôr ken ibanave kpishi sha ci u ijen gba ken tar ve. (Aer. 11:27-30) Kpa er ken inyom i 61 la nahan, i lu tôvon Mbakristu mban a ican, kpa lu u ken hemen a va tôv ve a ican a hemba nahan. Lu hen shighe ne, Yehova mgbegha apostoli Paulu nger ve washika ye. Washika la yange lu a akaawan a aa wase ve u wan iyol sha kwagh u ica a gba ga tsô vea tagher a mi la. Washika u Paulu nger Mbaheberu la yange va sha shighe kpishi, sha ci u bem u ve lu ker la lu u una tsa ga tsô una bee. Paulu yange ôr ve akaa a aa wase ve u wan ishima a ican i lu u ica a gba ga tsô vea tagher a mi la yô. w24.09 8 ¶1-2

Shighe u se lu yan ican yô, anmgbianev asev mba nomso man mba kasev mba Yehova a ne se la ka kwagh ugen u Yehova a er a vese u tesen ér se doo un ishima yô. Vea fatyô u surun se ishima shighe u ve lu vea vese imôngo yô, shi vea kegh ato a vese zum u se lu pasen ve er i lu se ken ishima la kpaa. Shighe ugen vea ôr se ma ivur Bibilo i ia taver se ishima yô, shin vea er se msen. (Rom. 15:4) Ashighe agen yô, anmgbian u nomso shin u kwase nana umbur se er Yehova a nengen se yô, nahan kwagh la una wase se se za hemen u wan ishima. Shi anmgbianev asev mban ka ve wase se sha igbenda igen kpaa. Vea fatyô u nan se kwaghyan shighe u ishima i lu vihin se yô, ér i lu se ken ishima kposo. Ashighe agen yô, a gba u se ôr mbagenev ser ve wase se. (Anz. 17:17) Kpa alaghga vea fa er i lu se ken ishima ga, shin vea fa kwagh u a gbe se ga. (Anz. 14:10) Aluer ishima ngi vihin we yô, u fatyô u lamen a azende a ou a u nenge wer aa wase u la, pasen ve er i lu u ken ishima la. Pase ve iwasen i u soo la. U fatyô u lamen a ortamen môm gayô mbatamen uhar mba u hemba lun kôôsôô a ve yô. Anmgbianev mba kasev mbagenev nenge ér ka vea lam a anmgbian u kwase u nan civir Yehova ica i gbe yô, ve zua a msurshima. w24.10 10 ¶15-16

Ior kpishi ka ve nôngo ér vea ya kwaghyan u injaa, shi ve eren anumbe sha er iyol ve ia lu gbang gbang shi vea tsa kpishi yô. Nahan kpa, ve fa er i lu akaa ne aa wase ve u lun uma gbem sha won ga yô. Alaghga kwagh ne una na vea hen ér or a fatyô u lun uma gbem sha won ga. Nahan kpa, Yesu yange ôr ér or a fatyô u zuan a “uma u tsôron,” er Yohane 3:16 man 5:24 a tese nahan. Yesu yange na ior udubu imôngo beredi man ishu sha ivande ve ya kuma ve. Kwagh ne lu kwagh u kpilighyol kpishi, kpa kpernan sev mbu aven yô, Yesu ôr kwagh ugen u hemban kpilighyol cii. A ôr a ikpelaior i i dondo un ijime i va ken Kapernahum, ikyua a kpe u zegemnger u Galilia la ér un ngu va nderen mbakpenev shi vea lu uma gbem sha won. (Yoh. 6:39, 40) Kwagh u Yesu ôr la tese ér a va nder ior kpishi shin ku, shi tese ér we man mba hen tsombor wou cii, ne fatyô u va lun uma gbem sha won! w24.12 8 ¶1-2

