Sha Uwegh ku Luka 3:1-38
3 Ken inyom i sha 15 i hemen u Tiberiu Shisar, shighe u Pontiu Pilatu lu gomna u Yudia, Herode+ gema lu hemen haregh* u Galilia, anmgbian na Filibu di lu hemen haregh u Ituria man Terakoniti, Lasenia di gema lu hemen haregh u Abilene,
2 sha ayange a pristi u tamen Ana man Kayafa la,+ kwaghôron u Aôndo va hen Yohane,+ wan u Sekaria ken taaikyôngo.+
3 Nahan a zende ken ikyôngough ki hen haregh u Yordan la cii, lu pasen er i gbe u ior vea er batisema sha u tesen ér ve gema ishima, sha er a de ve asorabo a ve yô,+
4 vough er i nger ken takeda u akaaôron a profeti Yesaia nahan, ér: “Imo i or ngi yôôn ken taaikyôngo ér: ‘Sôr nen gbenda u Yehova!* Kôôm nen igbenda na i lu jighilii.+
5 I̱ cir hanma pev, shi i̱ hembe hanma uwo kua hanma igyungu; i̱ kôôm igbenda i huren i lu jighilii, shi igbenda i lun agber agber kpa i sôr i i hingir vaanaa.
6 Nahan ior cii vea nenge a myom u Aôndo.’”+
7 Tsô a gba kaan a ikpelaior i i lu van sha u a er ve batisema la ér: “Ne ônov mba igbindev mban, ka an nan we ne kwagh ér ne yevese iyugh i i lu van laa?+
8 Nahan yô, ume nen atam a a tese mgemshima yô. De kaan nen ken ishima yen ner, ‘Se mba ônov mba Aberaham’ ga. Nenge, me kaa ne, Aôndo una fatyô u geman awen ne aa hingir ônov mba Aberaham.
9 Jighilii yô, i ver ijembe hen atineakyon mba keghen a kegh. Nahan hanma kon u u um ityamegh ki dedoo ga cii yô, a gber u a kende ken usu.”+
10 Nahan ikpelaior la lu pinen un ér: “Tsô ka nyi i gbe u se ere?”
11 A gema a kaa a ve ér: “Or u nan lu a akondo ahar yô, nana na orgen u nan lu a mi ga la i môm, shi or u nan lu a kwaghyan kpaa nana er nahan.”+
12 Mbangoholkpandegh je kpa va ér a er ve batisema,+ ve va pine un ér: “Ortesen, ka nyi i gbe u se ere?”
13 A kaa a ve ér: “De ngohol nen kpandegh i hemban er i gbe u a ta la ga.”+
14 Shi ushoja kpa lu va pinen un ér: “Ka nyi i gbe u se ere?” A kaa a ve ér: “De nzughul nen a ma or* ga, shi de waan nen ma or aie iyol ga,+ kpa kwagh u i nan* ne la a kuma ne.”
15 Hen shighe ne ior lu veren ashe keghen, nahan ve cii ve lu henen sha kwagh u Yohane ken asema a ve ér, “Alaghga tsô ka un a lu Kristu ye shinii?”+
16 Yohane na mlumun, kaa a ve cii ér: “Mo yô, m ngu eren ne batisema sha mnger, kpa orgen ngu van u a hembem tahav yô. M kuma u saghen un ikyor i akôvough* ga.+ Un yô, una er ne batisema sha icighan jijingi man sha usu.+
17 Ngu a kwagh u peer akoo* a mi ken uwe, una ese vande na u gbidyen iyiav pele pele, shi una kura alakema una za ombo ken iyou na i koson iyiav.* Kpa akoo yô, una nande a ken usu u a fatyô u pirin ga yô.”
18 Shi a wa ior kwagh sha akaa agen kpishi, shi a za hemen u pasen ve loho u dedoo.
19 Kpa er Yohane na Herode u lu hemen haregh shon la ibo sha akaabo a a er la cii, kua sha ikyaa i Herodia, kwase u anmgbian u Herode la yô,
20 Herode shi seer eren kwaghbo ugen: A wuhe Yohane ken purusu.+
21 Tsô er i lu eren ior cii batisema yô, Yesu kpa i er un batisema.+ Ngur eren msen yô, i bugh sha,+
22 maa icighan jijingi gba senen sha a na, lu er ikyungugh nahan, shi imo due sha aôndo kaa ér: “U ngu Wan wam u ishima ishima. Doom a we.”+
23 Shighe u Yesu+ hii tom na la, anyom a na kuma er 30 nahan.+ Er ior nenge nahan, lu wan uYosev,+wan u Heli,
24 wan u Matati,wan u Levi,wan u Meki,wan u Yanai,wan u Yosev,
25 wan u Matatia,wan u Amoshi,wan u Nahum,wan u Eseli,wan u Nagai,
26 wan u Meati,wan u Matatia,wan u Semein,wan u Yoseki,wan u Yoda,
27 wan u Yoanan,wan u Resa,wan u Serubabel,+wan u Sheatiel,+wan u Neri,
28 wan u Meki,wan u Adi,wan u Kosam,wan u Elmadam,wan u Er,
29 wan u Yesu,wan u Elieser,wan u Yorim,wan u Matati,wan u Levi,
30 wan u Shimeon,wan u Yuda,wan u Yosev,wan u Yonam,wan u Eliakim,
31 wan u Melea,wan u Mena,wan u Matata,wan u Natan,+wan u Davidi,+
32 wan u Yese,+wan u Obedi,+wan u Boashi,+wan u Salmon,+wan u Nashon,+
33 wan u Aminadabi,wan u Ani,wan u Heseron,wan u Pereshi,+wan u Yuda,+
34 wan u Yakob,+wan u Isaka,+wan u Aberaham,+wan u Tera,+wan u Nahor,+
35 wan u Serugi,+wan u Riu,+wan u Pelegi,+wan u Eber,+wan u Shela,+
36 wan u Kainan,wan u Apakashadi,+wan u Shem,+wan u Noa,+wan u Lameki,+
37 wan u Metusela,+wan u Enoki,wan u Yaredi,+wan u Mahalalel,+wan u Kainan,+
38 wan u Enoshi,+wan u Setu,+wan u Adam,+wan u Aôndo.
