Hen Mbaheberu 13:1-25
13 Za nen hemen u doon ayol a en er ne mba anmgbianev mba sha tsombor nahan.+
2 De hungur nen u ngohol ior sar sar ga,+ gadia ka u eren nahan la yange mbagenev nenge sha mbatyomov doo doo kpa ve fa ga ye.+
3 Umbur nen mba ve lu ken purusu* la,+ er i wuhe ne a ve imôngo nahan,+ kua mba i lu nzughul a ve la, er ne ayol a en kpa ne lu ken iyol shon i môm a ve yô.*
4 Ivese i̱ lu kwagh u icivirigh hen ior cii, shi gambe u ivesegh kpa i̱ de hôngor a mi ga,+ gadia Aôndo una ôr mbaeren idya* man mba nzughul a ivese sha idya ijir.+
5 De lu nen ior mba soon inyaregh ga,+ akaa a ne lu a mi la a̱ kuma ne.+ Gadia a kaa ér: “Mayange me undu u ga, shi mayange me kende u ga.”+
6 Nahan se fatyô u lun a vangertiôr taveraa, kaan ser: “Yehova* ka orwasen mo; me cia ga. Ka nyi je or a ereme?”+
7 Umbur nen mba ve lu hemen hen atô wen,+ mba ve ôron ne mkaanem ma Aôndo la, nengen nen kwagh u dedoo u a dugh ken ieren ve la, nahan kav nen jighjigh ve u nan.*+
8 Yesu Kristu gem ga, er nyen lu la, kape nyian kpa a lu je la, shi una lu nahan gbem sha won.
9 I de tsumen a ven sha atesen wue wue ga, sha ci u hemba kan a inja u or a̱ zua a ishimataver sha erdoo u hemban u Aôndo, a u nana̱ zua a mi sha kwaghyan* la, gadia kwaghyan wasen mba ve veren ishima sha mi la ga.+
10 Se mba a atse a nan nagh, a i ne mba ve eren icighantom ken tenti la ian i yan kwagh u a lu sha a la ga yô.+
11 Gadia yange i tôô inyam i uzendenya mba zegepristi a nyer a awambe a ve ken icighanjiir, a za ne nagh ku isholibo a mi la, i due a mi ken afo kera, i za nande ken akôngo.+
12 Sha nahan yô, Yesu kpa yange ya ican ken akôngo a gar,+ sha er una wanger ior sha awambe a a lu a na iyol na yô.+
13 Nahan yô, se za nen hen a na ken akôngoafoogh, se ya nen ihyeen i un kpa yange ya la.+
14 Gadia se mba a gar heen u una lu igbekeke ga, kpa se mba keren u a lu van la sha gbashima.+
15 Se naan nen Aôndo nagh ku iwuese ken a na,+ ka ityamegh ki ityumbujôôgh yase,+ ki ki pasen kwagh u iti na ken igbar la je la, se eren nahan hanma shighe cii.+
16 Heela tseegh ga, de hungur nen u eren kwagh u dedoo man u nan ior akaa a ne lu a mi la ga,+ gadia iniav mbin nahan doo Aôndo tsung je.+
17 Ungwan nen imo i mba ve lu hemen hen atô wen la,+ lumun nen hemen ve,+ gadia mba kuran ne* er ka mba vea va za ôr kwagh u ve er la nahan,+ sha er vea er kwagh ne saan saan, a iyolkpen shio yô, gayô kwagh la una va ne a ican.
18 Eren nen msen sha ci wase her, gadia se na jighjigh ser se mba a imoshima i wang;* sar se u eren akaa cii sha mimi.+
19 Kpa u hemban cii je yô, m ngu kaan a ven mer eren nen msen sha er me hide hen a ven fefa yô.
20 Nahan Aôndo u bem, u a nder Ter wase Yesu, orkuran iyôngo u hemban,+ u a ne nagh sha awambe a ikyuryan i been mayange ga la shin ku la,
21 a̱ wa ne ago iyol sha hanma kwagh u dedoo sha er ne er ishima na yô, shi a̱ er kwagh u a nenge ér a hemba doon la ken a vese sha ikyev i Yesu Kristu. Icivir i̱ lu i na zan zan gbem sha won. Amen.
22 Anmgbianev, m ngu kaan a ven mer, kegh nen ato zulee sha kwaghôron u taver asema ne, gadia m nger ne ka washika u tiônôô tsô.
23 M soo u pasen ne mer i dugh anmgbian wase Timoteu ken purusu kera. Aluer a va fele yô, me lu vea na imôngo zum u me va u va nengen a ven la.
24 Sugh nen mba ve lu hemen hen atô wen la cii man uicighanmbaiorov cii, sha ci wam. Anmgbianev mba ken Italia+ mba sughun ne.
25 Aôndo a̱ za hemen u tesen ne cii erdoo u hemban la.
Ngeren mba shin kpe
^ Zwa Grika, “mba ve lu ken uikyangen.”
^ Shin a fatyô u kaan ér, “inja er ne mba yan ican a ve imôngo nahan.”
^ Nenge Ngeren u Pasen Asember.
^ Nenge Ngeren u Seer u A5 la.
^ Shin “dondo nen ikyav i jighjigh ve u nan.”
^ Ka atindi a sha kwagh u kwaghyan je la.
^ Shin “uuma enev.”
^ Zwa Grika, “imoshima i dedoo.”