Semberee ne, mba timen sha akaa tôv sha zayol ne, nahan ve nenge ér noov kpishi ka ve eren tswam a kasev vev, shin ve lamen a ve côu côu, gayô ve nzughul a ve sha igbenda igen. Nom u nan eren kwagh a kwase u nan nahan yô, alaghga nana eren kwagh a kwase u nan sha icivir sha ashe a ior, kpa nana gema a nzughul a nan ken ya. Er nan ve noov mbagenev ve nzughul a kasev veve? Alaghga mbagenev uter vev yange ve eren tswam a ungô vev, nahan adooga tsô ve hen ér u eren tswam a kwase la ka kwaghbo ga. Ior mbagenev mba eren tswam a kwase sha ci u ve nenge kape ior kpishi ve eren hen ijiir ve je la. Alaghga orgen nana hen ér ka er nana nyian ashe a kwase u nan la ve kwase la nana fa ér nan ngu orya ye. Nomso mbagenev yô, i tese ve u kôron iyol tsaha ga, er u kighir ishimanyoon nahan. Nomso mbagenev di yô, ka ve nengen ufoto mba ijimbagh hanma shighe,  nahan ve kera lu a mnenge u vough sha kwagh u kwase, man u yaven a nan la ga. Heela tseegh ga, mbatôvon sha akaa kpishi nenge ér sha shighe u angev mbu Korona la, noov kpishi gema eren tswam a kasev vev. Nahan kpa, gba u mayange nom nana nzughul a kwase u nan sha ma ityôkyaa ga. w25.01 8 ¶2-3

Yesu yange pase tindi u a hembe lun u vesen ken atindi Aôndo la shighe u kaa ér: “Yehova Aôndo wou a̱ doo u ishima kpee je, a ishima you cii man a uma wou cii man a agee a ou cii man a mhen wou cii,’ shi ‘or u nan we ndor a we nana̱ doo u ishima kpee je, er iyol you nahan.” (Luka 10:27) Nahan gba u Yehova una doo se ishima a hanma kwagh wase, man sha hanma gbenda cii. Kwagh ne wa agee a ase man asaren a ase man mlu wase u ken ishima kua gbenda u se henen kwagh la cii ker. Nahan kpa, mayange se fatyô u kaven gbenda u Yehova a henen kwagh la cica cii ga. Kpa se fatyô u fan gbenda u Aôndo a henen kwagh la sha u fan “mhen u Kristu,” sha ci u Yesu fa gbenda u Ter na a henen kwagh la vindi vindi, shi henen kwagh er Ter na nahan.—1 Kor. 2:16. w25.03 8 ¶1

Yesu yange lu a myen ga er Adam, or u hiihii la yange lu cii ve er isholibo la nahan. (1 Kor. 15:45) Nahan er Yesu kpe sha ci wase yô, yange kimbi injar i vough i lu u a kimbi ve a hide a kwagh u Adam yange ta kera la yô. (Rom. 5:19) Yesu maa hingir “Adam u masetyô.” Nahan ityôkyaa kera lu i orgen u nan lu a myen môm ga nana va na nagh u kimbin kwagh u Adam ta kera la ga. Yesu yange kpe “kwa môm” tseegh. (Heb. 7:27; 10:12) Nahan ka mkposo u nyi a lu hen atô u iwom i yange i naan la man ipaan? Iwom i yange i naan la ka kwagh u yange Aôndo er u hiden sôron mlu na u dedoo vea uumace yô. Ipaan ka injar i yange i kimbi sha er a fatyô u nan iwom sha ci u uumace mba yinan ne yô. Yesu yange na uma na u vough la sha u paan se, nahan a kimbi injar i vough sha asorabo a ase.—Heb. 9:14. w25.02 5 ¶12-13

