Hen Mbaheberu 6:1-20
6 Nahan, er se hen akaa a yange i hii tesen se sha kwagh u Kristu la se bee kera yô,+ se nôngo kpoghuloo se via nen,+ se kera hide se wa imaagh ga, inja na yô, se kera saa henen kwagh u geman ishima den aeren a a lu kpenegh la ga, kua u nan Aôndo jighjigh
2 man ityesen i sha kwagh u anza a batisema kposo kposo, man u pendan or ave iyol,+ man mnder u shin ku+ man kwagh u mtsaha u tsôron la kpaa ga.
3 Man sha iwasen i Aôndo yô, se fatyô u hingir mba vian.
4 Gadia mba ve vande zuan a iwanger+ shi ve vande zuan a iyua i yemen sha, shi ve hingir mba zuan a kwar u icighan jijingi
5 shi ve ngohol loho u dedoo u Aôndo shi ve nenge a akaa a kpilighyol a sha kwagh u tar u u lu van la,
6 kpa ve undu jighjigh u nan ve yô,+ gbenda ngu u a wase ve vea hide a gema ishima ga, sha ci u ve hide ve mande Wan u Aôndo sha kon ayol a ve, ve hee un ken igbar.+
7 Gadia inya ka i ngohol iveren hen Aôndo sha ura u ka u nôôn sha i fele fele i nyôron shimi la, nahan i mende iyiav mbi lun mba ve kaha i la a iwasen.
8 Kpa aluer i mende usaa man mbaasaa yô, i venda i kera je ve; ica a kera gba ga tsô Aôndo una wa i ifyan, shi ken masejime yô, a nande i.
9 Kpa sha kwagh wen yô, ne mba doon se ishima, se mba a vangertiôr ser ne hemba mban sha ian i dedoo, ka ian i va zuan a myom je la, shin er se lu ôron akaa ne nahan kpaa.
10 Gadia Aôndo ban a perapera ga, nahan una hungur a tom wen man dooshima u ne tese sha ci u iti na la ga;+ ne mba eren kwagh ne sha tom u ne er uicighanmbaiorov, shi ne lu eren her la.
11 Kpa sar se u hanmô wen nana̱ za hemen u tesen gbashima la her, sha er ne lu a vangertiôr sha kwagh u ishimaverenkeghen la+ zan zan mkur yô,+
12 nahan ne hingir mba wan hwev ga,+ kpa ne lu mba dondon ikyav i mba yan dyako sha akaa a i tende zwa u nan ve, sha ci u jighjigh u nan man ishimawan ve la.
13 Gadia er or u hemban Aôndo nan lu u una bum ken iti i nan mayange ga yô, zum u lu eren ityendezwa a Aberaham la, a bum ken iti na iyol na,+
14 a kaa ér: “Me ver u doo doo shi me na ônov ou vea ngee kpee je a bunde ga.”+
15 Nahan er Aberaham tese ishimawan yô, i er ityendezwa ne a na.
16 Gadia uumace ka ve bum ken iti i or u nan hembe ve yô, man ibumun ne ka i bee a anyiman cii, sha ci u ka ikyav i tesen ér kwagh u ve er la ka mimi.+
17 Nahan Aôndo kpa, er tsua u seer tesen mba yan dyako u ityendezwa la+ wang er awashima na* la a lu u geman ga yô, a bum* sha u tesen er i lu kwagh u mimi yô,
18 sha er se mba se yevese se va lu hen ijiir i yeren ne se hemba zuan a ishimataver sha akaa a ahar a geman ga,* a a tese ér Aôndo una fatyô u eren aie ga ne yô,+ nahan se suur sha ishimaverenkeghen i i ver se sha ishi la.
19 Se mba a ishimaverenkeghen ne+ inja er ka imandetso i sha ci u uma wase nahan, ka i̱ wase se u tilen dông a akperan a tan shio, shi ka i̱ hemen se i̱ nyôr a vese hen ikyondo i yisan,+
20 ape orhemen wase a nyer sha ci wase la, ka Yesu je la,+ un u a hingir zegepristi imba i Mekisedeki gbem sha won la.+
