Sha Uwegh ku Luka 7:1-50
7 Yesu ôron ior kwagh u yange soo u ôron la been yô, a nyôr ken Kapenaum.
2 Orshoja u vesen ugen gema lu a kpan u doo un ishima tsung yô. Kpan la gba angev je lu nôngon ku.+
3 Ongo kwagh u Yesu yô, a tindi mbavesen mba Mbayuda mbagenev hen a na ér ve za kaa un a va bee kpan na angev.
4 Tsô ve va hen Yesu ve gba va zamber a na kaan ér: “A kuma u u er un kwagh ne,
5 sha ci u a soo kwagh u tar wase shi a maa se shinagoge.”
6 Tsô Yesu yem vea ve imôngo. Mba va zurum a ya la yô, ve zua a azende a orshoja shon. A tindi ve ér ve va kaa Yesu ér: “Orvesen, de ye ican wer u va ga, gadia m kuma u ú va hen ya wam ga.+
7 Ka nahan ve m nenge mer m kuma u van hen a we ga ye. Kpa ôr a ôr kwagh tseegh angev mbu bee wanye wam la.
8 Sha ci u mo kpa i verem m ngu sha ikyev i mbavesen av, shi m ngu a ushoja sha ikyev. Ka mea kaa a orshoja ngun mer, ‘Za heela!’ maa nan za je. Shi mea kaa a ugen mer ‘Va!’ maa nan va je; shi mea kaa a kpan wam mer, ‘Er ingin!’ maa nan er je.”
9 Yesu ongo akaa ne yô, kpiligh un iyol a na, nahan a gema a kenger ikpelaior i i dondo un ijime la, maa a kaa ér: “Me kaa ne, ken Iserael je kpa m ngu a zua a or u lun a jighjigh u nan kpishi nahan ga.”+
10 Mba i tindi ve la mba hidi hen ya yô, ve kohol kpan la lu dedoo.+
11 Ica kera gba ga maa a mough a gba yemen hen gar ugen, i yilan ér Nain, shi mbahenen kua ikpelaior i vesen lu zan a na imôngo.
12 Va zurum a hundagar yô, nenge! i tôô orkpen i lu duen a mi, man lu cii wan* u ngô na je la.+ Bee kera yô, ngô na lu kwasecôghol. Ior mba ken gar la kpishi lu vea kwase shon.
13 Ter nengen a kwase ne yô, kunya kôr un a na,+ maa a kaa a na ér: “De u vaan.”+
14 Tsô a kporom a za bende uwegh sha gambe u i tôô orkpen sha mi la, nahan mbatôôn mbara tile. Yesu maa kaa ér: “Wanyekwaor, m ngu kaan a we mer, mough sha!”+
15 Orkpen la maa nder tema sha, gba lamen. Yesu maa gema un na ngô na.+
16 Nahan mciem gba ve cii iyol, ve gba wuese Aôndo kaan ér: “Profeti u ageegh due hen a vese,”+ shi ve kaa ér, “Aôndo umbur ior nav hegen.”+
17 Nahan gwa na samber sha kwagh ne ken Yudia cii kua hen ningirtar la cii.
18 Tsô mbahenen mba Yohane za ôr un akaa ne cii.+
19 Nahan Yohane yila mbahenen nav uhar tindi ve ér ve za pine Ter ér: “Ka we u lu Un shon u i kaa ér ngu van la yee?+ Shin se veren ashe a orgen kposo?”
20 Mba ve hen a na yô, ve kaa ér: “Yohane u Eren Batisema tindi se hen a we ér se va pine u ser, ‘Ka we u lu Un shon u i kaa ér ngu van la yee? Shin se veren ashe a orgene?’”
21 Hen shighe* la a bee ior kpishi iangev,+ mba lun a iangev mbi vesen man mba lun a ujijingi mba bov kpaa, shi a na mbaapirashe kpishi hingir u nengen.
22 Tsô a kaa a ve ér: “Za pase nen Yohane akaa a ne nenge man a ne ongo la: Mbaapirashe mba nengen hegen+ shi mbaawanev mba zenden tsembelee. Mba wanger mbaamandev imande ve, shi mbaakondoato mba ungwan.+ Mba nderen mbakpenev shin ku, shi mba ôron mbaatsanev loho u dedoo.+
23 Saan or u nan zough a ityôkyaa ken a mo i nan nan gbeev mbu nôngon ga la iyol.”+
24 Ior mba Yohane tindi la mba hidi mba yemen yô, Yesu gba ôron ikpelaior la kwagh u Yohane, pinen ve ér: “Ka nyi yange ne lu zan ken taaikyôngo ner ne za nengee? Lu u za nengen a iyelegh ku ahumbe a daase a mi yôô?+
25 Tsô ka nyi yange ne lu zan ner ne za nenge? Lu u za nengen a or u haa akondo a taver ishe* iyol yôô?+ Kpa ka mba ve lu hen uya mba utor ve huan akondo a doonashe shi ve lun yôughyôugh ye.