Aluer se mba nengen Yehova ser ngu kpôô kpôô yô, kwagh la una wase se u nengen mbamzeyol asev sha gbenda u vough. Nena yô? Shighe u se tagher a zayol yô, gba u se hemba veren ishima sha kwagh u a lu hange hange ne. Satan senge ér aluer se tagher a mbamzeyol yô se de u civir Yehova. Nahan kwagh u ka sea tagher a zayol ve se er la ka a bende a Yehova. (Yobu 1:10, 11; Anz. 27:11) Ka sea tagher a mbamzeyol kpa sea za hemen u civir Yehova sha mimi yô, se tesen ser Yehova doo se ishima, Diabolo gema ka oraie. Alaghga gomoti ngu hendan a ior mba Yehova hen ape u lu la, gayô u ngu yan ican sha kwagh u inyar, shin ior mba vendan loho u dedoo u u lu pasen ve la, shin u ngu yan ican sha igbenda igen. Aluer kwagh ngu nahan yô, umbur wer mlu u u nyôr ker la bugh u gbenda u eren kwagh u una na a saan Yehova iyol yô. Shi umbur wer, una de er imeen i hemba u ga. Una na u agee a wan ishima. w24.06 22 ¶9

U fa kwagh u a fatyô u meen we sha mi fele yô? Aluer se fa ma myen wase kpa se er kwagh sha mi ga, shin se nenge ser se taver gande u gban ken imeen yô, a lu kwaghbo. (1 Yoh. 1:8) Umbur wer Paulu kaa ér mba ve “taver ken jijingi la” je kpa, aluer ve wa ikyo ga yô, vea fatyô u gban ken imeen. (Gal. 6:1) Gba u se lumun ser se yina sha avegher agenegh shi se fa ajiir a se taver ga la kpaa. (2 Kor. 13:5) Se faan akaa a aa na se gba ken imeen fele la yô, ka nyi i gbe u se ere? Nôngo kpoghuloo sha er u hemba imeen yô! Ikyav i tesen yô, sha ashighe a i ngeren Bibilo la, yange i lu sha ihindagar mbaihyomov ve za hii tan ityav sha gar ye. Sha nahan yô, yange i ver mbakuran kpishi sha hundagar sha er a kura gar yô. Se kpa gba u se hemba veren ishima sha akaa a se nenge ser a fatyô u meen se sha mi fele la.—1 Kor. 9:27. w24.07 15 ¶5-7

Tom u dedoo u i ter ken ivur i sha iyange i nyian ne la wa u pasen loho u dedoo kpa ker. Nahan ka sea ôron Mkaanem ma Aôndo shi sea henen sha mi yô, jighjigh u se ne Yehova la a seer taver, shi se nenge er i gbe hange hange u se pase loho u Tartor yô. Cii ve se zua a iwasen ken Mkaanem ma Aôndo yô, gba u se palegh u ôron shin henen ma ayem ayem. Tôô shighe tsembelee hen sha kwagh u u ôr ken Bibilo la. Aluer u ôr ma ivur Bibilo man taver we u kaven yô, de karen i yemen ga. Kpa, seer henen sha kwagh u u ôr la ken Takerada u Tôvon sha Kwagh ú Mbashiada mba Yehova gayô za hen Ijiir i Watchtower a Koson Ityakerada sha Intanet la, sha er u zua a iwanger yô. Aluer u tôô shighe u ngu henen kwagh yô, u seer lun a vangertiôr wer hanma kwagh u Bibilo i ôr cii ka mimi. (1 Tes. 5:21) Ka wea luun a vangertiôr wer Mkaanem ma Aôndo ka mimi yô, i hemba saan we iyol u pasen mbagenev kwagh u u hen la. w24.04 15 ¶4-5

Davidi kaa ér “we Yehova u doo, shi u kegh a kegh iyol u den kwaghbo.” (Ps. 86:5) Mika nger ér: “Ka an nan lu Aôndo er We nahana? Gadia we u den isholibo shi u den aferakaa” (Mika 7:18) Shi Yesaia nger ér: “Iferor nana undu gbenda u nan Shi or u wan ifer nana undu mbamhen mba nan; Nana hide hen Yehova, un u a zungu mhôônom la, hen Aôndo wase, sha ci u una de kwaghbo sha gbenda u vesen.” (Yes. 55:7) Yange gba u tiônnongo u ken Korinte la una ngohol orsholibo u gema ishima la, shi una tese un dooshima ve una lu kaven Yehova ye. Aluer ve er nahan yô, vea lu tesen ér ve mba “ior mba dondon hanma kwagh u i tese [ve] cii.” Shin er i dugh or la ken tiônnongo kera iwer kar kpuaa tseegh nahan kpa, kwagh la wase un gema ishima. Nahan ityôkyaa kera lu i a timbir u hiden a na ken tiônnongo ga. w24.08 17-18 ¶12-13

