Sha Uwegh ku Luka 22:1-71
-
Upristi er mhen u wuan Yesu (1-6)
-
I wa ago iyol sha Paseka u masetyô (7-13)
-
I hii kwagh u Kwaghyan u Ter u Aikighe (14-20)
-
“Or u a teem la ngu yan kwagh vea mo sha tebul” (21-23)
-
Anyiman gba tsung sha kwagh u or u hemban (24-27)
-
Yesu ya ikyur i Tartor (28-30)
-
Yesu tsengaôron er Peteru una venda un yô (31-34)
-
Gba u a wa iyol a keghen a kegh; usanker uhar (35-38)
-
Yesu er msen sha Uwo u Olev (39-46)
-
I kôr Yesu (47-53)
-
Peteru venda Yesu (54-62)
-
I naha Yesu tar (63-65)
-
I ôr Yesu ijir sha ishigh ki Sanhederin (66-71)
22 Hen shighe ne, Iniongo i Beredi u I We Kwa sha Mi Ga, i i yilan ér Paseka+ la, zurum.+
2 Nahan upristi mba tamen man mbangeren soo u been a na kera,+ kpa ve lu cian ikpelaior, nahan ve lu keren ér ian i due tsembelee.+
3 Tsô Satan nyôr ken Yuda, u i yilan un ér Isekarioti la, un lu môm ken Mbapuekaruhar mbara.+
4 Nahan a yem a za lam a upristi mba tamen kua mbavesen mba mbakuran tempel sha kwagh u una er ve una tee ve un yô.+
5 Nahan doo ve, ve lumun u nan un inyaregh.*+
6 Un kpa a lumun, maa a gba keren ér ian i due tsembelee una tee ve un shighe u ikpelaior i lu ga yô.
7 Ka va nyer sha iyange i hiihii i iniongo i Beredi u I We Kwa sha Mi Ga, sha shighe u gba u a na nagh ku Paseka la yô,+
8 Yesu tindi Peteru man Yohane, kaa a ve ér: “Za wa nen iyol i Paseka se va ya nen.”+
9 Tsô ve pine un ér: “Ka han u soo wer se za sôr u ijiiri?”
10 Nahan a kaa a ve ér: “Nenge! Ne za nyôron ken gar yô, ne zua a orgen u a tee ityegh ki mngeregh ki inyaagh yô. Dondo un nen ijime za nen hen ya u una nyôr her la.+
11 Kaa nen orya la ner, ‘Ortesen ér se va pine u ser: “Iyou i mbavannya i me ya Paseka vea mbahenen av ker ngi hana?”’
12 Nahan or shon una tese ne iyou i vesen sha kpoyou u sha, i i tar ikyav ker i ver a ver yô. Er nen hanma kwagh her.”
13 Nahan ve yem ve za nenge hanma kwagh lu er Yesu kaa ve nahan, maa ve wa iyol i Paseka.
14 Shighe* la va kom yô, un vea mbaapostoli ve kase kwaghyan sha tebul.+
15 Nahan a kaa a ve ér: “Sarem tsung u yan Paseka ne a ven imôngo cii me mase yan ican ye;
16 sha ci u me kaa ne, me kera ya un ga zan zan saa hanma kwagh u a gbe a zough sha mi la cii una kar kuren sha mi ken Tartor u Aôndo.”
17 Tsô a ngohol kôôpu a wain shimi, a sugh Aôndo,* maa a kaa ér: “Ngohol, na nen hanma wen nana ma,
18 gadia me kaa ne, hii hegen je, me kera ma zar u atam a kon u wain ga, zan zan Tartor u Aôndo ua kar van.”
