Hen Mbaheberu 4:1-16
4 Nahan, er ityendezwa i nyôron ken mmem na la i lu her yô, se wa nen ikyo,* gayô orgen ken a ven* nana va kuma u nyôron ker ga.+
2 Gadia se kpa i pase se loho u dedoo+ vough er ve kpa yange i pase ve nahan; kpa loho u ve ungwa la lu ve a inja ga, sha ci u ve na jighjigh er mbagenev mba yange ve dondo kwagh u ve ungwa la nahan ga.
3 Gadia ka se mba se ne jighjigh la se lu nyôron ken mmem na ye, vough er a kaa nahan, ér: “Nahan ishima vihim, m bum mer: ‘Vea nyôr ken mmem wam ga.’”+ A ôr kwagh ne, shin er yange er ityom na bee sha shighe u i lu gban tar la nahan kpaa.+
4 Gadia hen ijiir igen la a ôr kwagh u iyange i sha utaankaruhar la a kaa ér: “Tsô Aôndo mem ityom na cii sha iyange i sha utaankaruhar la,”+
5 shi a va kaa hen ijiir ne ér: “Vea nyôr ken mmem wam ga.”+
6 Sha nahan yô, er ian i lu her sha ci u mbagen kpa ve nyôr ken mmem shon ne, man er mba yange i ôr ve loho u dedoo shon sha hiihii la nyôr ker ga sha ci u ihyembeato yô,+
7 shi a ver iyange, shighe karen naleghaa yô, a ôr ken Pasalami u Davidi ér, “Nyian”; vough er i vande teren nahan, ér, “Nyian ne, aluer ne ungwa imo na yô, de kera cighir nen asema ga.”+
8 Gadia luun er Yoshua+ yange hemen ve nyôr a ve hen ijiir i mmem a lu yô, Aôndo ma kera va ôr kwagh u iyange igen ga.
9 Nahan iyange i memen ngi her sha ci u ior mba Aôndo.+
10 Gadia or u nan nyer ken mmem u Aôndo yô, nan mem ityom i nan, er Aôndo kpa yange mem i na nahan.+
11 Sha nahan yô, se nôngo nen tsung se nyôr nen ken mmem la, sha er ma or nana hingir u nyôron ken imba ihyembeato la ga yô.+
12 Gadia mkaanem ma Aôndo ma uma shi ka ma er tahav,+ ma hemba esen a nyityô sanker u lun akur ahar cii,+ ka ma nyôr ken or zan zan ma pav uma* a jijingi* je kpaa, kua uijuan a mshiam, shi ka ma fatyô u ponon mbamhen man mbaawashima mba nan kpaa.
13 Heela tseegh ga, ma kwagh môm u i gbe ngu myer sha ishigh nagh ga,+ kpa akaa cii nga ken igbar sha ishigh ki Un u i gbe u se va ôr un kwagh wase la, ngu nengen a a bong.+
14 Sha nahan yô, er se lu a Yesu Wan u Aôndo,+ zegepristi u hemban u a kôndo a yem sha la yô, se za nen hemen u pasen kwagh na ken igbar.+
15 Gadia ka zegepristi u una kanshio u zungwen a vese sha mbamyen asev la se lu a mi ga,+ kpa ka u i kar un sha akaa cii, er se nahan, kpa a er isholibo ga la.+
16 Nahan yô, se kporom nen hen ikyônough ki torough ki* erdoo u hemban a ishima i gbar gbar,+ sha er a zungwe se mhôônom shi a tese se erdoo u hemban la sha u wasen se sha shighe vough yô.