Se mba hen shighe u akaa a vesen a lu eren yô! Ica a gba ga tsô Yesu una ôr hanma or sha tar cii ijir. Yesu yange pase kwagh u una er sha tar cii ve una mase va ôron ior ijir yô. Yange pase mbahenen nav kwagh u una lu “ikyav” i tesen ér ngu vea vese imôngo “shi mkur u tar ne zurum” yô. (Mat. 24:3) I nger kwaghôron u profeti ne ken Mateu ityough 24 man 25, kua ken Marku ityough 13 man Luka ityough 21. Yesu yange wa se kwagh ken anzaakaa agen atar. Ka injakwagh i iyôngo man ivo, man i anuunaukase a fan kwagh man a lanen kwagh, kua injakwagh i utalenti la. Hanma injakwagh ken anzaakaa ne yô, wase se u fan ér Yesu una va ôr hanma or ijir sha akaa a nan eren la. w24.09 20 ¶1-2

Hen sha kwagh u Yesu Kristu u a ver se ikyav i hemban cii la. Hanma kwagh u yange eren ken uma na cii, lu sha ci u Ter na doo un ishima shi ior kpa doo un ishima. Dooshima la yange na yô, a er tom kpoghuloo shi a er akaa sha ci u mbagenev je kpaa, man i lu akaa a ior mba i nengen ér ve gba kwagh ga la eren yô. (Mat. 20:28; Yoh. 13:5, 14, 15) Aluer awashima wou u lun orshiren tiônnongo la ka sha ci u dooshima yô, Yehova una na u iveren, shi una wase u u kuma u lun orshiren tiônnongo. (1 Pet. 5:5) Ken tar yô, mba ve tesen ér ve gba kwagh la ka i doo ior a ve. Kpa ior mba Yehova yô mba eren nahan ga. Anmgbian u mbagenev ken tiônnongo ve doo nan ishima, er Yesu kpa yange ior doo un ishima nahan la yô, nan keren ér nana hemen mbagenev shin nana lu a tahav sha mbagenev, shin i nengen nan ér nan gba kwagh ga. Aluer i ver anmgbian u nan soo ér mbagenev ve nengen nan ér nan gba kwagh la sha iantom ken tiônnongo yô, alaghga nana nyagh u eren ityom i gban kwagh ga i ka i gba u a er sha u nengen sha iyôngo i Yehova, i i doo un ishima la. Alaghga nana nenge ér nan gande u eren ityom i ngira nahan.—Yoh. 10:12. w24.11 15 ¶6-7

Hanma ijiir sha tar yô, gba u se lu a nomsombaiorov mba ve lu “uiyua” la kpishi. (Ef. 4:8) Wea lu anmgbian u u er batisema yô, u fatyô u wasen sha imba gbenda la kpa? (Anz. 3:27) U soo wer u vese u ar sha ian i orshiren tiônnongo? Man wea vande lun orshiren tiônnongo kera yô, u soo wer u vese u ar sha ian i ortamen laa? U fatyô u nyôôso akaa ken uma wou sha er u wa uwegh shin foom u zan Makeranta u Mbapasen Ivangeli i Tartor la kpa? Makeranta la ua tsaase we, shi ua wase u sha gbenda u Yesu una hemba eren tom a we yô. Aluer u nenge wer u kuma u eren akaa ne ga yô, er msen hen Yehova. Sôn un a na u cighan jijingi na, sha er una wase u u fatyô u eren hanma tom u i ne u cii yô. (Luka 11:13) Se wuese kpishi er se lu a Tor u tangen iyol ga u se doo un ishima shi a fe akaa a a gbe se la, nahan a ne se anmgbianev mba wasen se yô. w24.10 23 ¶16-17

