Sha Uwegh ku Luka 21:1-38
21 Gem kenger sha hemen yô, a nenge mbanyarev lu kenden uiyua shin mbaakwati mba inyar.+
2 Nahan a nenge kwasecôghol ugen, lu icankwase, va kende samnyar u gban kwagh ga, agbenger ahar,*+
3 maa a kaa ér: “Mimi je me kaa ne, kwasecôghol u a lu icankwase ne hemba kenden kwagh a mbagenev mba ve kende inyaregh la cii.+
4 Gadia mbagenev mban cii kende uiyua ka sha er ve lu a mi kpishi la, kpa un yô, er a lu ken ibanave nahan kpa, a kende hanma kwagh u a lu a mi u koson iyol na cii.”+
5 Mbagenev mba va ngur ôron kwagh u tempel, er i er un hwe sha awen a doonashe kua sha uiyua mba ior na la yô,+
6 a kaa ér: “Akaa a ne lu nengen a mi hegen ne, shighe ngu van u a va yôhôr a a haa inya yô. Iwen i môm kpa ia kera tema sha igen ga.”+
7 Tsô ve pine un ér: “Ortesen, ka hanma shighe jighilii akaa ne aa ere? Man ka nyi ia lu ikyav i tesen ér shighe kuma u akaa ne aa ere?”+
8 A gema a kaa ér: “Ver nen ishima, or a de tsughun ne ga,+ ior kpishi vea va ken iti yam, vea lu kaan ér, ‘Ka mo m lu un ye,’ shi kaan ér, ‘Shighe u i ver la zurum.’ De dondon nen ve ga.+
9 Shi aluer ne va ungwa kwagh u ityav mbi nôngon kua ayôôso* sha ajiir kposo kposo kpa, i de cier ne iyol ga. Sha ci u akaa ne aa vande eren, kpa mkur yô una va ave ave ga.”+
10 Shi a kaa a ve ér: “Ikyurior igen ia mough ityav a ikyurior igen,+ tartor ugen kpaa ua mough ityav a tartor ugen.+
11 Ityartenger i vesen ia lu, ijen ia gba sha ajiir kposo kposo, shi ubombauangev vea lu sha ajiir wue wue;+ shi a nenge a akaa a cieryol kua uivande mba vesen sha kwavaôndo.
12 “Kpa cii man akaa ne a er yô, ior vea tôv ne a ican,+ shi vea za a ven ken ushinagoge shi vea wuhe ne ken upurusu. A za a ven sha ishigh ki utor man ugomna sha ci u iti yam.+
13 Kwagh ne una gema a bugh ne ian i eren shiada sha kwagh wam.
14 Nahan yô, kwagh a de gbe ne u vanden wan iyol sha kwagh u ne za ôr ga,+
15 sha ci u mo me na ne mkaanem kua kwaghfan u mbahyomov enev vea kohol cii kpa vea fatyô u hendan a ven shin nyiman kwagh a ven ga yô.+
16 Shi mbamaren enev man anmgbianev enev kua mba hen ityô yen, man azende a en je kpaa, vea gema ne vea na ér i yem a ven,* shi a wua ne mbagenev.+
17 Shi ior cii vea kôr ne ihyom sha ci u iti yam.+
18 Kpa gwarce wen u sha ityo môm una saa ishe ga.+
19 Ka sha ishimawan yen la ne war uma wen ye.+
20 “Nahan kpa zum u ne nenge ushoja vea va haa afo vea kase Yerusalem yô,+ fa nen ner mtim na zurum.+
21 Nahan mba ve lu ken Yudia ve hii u yevese yemen sha iwo,+ mba ve lu ken atô na la kpa ve due, shi mba ve lu hen ikyasen la ve de nyer ker ga,
22 sha ci u ayange la ka a oron iyev, sha u akaa a i nger la cii a kure sha mi yô.
23 Sha ayange la, kwagh a tser kasev mba vea lu iyav man mba vea lu a anikyundanev sha ave yô!+ Sha ci u zegecan una va sha tar ne, shi iyugh ia va sha ior mban.
24 Nahan vea kpe ku u sanker shi a yem a ve uikyangen ken akuraior* cii;+ shi akuraior aa ndyar Yerusalem angahar zan zan shighe u i ver akuraior* la una kar been.+
25 “Shi akav aa due sha iyange man uwer kua asan,+ shi ican a tser akuraior sha tar, vea fa gbenda u waren ga, sha ci u zegemnger una lu huran shi kpianger sha utaha.
26 Ior vea hume sha ci u mciem man akaa a a lu van sha tar cii la, gadia tahav mbu sha mbua tenger.
27 Maa vea nenge Wan u or+ una gba van ken ibeenegh a tahav man iengem i kpilighyol.+
28 Kpa akaa ne aa hiin u eren yô, tile nen sha jighilii shi kende nen ityouv sha, sha ci u myom wen zurum a zurum je.”
29 Maa a ôr ve injakwagh, a kaa ér: “Nenge nen ikyav sha kwagh u kon u tur kua ikyon igen cii.+
30 Zum u ka ia kparen yô, ne nenge sha ashe a en shi ne fa je ner fam zurum.
31 Ne kpa zum u ne nenge akaa ne aa nguren eren yô, fa nen je ner Tartor u Aôndo ngu ikyua ikyua.
32 Mimi je me kaa ne, kov ne ua kar kera ga zan zan akaa cii aa kar eren.+
33 Sha man tar vea kar kera, kpa kwaghôron wam yô, una kar kera mayange ga.+
34 “Ver nen ishima sha ayol a en, mayange ieren i yan kwagh karen ikyaa inya shi man kwagh kpishi+ shi lun a ishimanyian sha akaa a uma ne la,+ i de ye tor ken a ven ga. Gayô, ne tôô ikyav ken ishima kpishi, nahan iyange la ia va bur ne a bur
35 er kwaghhônon nahan.+ Gadia ia va sha mba ve lu sha tar cii.
36 Yô lu nen per,+ eren nen msen hanma shighe+ sha er ne va war akaa a i gbe keng u aa er la cii, shi ne tile sha ishigh ki Wan u or yô.”+
37 Yange sev mbua aven yô, a tesen ken tempel, kpa tugh mbua ilen yô, a due a yem a za tsa sha uwo u i yilan ér Uwo u Olev la.
38 Ior cii lu duen van hen a na pepe pepe, va ungwan kwaghôron na ken tempel.
