Hen Mbaheberu 9:1-28
9 Ikyuryan i tse la yange i̱ lu a atindi a sha kwagh u icighantom* shi i̱ lu a icighanjiir+ shin tar ne.
2 Gadia vegher u tenti u masen sha hunda u̱ yange i er la, daarimenger lu ker+ kua tebul man ikpenberedi i i ver sha ishigh ki Aôndo yô;*+ i yilan vegher shon ér Icighankpar.+
3 Kpa vegher u tenti u shin atô la lu ken ijime i ikyondo i yisan i sha uhar la,+ i yilan vegher shon ér Icighankpar u Hemban Cii.+
4 Agbande a sha zanaria a nanden insensi shimi lu ker,+ kua areki u ikyuryan,+ i cir un zanaria iyol cica cii,+ i gema i wa ityegh ki sha zanaria shimi, mana lu shin ki,+ shi gbough ku Aron ku yange ku kpar la+ lu shimi, kua ikpandeawen+ i ikyuryan.
5 Ucerubi mba mondon lu sha ijime na, akper a ve samber gba mure sha kuur, ape i naan* nagh ku wamen* la.+ Kpa hegen ka shighe u ôron akaa ne vighe vighe ga.
6 Mba eren akaa ne sha gbenda ne mba been kera yô, upristi gema nyôron ken vegher u tenti u sha hunda la hanma shighe sha u eren icighantom.+
7 Kpa zegepristi ka a nyôr ken vegher u shin atô la un tswen, kwa môm ken inyom,+ a awambe,+ a za na nagh sha ci na iyol na+ kua sha ci u asorabo a ior+ ve er sha lan yô.
8 Sha kwagh ne yô, icighan jijingi ngu tesen wang ér, shighe u tenti u hiihii la lu her la, i lu a̱ pase gbenda u karen nyôron ken icighanjiir la ga.+
9 Tenti la ka ikyav i tesen kwagh u sha shighe u hegen ne,+ man ka sha gbenda ne i eren tom u nan uiyua kua iniav ye.+ Nahan cii kpa, akaa ne nga ne imoshima i or u nan lu civir Aôndo la ngi hingir vough ga.+
10 Kpa uiyua man iniav mbin saa sha akaayan man akaaman kua uiniongo man anza a batisema kposo kposo di tsô.+ Lu atindi a sha akaa a sha iyol,+ a i wa ve ér ve eren zan zan shighe u sôron akaa la a kar kuman yô.
11 Nahan kpa, zum u Kristu va sha inja i zegepristi u akaa a dedoo a a vande eren la yô, a nyôr ken tenti u a hembe lun a inja shi a hembe lun vough, u i er un sha ave ga yô, inja na yô, ka u shin tar ne ga.
12 Yange nyôr ken icighanjiir a awambe a ivo shin a agumabua ga, kpa nyôr a awambe a na iyol na+ kwa môm maa kure kwagh la gbem sha won, sha u nan se myom* u tsôron.+
13 Gadia aluer awambe a ivo man a anomabua+ man mtwem ma tulebua ma ka i mishi sha ior mba ve hôngor la, ka akaa a ka a wanger ve ve lu wang sha iyol yô,+
14 awambe a Kristu,+ un u jijingi u tsôron la mgbegha un u nan Aôndo nagh sha iyol na i i lu a acôghor shio la, aa hemba wanger imoshima yase cii sha aeren a a lu kpenegh la,+ sha er se er Aôndo u uma la icighantom gaa?+
15 Ka nahan ve a lu orhimen u ikyuryan i he ye,+ sha er a fatyô u eren ityendezwa i yan dyako u tsôron+ a mba i yer ve la sha ci u ku u a kpe sha u paan ve+ sha atindi a ve lu peren sha ikyev i ikyuryan i tse la yô.
16 Gadia Aôndo ka una ya ikyur yô, ka i gba u orumace u i tôô nan i ye ikyur a mi la nana kpe,
17 sha ci u ka shighe u nan kpe la ikyuryan la ka i lu a iwasen ye. Gadia er orumace u i tôô nan i ye ikyur a mi la nan lu uma her je, ia er tom ga.
18 Sha nahan yô, ikyuryan i tse la kpa yange i̱ hii tom* zum u i haa awambe inya yô.
19 Gadia zum u Mose ôr ior cii hanma kwagh u Tindi kaa la bee yô, a tôô awambe a agumabua man a ivo, kua mngerem, man ikyondo i sha aive, i̱ nyian bong, kua hisop,* a gba mishin sha takeda* la man sha ior cii,
20 kaan ér: “Ka awambe a ikyuryan i Aôndo a kaa ér ne kuran je ne.”+
21 Shi a mishi awambe la sha tenti man sha mkam ma eren icighantom* a mi cica cii.+
22 Nahan sha kwagh u Tindi a tese yô, akaa cii ka i nôngo u wanger a sha awambe,+ shi saa a haa awambe inya, gayô a fatyô u den or môm isholibo ga.+
23 Sha nahan yô, yange gba hange hange u a wanger akaa a a lu ikyav+ i akaa a sha la sha gbenda ne,+ kpa akaa a sha la yô, gba u a wanger a sha iniav mbi mbi hembe doon ica je yô.
24 Gadia lu ken icighanjiir u i er sha ave,+ u a lu ikyav i kwagh u a lu kwagh jim jim la+ Kristu nyôr ga, kpa lu sha kpôô kpôô nyôr ye,+ sha er hegen una za sha ishigh ki Aôndo sha ci wase yô.+
25 Yange er kwagh ne lu sha er una naan nagh sha iyol na hanma shighe, er zegepristi ka a nyôr ken icighanjiir hanma inyom+ a awambe a a lu a na ga la nahan ga.
26 A lu nahan yô, ma i gbe u una zer yan ican, hii sha shighe u i hii u gban tar la je. Kpa a va kwa môm vough maa a kure kwagh la gbem sha won, sha shighe u mkur u tar* ne, sha u va karen a isholibo kera sha nagh ku a ne sha iyol na la.+
27 Man er i gbe u or a kpe kwa môm vough maa kwagh a kure gbem sha won, kpa a karen kera yô, a ôr nan ijir nahan,
28 kape Kristu kpa yange i na nagh sha a na kwa môm vough, sha u tôôn asorabo a ior kpishi kera,+ maa kwagh la kure gbem sha won je la; una vaan kwa u sha uhar yô, a kera lu sha ikyaa i isholibo* ga, nahan a lu mba ve lu keren un sha gbashima sha ci u myom ve la vea nenge a na ye.+
Ngeren mba shin kpe
^ Shin “mciviraôndo.”
^ Shin “beredi u sha ishi.”
^ Shin “hen ijiir i nan.”
^ Shin “nagh ku himen ior a Aôndo.”
^ Zwa Grika, “mpaa.”
^ Zwa Grika, “i tsegha i.”
^ Nenge Ngeren u Pasen Asember.
^ Shin “ihyurenruamabera.”
^ Shin “akaa a civir Aôndo.”
^ Shin “kov.” Ka tar u Mbayuda je la. Nenge Ngeren u Pasen Asember.
^ Shin “a kera lu sha u va been a isholibo kera.”