Kpa ior mba Aôndo mba akaa a vihin tsung a lu eren ve la di ye? Shighe una karen yô, mbamzeyol vev mbara vea ‘hungur ve kera, sha ci u i yer ve sha ashe a Aôndo.’ (Yes. 65:16) Yehova una bee a mbamzeyol asev kera, shi shighe a karen yô, se kera umbur er yange mbamzeyol mbara na lu se ken ishima la tsô kpaa ga. Hegen je kpa, ka sea za mbamkombo asev mba Mbakristu yô, i pever se iyol shi se hungur a mbamzeyol mba ve lu ken botar ne la cii. Ka se wase anmgbianev asev mba nomso man mba kasev sha er ve kpa a pever ve iyol sha u lun a aeren a ityamegh ki jijingi er dooshima man iember man bem man erdoo man ishima i legh legh nahan. (Gal. 5:22, 23) Doo se kpishi er se lu ken nongo u Yehova yô! Mba vea za hemen u lun ken paradiso u ken jijingi ne cii vea nenge er Aôndo una kure ityendezwa na i a er u van a “usha mba hev man tar u he” la. w24.04 22 ¶9-10

Er ior ka vea sôôr ayol a ve ve i saan ve iyol nahan kpa, gba u vea fa ér ishiôr ka beerkwagh ga, kpa ka kwagh u vesen u ka i er cii ve i vôso ayol yô. Sha iyange ve i ivesegh la, ka ve tôndo zwa a Yehova ér vea soo ayol a ve shi vea naan ayol a ve icivir sha ayange a uma ve cii. Nahan cii ve se tôndo zwa u eren ma kwagh yô, gba u se hen sha kwagh shon zulee. Man kape kwagh u iceghzwa i ivesegh kpa i lu vough je la. Shighe u ior ve lu sôôr ayol a ve yô, ka ve seer fan ayol a ve, nahan maa ve tsua kwagh u vea er yô. Ashighe agen ka ve tsua u vôson ayol a ve shin den ishiôr la. Aluer ior mba sôôr ayol a ve man ve va nenge ér vea kera za hemen a ishiôr shon ga kpa, ve er kwaghbo ga cii. Kpa ishiôr ve la i kure awashima u i, sha ci u i wase ve u vôson ayol a ve gayô den i. Gba hange hange u nomsoor man kwase vea fa ér ishiôr ka u nôngon fan or sha er u vôso nan yô. Sha nahan yô, gba u vea hii u sôôr or u ve fe dedoo ér ka u vea vôso nan ga ze. w24.05 26-27 ¶3-4

Ashighe agen yô, alaghga a cier mbayev iyol u ôron mbagenev akaa a ve hen ken Bibilo la. Ikyav i tesen yô, alaghga a cier ve iyol u lamen zum u i pine ve ityôkyaa i ve vende u nan jighjigh a ityesen i i kaa ér akaauma cii gba duen iyol i a tsô la. Sha ci nyi? Alaghga atica a wan wou aa ôr ér kwagh u ityesen la i kaa la ka mimi, ka kwaghhir ga. Wea lu ormaren yô, u er nan ve u wase wan wou una lu a vangertiôr ér akaa a nan ne jighjigh a mi la ka a mimi? Wase un a fa wer, er a fe mimi sha kwagh u akaa a igbetar yô, ityôkyaa ngi i una cia ashe ga. Jighilii yô, mbasainsi je kpa kav ér uma yange gba hiin tsô ga, shin akaauma gba duen iyol i a tsô ga. Ve nenge a ikyav i tesen ér mimi je or u fan kwagh nan ngu, u nan gbe akaauma a se nengen a mi, a a we kimi kpelegh kpelegh ne yô. Sha nahan yô, ve na jighjigh a kwagh u akaauma cii gba duen iyol i a tsô la ga. Kwagh ugen u alaghga una wase wan wou u seer nan jighjigh shi cian ashe ga yô, ka u keren fan er i hii ve anmgbianev mba nomso man mba kasev mbagenev ve ne jighjigh ér i gba a gba akaauma la. w24.12 18 ¶14-15