26 Nahan, lu nyi ne za u za nengen a mi? Lu profeti shinii? Sha kpôô yô, lu profeti, man me kaa ne, a hemba profeti je kpaa.+
27 Ka un shon je i nger kwagh ne sha a na ye, ér: ‘Nenge, m ngu tindin orôron-loho wam una lu zan we sha hemen.* Una sôr u gbenda.’+
28 Me kaa ne, ken ior mba kasev ve mar cii, or môm ngu u nan hembe Yohane ga. Kpa or u hemban gban ijime ken Tartor u Aôndo nan hemba un.”+
29 (Ior cii kua mbangoholkpandegh mba ongo kwagh ne yô, ve wuese perapera u Aôndo, sha ci u lu Yohane er ve batisema ye.+
30 Kpa kwagh gba Mbafarishi man mbafan Tindi tsema tsema sha kwagh u Aôndo lu wan* ve la ga,+ sha ci u lu Yohane er ve batisema ga.)
31 “Man me kar ior mba hen kov ne sha unô? Mba er unô nahan jimi?+
32 Mba er mbayev mba kiriki mba ka ve tema sha tembekasua, ve kaan a mbayev mbagenev ér: ‘Se tôngo ne imar, kpa ne vine amar ga; se gber kwelegh, kpa ne vaa ga’ la nahan.
33 Yohane u Eren Batisema va lu yan beredi ga shi lu man wain ga,+ kpa ne kaa ner: ‘Ngu a jijingi u bo.’
34 Wan u or va, ngu yan kwagh shi man kwagh, kpa ne mba kaan ner: ‘Nenge, or ne ka or u wan hua, shi me wain kpishi. Ka ijende i mbangoholkpandegh kua mbaasorabo.’+
35 Nahan kpa, kwaghfan zough a ishô sha aeren a na cii.”*+
36 Orfarishi ugen zer lôhôn un iwer. Tsô a nyôr hen ya u Orfarishi la, a tema* a gba yan kwagh sha tebul.
37 Nahan kwase ugen u i fa un hen gar la cii ér eren asorabo yô, ungwa ér ngu yan kwagh hen ya u Orfarishi la, maa a va a mkurem ma human doon ken ikpe i alabasetu,+
38 a kar a va gure un ken ijime hen angahar, a gba vaan haan un mliam sha angahar, shi uman un angahar sha ice na i sha ityo. Shi lu susen un angahar, haan mkurem ma human doon mara sha a.
39 Orfarishi u lôhô un iwer la nengen nahan yô, a gba kaan ken ishima na ér: “Or ne una lu profeti mimi yô, ma a fe imba kwase i i lu benden a na ne, er i lu kwase u eren asorabo yô.”+
40 Kpa Yesu gema kaa a na ér: “Shimon, m soo u ôron we kwagh.” A kaa ér: “Ortesen, ôr!”
41 “Iorov uhar lu orgen a injô; u môm lu injô i udenariu* 500, ugen la di lu udenariu 50.
42 Mba zough a kwagh môm u kimbin un injô la ga yô, a de ve cii a mi. Nahan ka u han ken a ve u hen wer una hemba doon nan ishima?”
43 Shimon gema kaa a na ér: “M hen mer ka u a de un a injô i hemban ngeen la.” Maa a kaa a na ér: “U kaa vough.”
44 Nahan a gema a kenger kwase la, maa a kaa a Shimon ér: “U nenge kwase ne ga̱? M nyôr hen ya wou, kpa u nam mngerem ma ôôn angahar ga. Kpa kwase ne ôôm angahar sha mliam nam, shi a umam angahar sha ice na.
45 U susem zwa ga, kpa kwase ne yô, er ashen m nyer heen je, a mem u susen mo angahar ga.
46 U haam mkurem sha ityo ga, kpa kwase ne haam mkurem ma human doon shin angahar.
47 De me kaa u, sha ci u kwagh ne yô, shin er asorabo na a ngee nahan kpaa, i de un a,+ sha ci u a tese dooshima wuee. Kpa or u i de nan asorabo kpuaa yô, ka nan tese dooshima kpuaa di tsô.”
48 Maa a kaa a kwase la ér: “I de u asorabo ou.”+
49 Tsô mba ve lu yan kwagh a na sha tebul la gba pinen ayol a ve ér: “Or ne yô ka nyi or jim ve a den ior asorabo je kpaa?”+
50 Kpa a kaa a kwase la ér: “Ka sha jighjigh wou u nan i yima u ye,+ yem bem bem.”
