Sha Uwegh ku Luka 4:1-44
4 Tsô Yesu mough hen Yordan. Er iv a icighan jijingi yô, jijingi yem a na ken taaikyôngo+
2 za lu ker ayange 40, Diabolo lu meen un.+ Ken ayange la cii, ya kwagh môm ga, nahan ayange shon nga been yô, ijen kôr un.
3 Tsô Diabolo kaa a na ér: “Aluer u ngu wan u Aôndo yô, kaa iwen ne i hingir beredi.”
4 Kpa Yesu kaa a na ér: “I nger ér, ‘Ka sha beredi tseegh or a lu uma ga.’”+
5 Diabolo shi yem a na ape taven za tese un ityartor i sha tar cii kwa môm fese.+
6 Diabolo maa kaa a na ér: “Me na u tahav mbun cii kua iengem i mbu, sha ci u i nam mbu;+ ka m na hanma or u m soo cii.
7 Nahan aluer u gure inya sha ishigh yagh u civir mo kwa môm tseegh kpa, mbua lu mbu ou cii.”
8 Yesu gema kaa a na ér: “I nger ér, ‘Ka Yehova* Aôndo wou i gbe u u civir ye, shi ka un tseegh i gbe u u er un tom ye.’”+
9 Tsô a yem a na ken Yerusalem, a za ver un sha atô u tempel,* maa a kaa a na ér: “Aluer u ngu wan u Aôndo yô, tsue heen gba shin inya,+
10 gadia i nger ér, ‘Una na zwa ér mbatyomov nav ve̱ nenge sha a we, sha u kuran we,’
11 shi, ‘Vea kôr u sha ave a ve je, sha er u kema nguhar ken iwen ga yô.’”+
12 Yesu gema kaa a na ér: “I kaa ér, ‘De karen Yehova* Aôndo wou ga.’”+
13 Diabolo meen un been cii yô, a undu un a yem, ér saa shighe ugen u a gba a doo yô.+
14 Tsô jijingi hemen Yesu hide a na ken Galilia.+ Nahan gwa u dedoo samber sha kwagh na hen ningir la cica cii.
15 Shi a hii u tesen ken ushinagoge vev, shi ior cii lu nan un icivir.
16 A kar a yem ken Nasareti,+ ape i yese un la, a za nyôr ken shinagoge sha Iyange i Memen, er vanden eren keke nahan.+ Maa a mough a tile sha ér una ôr ruamabera.
17 Nahan i na un ihyurenruamabera u profeti Yesaia, maa a bugh ihyurenruamabera la, a zua a ijiir ne, i nger her ér:
18 “Jijingi u Yehova* ngu sha a mo, sha ci u a tsegham ér m yôô loho u dedoo hen mbaatsanev. A tindim ér m yôô i pase mba ve lu uikyangen la, shi i bugh mbaapirashe ashe, shi i due a mba i kighir ve la ken ican kera,+