Yesu yange lu a vangertiôr ér ior mbagenev vea lumun u ungwan loho u dedoo. Kwagh la yange wase un za hemen u pasen kwagh saan saan. Ikyav i tesen yô, ken mbee u inyom i 30 la, Yesu nenge er ior kpishi kegh iyol u lumun loho na yô, nahan a tôô ve a kar sha iyiav mbi mbi via, mbi kuma u sundan yô. (Yoh. 4:35) Inyom karen i môm yô, a kaa a mbahenen nav ér: “Sunda ngee.” (Mat. 9:37, 38) Shighe shi va karen yô, a kimbir ôron a mbahenen nav ér: “Sunda ngee . . . Zamber nen Ter u sunda, a tindi mbatomov ken sunda na.” (Luka 10:2) Yange za hemen u nan jighjigh ér ior vea kegh ato a na, nahan a ember shighe u ve er nahan yô. Yesu yange wase mbahenen nav u lun a gbashima. w25.03 18-19 ¶15-16

Yehova ka ijiir yase i yeren. Or ka nan yer ken bar shighe u ura u lu nôôn shi ijeverahumbe i lu karen kpishi yô. Kape Yehova kpa ka a kura se shighe u mbamzeyol ve ta sha a vese je la. Ka a wase se u kuran ijende i se ye vea na la, shi a na se lu a vangertiôr ser ma kwagh u vihin u una bula se a saa her ngu ga. Man u hemban cii yô, a er iceghzwa a vese ér una va kar a hanma kwagh u a ne se ishimanyian man ican i yan la cii kera. (Esek. 34:25, 26) Gbenda môm u se zua a mkor hen Yehova yô, ka u eren msen hen a na. Ka sea er msen hen Yehova yô, a na se ‘bem na’ u ka a kura mhen man ishima yase la. (Fil. 4:6, 7) Yehova kpa una lu sha u yiman se. Se fatyô u suur sha a na sha ci u un “ka vande u tsôron je.” (Yes. 26:3, 4) Una lu uma gbem nahan una kure uityendezwa mba a er a vese la, shi una ungwa mbamsen asev shi una na se agee a kwagh a gbe se a mi la kpaa. Se fatyô u suur sha Yehova sha ci u eren kwagh a mba ve civir un la sha mimi. (2 Sam. 22:26) Una hungur a kwagh u se eren sha ci na la ga, shi una za hemen u veren se doo doo kpaa.—Heb. 6:10; 11:6. w24.06 27 ¶4-6

Akaa a nan msaanyol a bo aa fatyô u nan se hingir ta ta ta. Man kape azende a bo kua uyôughyôughmbaakaav kpa, vea na se hingir ta ta ta je la. Aluer se nenge ser kwagh ngu nan Yehova kera ngu doon se ishima ga yô, gba u se er kwagh sha mi fele. (Mat. 5:29, 30) Gba u se de ser ishima yase i hingir ta ta ta ga. Alaghga se lu henen ser, er se lu civir Yehova sha gbashima yô maa kera gba u se palegh akaabo ga, sha ci u aa fatyô u benden a vese ga. Ikyav i tesen yô, tôô wer oo ta, nahan tsee iyol kpishi. Ka wea soo wer i kundu u iyol yô, u ma mngerem kpishi. Kpa aluer u ma mngerem kpa u gema u ngu ken oo her nahan ka nyi ia er u-we? Imura a hide a kôr u. Kwagh ne tese se nyi? U eren kwagh u una na se seer kporom ikyua a Yehova la tseegh kuma ga. Gba u se kura iyol yase sha er kwagh môm ken tar ne una na Yehova una kera doo se ishima ga ze, vough er ka se palegh u tilen ken oo shighe u iyange i te kpishi nahan.—Ef. 2:2. w24.07 21 ¶6-7

