Hen Mbaheberu 7:1-28
7 Gadia Mekisedeki ne, lu tor u Salem, pristi u Aôndo u Hemban Cii. Yange zua a Aberaham, zum u Aberaham za tim utor lu hiden yô, nahan a ver Aberaham doo doo.+
2 Aberaham di gema na un* môm-ken-pue u hanma kwagh cii. Hiihii yô, inja i iti na la ér, “Tor u Perapera,” shi lu tor u Salem, inja na yô ér, “Tor u Bem.”
3 Er lu a ter ga, ngô ga, tsombor ga, shi i fa kwagh u mmar na shin ku na ga, kpa lu er Wan u Aôndo nahan yô, ngu pristi gbem sha won.*+
4 Or ne yange lu tagher tagher je zua ga! Ka nahan ve Aberaham, u lu orya* la, yange tsua môm-ken-pue u hanma kwagh u hemban doon ken akaa a yange ya ishar sha mi la na un ye.+
5 Ka mimi, sha Tindi yô, ônov mba Levi+ mba ka i na ve tom u pristi la, mba ngohol môm-ken-pue hen ior,+ ka hen anmgbianev vev je la, shin er mban kpa ve lu ônov mba Aberaham nahan kpaa.
6 Kpa or u due ken tsombor ve ga ne yange ngohol môm-ken-pue hen Aberaham, shi ver un u yange i er uityendezwa a na ne doo doo.+
7 Nahan, ka kwagh u nyiman ga, ka or u nan lu sha ian i vesen la ka nan ver or u nan lu sha ian i kiriki la doo doo ye.
8 Man sha vegher u Mbalevi yô, ka ior mba ka ve kpe kera ne ve lu ngohol môm-ken-pue ye, kpa sha vegher ugen la di yô, gema ka or u i lu eren shiada sha kwagh na ér ngu uma la a lu ngohol ye.+
9 Nahan a fatyô u kaan ér, Levi u a lu ngohol môm-ken-pue la je kpa a na môm-ken-pue sha ikyev i Aberaham,
10 gadia shighe u Mekisedeki zua a ter na* u tamen la, i lu a mar un ga.+
11 Nahan, luun er yange lu u or a fatyô u hingir vough sha ci u tom u pristi u Mbalevi eren la nahan+ (gadia tom la kpa lu kwagh u Tindi u yange i na nongoior la tese ér i eren yô), ityôkyaa shi ma i lu i pristi ugen una due, u i kaa ér ngu er Mekisedeki nahan,+ ngu er Aron ga yôô?
12 Gadia er i lu geman tom u upristi yô, hingir hange hange u a gema Tindi kpaa.+
13 Sha ci u or u i ôron akaa ne sha a na la yange due ken ipyaven ugen, u i gbe je kpa or u ker lu a er tom sha atse a nan nagh ga yô.+
14 Gadia se fa wang er Ter wase yange due ken ipyaven u Yuda yô,+ man Mose ôr kwagh môm u tesen ér pristi una due ken ipyaven la ga.
15 Man kwagh ne hemba wanger hegen er pristi ugen+ a dugh, a lu er Mekisedeki nahan yô.+
16 A hingir imba pristi la, ka sha ci u a due ken tsombor u or er tindi a tese la ga, kpa ka sha tahav mbu mbu ne a lu a uma u timin mayange ga la.+
17 Gadia i er shiada sha kwagh na ér: “U ngu pristi gbem sha won, imba i Mekisedeki la.”+
18 Sha nahan yô, i kar a tindi u tse la kera sha ci u a yina shi ngu a iwasen ga.+
19 Gadia Tindi sôr ma kwagh môm hingir vough ga,+ gema ka ishimaverenkeghen i hemban doon,+ i̱ i ve se a mi la i̱ er nahan ye, shi ka sha i̱ se lu seer kporom hen Aôndo ye.+
20 Shi er yange i gba eren kwagh ne ga, kpa i er sha ibumun yô,
21 (gadia mimi je, ior mbagen mbá mba i bum sha kwagh ve ga kpa ve hingir upristi yô, kpa un shon ne yô, i bum ér una hingir pristi, man Un u a bum la kaa ér: “Yehova* bum, shi una gema zwa* ga, ‘U ngu pristi gbem sha won’”),+
22 kwagh la na Yesu hingir ibumun i ikyuryan i hemban doon cii.+
23 Heela tseegh ga, mbagenev kpishi yange ve hingir upristi sha ityough ki mbagen,+ sha ci u mba ve kpe la ku yange ve u̱ zan hemen a tom u pristi,
24 kpa ngun yô, ngu lun gbem sha won,+ nahan a kera gba u mbagen vea kar a er tom u pristi sha ityough nagh ga.
25 Sha nahan yô, una fatyô u eren tom u yiman mba ve lu van hen Aôndo ken iti na la kpaa vindi vindi, sha ci u una lu uma gbem una lu zamber sha ci ve.+
26 Gadia doo u se lu a imba zegepristi, u a eren kwagh a ior nav sha mimi, a lu a ibo sha ma kwagh ga, a lu a acôghor ga,+ i pav un a mbaasorabo, i kende a na a kar usha cii la.+
27 Un yô, kera gba u una naan iniav ayange ayange,+ una hii nan sha ci u asorabo a na, maa una na sha ci u asorabo a ior,+ er upristi mba vesen mbara eren nahan la ga, sha ci u un shon ne yange na nagh sha uma na kwa môm maa kure kwagh la gbem sha won.+
28 Gadia ka sha Tindi ka i ver ior mba lun a mbamyen sha tom u pristi u vesen ye,+ kpa gema ka sha kwagh u yange i ôr i bum,+ zum u i na Tindi kera la, i ver Wan u i er un a hingir vough,+ shi i lu u una lu gbem sha won la, a lu pristi u vesen ye.