19 Shi a tôô kpenberedi,+ a sugh Aôndo,* maa a coon a gema a na mbahenen nav, a kaa ér: “Ngohol ya nen; beredi ne tile sha ityough ki iyol yam+ i i gbe u a na sha ci wen la.+ Eren nen kwagh ne sha u umbur mo.”+
20 Shi iyongo la kpa a er a mi nahan, zum u ve ya kwaghyan u aikighe kera yô. A kaa ér: “Iyongo ne tile sha ityough ki ikyuryan i he+ i sha awambe a am,+ a i gbe u a haa inya sha ci wen la.+
21 “Kpa nenge! or u a teem la ngu yan kwagh vea mo sha tebul.+
22 Ka mimi, akaa a i nger sha kwagh u Wan u or la cii, aa er un.+ Nahan kpa, kwagh a tser or u nan tee un la!”+
23 Mba ongo nahan yô, ve gba pinen ayol a ve or u nan lu henen u eren kwagh la ken a ve yô.+
24 Nahan kpa, shi ve gba anyiman ayol a ve kpoghuloo sha kwagh u or u i nenge ér nan hemba ken a ve yô.+
25 Kpa a kaa a ve ér: “Utor mba tar ne ka ve eren tahav sha ior vev, shi ior mba nengen uzegembaiorov mba ve tesen mhembe sha a ve la ér ka Mbawasenior.+
26 Kpa ne yô, de lu nen nahala ga.+ Or u nan hembe gban kwagh ken a ven la, nana̱ lu er nan hemba ngun wanye+ ken a ven nahan, shi or u nan lu hemen la kpaa, nana̱ lu er or u eren mbagenev tom nahan.
27 Ka an nan hembe? Ka or u nan lu yan iwer la shin ka or u nan lu duen a iwer laa? Kera ka or u nan lu yan iwer la gaa? Kpa m ngu hen atô wen er or u duen a iwer nahan.+
28 “Ka ne je ne lu a mo+ ken atsan a am her ye,+
29 nahan m ngu yan ikyur i tartor a ven, vough er Terem a ye ikyur i tartor a mo nahan,+
30 sha er ne ya kwagh shi ne ma kwagh sha tebul wam ken Tartor wam,+ shi ne tema sha mkônom ma torom+ ne ôr uipyaven mba Iserael mba 12 mbara ijir yô.+
31 “Shimon, Shimon, nenge! Satan soo u yegher ne cii er alakema nahan.+
32 Kpa m er msen m zamber sha ci wou, sha u jighjigh u nan wou a de ndôhôr ga yô;+ nahan we, zum u u hide* yô, taver anmgbianev ou asema.”+
33 Tsô a kaa a na ér: “Tere, a̱ lu ken purusu shin ken ku je kpa, me za a we imôngo!”+
34 Kpa a kaa ér: “Peteru, me kaa u, ikyegh ia lu a tôngo nyian ga je tsô, u tuna kwa tar wer u fam ga.”+
35 Shi a kaa a ve ér: “Shighe u m tindi ne la, ne za a ikpa i wan inyaregh shin ikpa i wan kwaghyan ga, shin akôv agen kpaa ga,+ kpa kwagh ban ne ga, shin yange ban ne?” Ve kaa ér: “Ei!”
36 Maa a kaa a ve ér: “Kpa hegen yô, or a̱ lu a ikpa i wan inyaregh shin ikpa i wan kwaghyan kpaa, nana tôô, shi or u nan lu a sanker ga yô, nana tee ikyondo i nan nana yam.
37 Me kaa ne, gba u kwagh u i nger la una kure sha a mo keng, ér, ‘I wa un ken mbaperenatindi.’+ Kwagh ne ngu kuren sha a mo hegen.”+
38 Tsô ve kaa ér: “Tere, nenge, usanker uhar mba heen.” Maa a gema a kaa a ve ér: “Mban kuma.”
39 Moughon yô, a gba yemen sha Uwo u Olev, er vanden eren nahan; mbahenen nav dondo un ijime.+
40 Za nyer hen ijiir la yô, a kaa a ve ér: “Eren nen msen sha er ne gba ken imeen ga yô.”+
41 Maa a undu ve a yem kuma er ka i ker iwen i za gba nahan, a za gure inya, a gba eren msen
42 kaan ér: “Tere, wea lumun yô, karem a iyongo ne sha. Nahan kpa, i de eren sha ishima yam ga, i er sha ishima you.”+
43 Tsô ortyom u sha va ande hen a na, gba taver un ishima.+
44 Kpa ishima za un iyol tsung, nahan a za hemen u eren msen kpoghuloo,+ je yô, iusa na hingir er ka aberawambe nahan, lu nôndon haan inya.