Kwagh ne umbur se ican i Yesu yange ya shighe u shoja i Mbaroma mande un sha kon la. Yange i er kwagh a Yesu caveraa, kpa a wa ishima a mnyoon la. Se fatyô u fan vindi vindi er Yesu yange ya ica za kighir la ga. Shin er Yesu ya ican kpishi nahan kpa, Yehova za hemen u doon un ishima shi lu ungwan imo na. Yange wa ushoja mbara ifyan ga, kpa a er msen ér: “Tere, de ve isholibo ve, sha ci u ve fa kwagh u ve lu eren ga.” (Luka 23:34) Aluer se sôn Yehova ser a wase mba ve lu nzughul a vese la yô, kwagh la una wase se u wan ishima, shi ishima ia kera vihi se kpishi ga. Shi kwagh la una wase se u geman gbenda u se nengen ve la kpaa. Er tar u ifer ne u lu a kar kera ga ne, a fatyô u nzughul a vese ashighe agen. Aluer ka nyi je se tagher a mi kpa, mayange se de u eren msen hen Yehova ser a wase se ga. Shi se dondo gbenda u Yesu er kwagh shighe u mbagenev nzughul a na la. Heela tseegh ga, shi se za hemen u dondon akaawan a Bibilo. Aluer se er nahan yô, se lu a vangertiôr ser Yehova una ver se doo doo.—1 Pet. 3:8, 9. w24.11 6 ¶16; 7 ¶17, 19

Ka hanma ieren cii Yehova a lumun a mi ga. A kôr isholibo ihyom. (Ps. 5:4-6) A ver ishima ér se kuran atindi a na a a lu ken Bibilo la. Nahan kpa, Yehova fa ér se yina nahan se fatyô u kuran atindi a na a mshi shio ga. (Ps. 130:3, 4) Nahan cii kpa, mayange lumun a ‘mba cian Aôndo ga, mba ve gem erdoo u sha mhôôn na la a hingir ve ityôkyaa i eren akaa a ndôhôrshima’ la ga. (Yuda 4) Jim je yô, Bibilo kaa ér “a va tim mba ve vende Aôndo la” sha shighe u ityav mbi Aôndo mbi Armagedon la. (2 Pet. 3:7; Mpa. 16:16) Nahan kpa, Yehova soo ér or môm nana tim ga. Bibilo pase wang ér “sar un u ior cii ve zua a ian i geman ishima.” (2 Pet. 3:9) Mbatamen mba ken tiônnongo ka ve wase orsholibo ér nana undu igbenda i nan i bo la sha er nana hide hen Yehova yô. Ka ve wa ishima a nan hen shighe ne er Yehova kpa a eren nahan. w24.08 26 ¶1-2

Se kpa se fatyô u nan mbagenev akaa a iyolough sha ci u ve doo se ishima, er Yehova kpa a eren nahan. Ikyav i tesen yô, u fa ma anmgbian u nan lu a kwaghyan shin ikyondo ga yôô? Yehova una fatyô u nan nan kwagh u una wase nan u kuren mgbe u nan la sha ikyev you. Ior mba Yehova mba ne mbagenev kwagh mgbeghaa, hemban je yô, shighe u kwagh u vihin a er yô. Ikyav i tesen yô, sha shighe u angev mbu korona la, anmgbianev mba nomso man mba kasev lu nan mbagenev mba ve lu a kwagh ga la akaayan man akondo kua akaa agen. Mbagenev kpishi na iyua mgbeghaa u suen tom u se eren sha tar cii la. Iyua la yange i na yô, i zua a inyaregh ki wasen anmgbianev mba yange kwagh tser ve yô sha tar cii. Yange ve dondo kwagh u i ôr ken Mbaheberu 13:16 ne, ér: “De hungur nen u eren kwagh u dedoo man u nan ior akaa a ne lu a mi la ga, gadia iniav mbin nahan doo Aôndo tsung je.” w24.09 27 ¶6-7