19 shi m yôô inyom i erdoo u Yehova.”*+
20 Maa a hure ruamabera la a gema a na ortom la, a kar a za tema inya, nahan mba ken shinagoge cii haa ashe sha a na.
21 Tsô a kaa a ve ér: “Kwaghôron u ruamabera u ne ongo hegen ne kure nyian.”+
22 Tsô ve gba eren shiada u dedoo sha kwagh na, shi kpiligh ve iyol a mkaanem ma kôron ken ishima ma ma lu duen ken zwa na la,+ ve gba kaan ér: “Ka wan u Yosev ne gaa?”+
23 A gema a kaa a ve ér: “M fa keng je mer ne ôr ishenge ne sha a mo, ner, ‘Ortwer, sôr ase iyol you, er ase akaa a se ongo ser i er ken Kapenaum la hen ijiir you heen kpaa.’”+
24 Tsô a kaa a ve ér: “Mimi je me kaa ne, profeti môm kpa mba lumun nan hen ijiir i nan ga.+
25 Ikyav i tesen yô, mimi je me ôr ne: Kasevmbacôgholov lu ken Iserael kpishi sha ayange a Eliya, shighe u ura kera nôô ga anyom atar man iwer ataratar ve zegejen gba sha tar cii la.+
26 Nahan kpa i tindi Eliya hen mô ken kasev mban ga, kpa lu hen kwasecôghol u hen Sarefati, u ken tar u Shidon la tseegh.+
27 Shi mbaamandev lu ken Iserael kpishi sha shighe u profeti Elisha la, nahan kpa i bee* mô ve imande ga, lu Naaman, Orshiria la tseegh.”+
28 Tsô mba ve lu ungwan akaa ne ken shinagoge la cii ishima vihi ve ker tsung,+
29 maa ve mough ve due a na ken gar fese, ve yem a na sha ityough ki uwo u gar ve la lu sha mi la, ér vea za daa un a gba a tume ityough inya.
30 Kpa a za osough sha ave a ve kera, a kar a gba yemen.+
31 Tsô a yem shin Kapenaum, gar ugen ken Galilia. Lu za tesen ve sha Iyange i Memen,+
32 nahan kpiligh ve iyol a gbenda u lu tesen la,+ sha ci u lu ôron kwagh er ka or u i ne nan tahav nahan.
33 Orgen ken shinagoge la gema lu a jijingi u bo,* maa or shon ngor kaa ér:+
34 “Aye! Ka nyi i zough se a we, Yesu Ornasareti?+ U va u va timin see? M fa u dedoo, u ngu Icighan u Aôndo!”+
35 Kpa Yesu venda a jijingi u bo la, kaa ér: “Cir zwa, shi due ken a na kera.” Nahan jijingi shon er or la gba hen inya hen atô ve, maa a due ken a na kera, kpa a vihi un iyol ga.
36 Nahan kunda ve iyol, ve gba kaan ér: “Ungwa imba kwaghôron la sha wono! Ka a ôr kwagh a ujijingi mba bov sha utaha man sha agee, maa ve due je!”
37 Nahan gwa na za hemen u samber hanma ijiir hen ningirtar la cii.
38 Dugh ken shinagoge la yô, a nyôr hen ya u Shimon. Fiva gema lu eren* ngôkem u Shimon kpoghuloo, nahan ve kaa a na ér a wase un.+
39 Tsô a za tile ikyua a na, a kaa ér fiva la i bee, maa fiva shon bee. Her ave ave je a kighir a mough, a gba eren ve kwaghyan.
40 Kpa iyange va ngur miren yô, ior cii va un a ior vev mba ve lu a iangev atô kposo kposo yô. Tsô a penda hanmô ve ave iyol, a bee ve iangev.+
41 Ujijingi mba bov kpa due ken ior kpishi kera, ve lu ngoron kaan ér: “U ngu Wan u Aôndo.”+ Kpa vea ôr nahan je a venda a ve, a na ve ian ér ve lam ga,+ sha ci u ve fa er a lu Kristu yô.+
42 Sev mbu va aven yô, a mough her a yem hen ijiir i or lu ga yô.+ Kpa ikpelaior lu keren un,* mba va nyer ape lu la yô, ve gba nôngon ér a de kera undun ve ga.
43 Kpa a kaa a ve ér: “Gba keng u me ôr loho u dedoo u Tartor u Aôndo ken agar agen kpaa, sha ci u ka kwagh u i tindim je la.”+
44 Nahan a za hemen u pasen loho u dedoo ken ushinagoge mba ken Yudia.
Ngeren mba shin kpe
^ Nenge Ngeren u Seer u A5 la.
^ Shin “ape hemban taven la.”
^ Nenge Ngeren u Seer u A5 la.
^ Nenge Ngeren u Seer u A5 la.
^ Nenge Ngeren u Seer u A5 la.
^ Shin “i wanger.”
^ Shin “u hôngorough.”
^ Shin “iyol gema hia.”
^ Shin “lu tôvon un ityô.”