45 Va moughon ape lu eren msen la ze hen mbahenen yô, a kohol ve ve lu yaven, sha ci u ve zungwe je tume ve iyol.+
46 Maa a kaa a ve ér: “Er nan ne lu yavena? Mough nen sha za nen hemen u eren msen, sha er ne gba ken imeen ga yô.”+
47 Er lu lamen zan a mi ave la je, ikpelaior va nyôr, man lu or u i yilan ér Yuda, u lu môm ken Mbapuekaruhar la, lu hemen ve ye. Nahan a kar a za kohol Yesu, a suse un zwa.+
48 Kpa Yesu kaa a na ér: “Yuda, u ngu teen Wan u or sha u susen un zwaa?”
49 Mba ve lu a na la mba nengen kwagh u i soo u eren la yô, ve pine ér: “Tere, se gber ve sankere?”
50 Ugen ken a ve je yô, gber kpan u zegepristi sanker, bugh un tough ku iyanegh.+
51 Kpa Yesu kaa ér: “De nen nahan.” Maa a bende uwegh sha tough ku shon, a er ku hide ku lu her dedoo.
52 Yesu maa kaa a upristi mba tamen man mbavesen mba mbakuran tempel kua mbatamen mba ve va u va kôron un la ér: “Ne va u va kôron mo a usanker man igbough er ka ormbaiv yôô?+
53 Shighe u m luun vea ven ken tempel ayange ayange la,+ ne kôrom ga.+ Kpa ka shighe wen man shighe u tahav mbu imegh mbua tema tor je ne.”+
54 Tsô ve kôr un ve gba yemen a na+ hen ya u zegepristi, kpa Peteru dondo ve ijime lu van ken ica.+
55 Mba keer usu hen tembeya, mba tem her imôngo mba ngur ôson yô, Peteru tema her vea ve.+
56 Er Peteru tema hen iwanger i usu la yô, wankwase ugen u shiren tom hen ya la nenge a na, hide sôr kenger un, maa kaa ér: “Or ne kpa zenden vea na.”
57 Kpa a tuna, a kaa ér: “Kwase, m fa un ga.”
58 Shighe kar kpuaa yô, orgen shi nenge a na, maa kaa ér: “We kpa u ngu môm ken a ve.” Kpa Peteru kaa ér: “Ka mo ga, orne.”+
59 Shighe kar ka kom er ihwa nahan yô, orgen gba sendegh ôron ér: “Mimi je, or ne kpa yange zenden vea na, sha ci u ngu Orgalilia je ka ilian ga!”
60 Kpa Peteru kaa ér: “Orne, m fa kwagh u u lu ôron la ga.” Er lu lamen zan a mi ave la je, ikyegh maa tôngo.
61 Tsô Ter gema kenger sha Peteru jighilii, maa Peteru umbur kwagh u Ter kaa a na ne, ér: “Ikyegh ia lu a tôngo nyian ga je tsô, u vendam kwa tar.”+
62 Tsô a due ken won a za vaa tsung.
63 Tsô ior mba ve kôr Yesu mbara, gba nahan un tar+ shi tan un azu;+
64 mba yisan un ishigh yô, ve gba kaan ér: “Wea lu profeti yô, ôr se or u nan gbidye u la.”
65 Shi ve ôr akaa agen kpishi sha a na, sha ilyahan.
66 Sev mbu va aven yô, mbavesen mba nongoior la cii kohol imôngo,+ ka upristi mba tamen man mbangeren je la. Tsô ve yem a na hen atejir ve u Sanhederin* la, ve za kaa ér:
67 “Wea lu Kristu yô, ôr se.”+ Kpa a kaa a ve ér: “Luun er m ôr ne je kpa, mayange ma ne ne jighjigh ga.
68 Shi luun er m pine ne mpin kpaa, ma ne ne mlumun ga.
69 Kpa hii hegen je Wan u or+ una tema ken uwegh ku iyanegh ku ageegh ku Aôndo.”+
70 Maa ve cii ve pine ér: “Nahan u ngu Wan u Aôndo zee?” A gema a kaa a ve ér: “Ne ayol a en ne mba ôron ner m ngu Wan na.”
71 Tsô ve kaa ér: “Shi ka nyi i gbe se a mbashiadaa? Gadia se ayol a ase se ungwa kwagh ne sha zwa na.”+