Tôô ase wer, u ngu keren tom u u eren ve u fatyô u nengen sha tsombor wou yô. Ityom gema ngi ihiar i u fatyô u eren yô. U tôv sha hanma tom vighe vighe u fa kwagh u ityom la kua shighe u u yaren kua shighe u a tôô u u moughon hen ya wou yemen hen hanma ijiirtom yô, kua akaa agen kpaa. Ityom ihiar ne cii ka ityom i Bibilo i yange ga yô. Kpa alaghga u hemba soon tom ugen ken ityom i ihiar la, sha ci u mlu u tom shon, shin sha ci u ka tom u a kimbin we zege inyar yô. Nahan kpa, akaa agen nga a a gba u u time sha mi cii ve u mase tsuan kwagh u u er la ye. Ikyav i tesen yô, ityom i ihiar ne cii shighe u i yaren i la zua sha ashighe a tiônnongo wou a nyôron mkombo laa? Ityom la ia fatyô u yan we shighe u ka i gba u u nenge sha mbamgbe mba tsombor wou mba sha iyol kua mba ken jijingi laa? Aluer u pine iyol you mbampin mban yô, kwagh la una wase u u hemban veren ishima sha “akaa a a hembe lun a inja la.” Ka gbenda u civir Yehova la man mbamgbe mba tsombor wou je la, a u eren tom u van we a inyaregh kpishi la. Maa u mase tsuan kwagh u Yehova una haa iveren sha mi yô. w25.01 17 ¶11-13

Aluer mbagenev nzughul a we shin er a we dang kpa, fa wer u doo Yehova ishima shi u gba un kwagh. Aluer iyol kpe u yô, umbur wer Yehova yange nenge a akaa a dedoo ken a we, nahan urugh we va a mi hen a na. (Yoh. 6:44) A kegh a kegh iyol u wasen we sha ci u u doo un ishima kpishi. Aluer se time sha ieren i Yesu yô, kwagh la una wase se u fan er ka i lu Yehova ken ishima la. Shighe u Yesu lu shin tar la, a fa ior mba i nengen ér ve gba kwagh ga la. Yange mhôônom ma kôron a ve, nahan a er kwagh a ve kundu kundu. (Mat. 9:9-12) Kwase ugen yange lu a angev mbu vihin tsung, kpa na jighjigh ér aluer un bende a ikyondo i Yesu yô, angev nav mbua bee. Nahan kwase shon va bende a ikyondo i Yesu, kpa Yesu vihi ishima ga, gema sur un ishima shi wuese un sha jighjigh na la. (Mar. 5:25-34) Yesu eren hanma kwagh vough er Ter na nahan. (Yoh. 14:9) Nahan fa dedoo wer kwagh wou gba Yehova ishima, shi a fa aeren a dedoo a u lu a mi la, kua er un doo u ishima shi u ne un jighjigh yô. w24.10 7 ¶4-5

Davidi yange tagher a mbamzeyol ken uma na kpishi, mba yange ve na ve vaa yô. Yange ior kpishi kôr un ihyom, shi azende a na kua mba hen tsombor na kpa er kwagh a na sha mimi ga. (1 Sam. 19:10, 11; 2 Sam. 15:10-14, 30) A kaa ér: “M kine je m vôr;M heen gambe wam a mliam tugh kaka; Mliam kua sha ikyônough yagh kpaa.” (Ps. 6:6) Er Davidi ya ican ken uma na kpishi nahan kpa, lu a vangertiôr ér un doo Yehova ishima. A kaa ér: “Yehova una ungwa kwelegh wam.” (Ps. 6:8) Ka sea ôr mkaanem ma ken ivur i nyian ne yô, se fa wang ser se doo Yehova ishima kpishi, shi kwagh wase gba un ishima. Yange lu Davidi inja er Yehova ngu haan mliam nam ken ishegh shin ngeren ma ken takeda nahan. Yange Davidi fa wang ér Yehova nenge ican na shi a umbur akaa a vihin a a er un la cii. Davidi lu a vangertiôr ér Ter na u sha u un doo un ishima la fa mbamzeyol nav, man er mbamzeyol mbara bende a na la kpaa. w24.12 22 ¶11-12