Sha Uwegh ku Luka 8:1-56
-
Kasev mba ve zenden vea Yesu yô (1-3)
-
Injakwagh i ortanivor (4-8)
-
Ityôkyaa i Yesu ôron kwagh sha anzaakaa yô (9, 10)
-
I pase injakwagh i ortanivor la (11-15)
-
Mba tsaren imenger mba cirin kwagh sha mi ga (16-18)
-
Ngô u Yesu man anmgbianev nav (19-21)
-
Yesu yange ijeverahumbe huan ving (22-25)
-
Yesu zenda azôv za nyôr ken igyo (26-39)
-
Wan u Yairu u kwase; kwase ugen bende a ikyondo i Yesu (40-56)
8 Ica kera gba ga maa a gba zenden nyôron ken agar a vesen man a kiriki, pasen loho u dedoo u Tartor u Aôndo.+ Mbapuekaruhar mbara lu a na imôngo,
2 kua kasev mbagenev mba i dugh ujijingi mba bov ken a ve shi i bee ve iangev yô. Ve yô, lu Maria u i yilan un ér Madalina, u yange i dugh ujijingi mba bov utaankaruhar ken a na la,
3 man Yoana+ kwase u Kuza, or u nengen sha ya u Herode, kua Susana man kasev mbagenev mba ve naan ve iwasen sha akaa a ve lu a mi la.+
4 Tsô zum u ikpelaior i vesen kohol vea mba ve lu zenden vea na imôngo sha agar agar la yô, a ôr ve injakwagh, a kaa ér:+
5 “Orsule ugen yar lu tan ivor. Er lu tan ivor la, igen haa sha kpegbenda, nahan i ndyar i angahar, shi inyon i purugh va ya i.+
6 Igen haa sha vande, kpa ngi menden yô, i use sha ci u i zua a mndorom ga.+
7 Igen haa ken usaa, nahan usaa mba ve mende a i imôngo la, imbishi i.+
8 Kpa igen haa sha inya i dedoo, nahan ngi menden yô, i ume atam hemba er yange i lôô la kwa 100.”+ Ôron akaa ne been yô, a ôr genger genger ér: “Or u nan lu a ato a ungwan yô, nana̱ ungwa.”+
9 Kpa mbahenen nav kaa a na ér a̱ pase ve injakwagh la.+
10 Nahan a kaa ér: “Ne yô, i na ne sha u ne kav akaamyer a sha kwagh u Tartor u Aôndo, kpa mbagenev cii yô, vea ungwan anzaakaa di tsô,+ sha er vea̱ lu nengen, kpa vea nenge a kav ga, shi vea̱ lu ungwan, kpa vea ungwa a kav inja i kwagh shon ga yô.+
11 Ka kwagh u injakwagh ne i lu ôron je ne: Ivor la ka loho u Aôndo.+
12 Ivor i i hee sha kpegbenda la ka ior mba ka ve ungwa loho la, maa Diabolo a va dugh loho shon u i lee ken asema a ve la kera, sha u ve̱ de ne jighjigh, ve̱ zuan a myom ga la.+
13 Ivor i i hee sha vande la di, ka ior mba ka ve ungwa loho la, ve ngohol u a iember, kpa ve wa amise ga la. Ka ve na jighjigh sha anshighe kpuaa, kpa vea va tagher a imeen yô, maa ve gba.+
14 Ivor i i hee ken usaa la yô, ka ior mba ka ve ungwa loho la, kpa akaa a nyian ishima man inyaregh+ kua msaanyol u uma ne a dan ve la.+ Akaa ne ka a imbishi ve, nahan ve fatyô u vesen ga.+
15 Gema ivor i i hee sha inya i dedoo la yô, ka ior mba ka ve ungwa loho la a ishima i mimi+ shi ve wa ishima a mbamzeyol, ve ume atam la.+
16 “Or môm kpa nan tsaren imenger nan cirin ikyagh sha mi, shin nan gem nan we shin ityôgambe ga, kpa ka nan penda i̱ sha daarimenger,* sha er mba ve nyer ken iyou la vea nenge a iwanger yô.+
17 Kwagh môm u a lu myer, u una va due ken igbar ga je kpa ngu ga. Shi ma kwagh u i yer kpile kpile, u a va fa un ga, shi una due ken igbar ga je kpa ngu ga.+
18 Sha nahan yô, ver nen ishima sha kwagh u ne lu ungwan ne, gadia or u nan lu a kwagh yô, a seer nan,+ kpa or u nan lu a mi ga yô, kwagh u nan hen ér nan ngu a mi la je kpa a ngohol hen a nan kera.”+
19 Hen shighe ne, ngô na man anmgbianev nav+ za va hen a na, kpa ve fatyô u zan ikyua a na ga, sha ci u ikpelaior lu a na.+
20 Tsô i kaa a na ér: “Ngôu man anmgbianev ou va tile ken won, ve soo u nengen a we.”
21 A gema a kaa a ve ér: “Ka ior mba ve ungwan loho u Aôndo shi ve eren sha mi mban ve lu ngôm man anmgbianev av ye.”+
22 Sha iyange igen la, un vea mbahenen nav ve nyôr tso, nahan a kaa a ve ér: “Se per nen ber yande la.” Maa ve mough.+
23 Kpa mba ngur yemen yô, a za gba mnyam. Tsô ijeverahumbe va ta sha ber la, maa mngerem gba kpianger haan shin tso, je lu nôngon u urun.+
24 Nahan ve za nder un, ve gba kaan ér: “Ortesen, Ortesen, se mba nôngon u saan!” Nahan a mough a yange ahumbe kua agôndoamnger la, maa huan ving.+
25 Tsô a kaa a ve ér: “Jighjigh u nan wen ngu hana?” Kpa mciem gba ve iyol, ve gba ôron kwagh ayol a ve kaan ér: “Or ne yô ka an jimi? Ahumbe kua mngerem je kpa mba ongo imo na.”+
26 Tsô ve za due sha kpetar yande la hen haregh u Gerasene,+ Galilia gema lu yande ne.
27 Yesu dugh sha tar yô, orgen ken gar la u azôv nzughul a na yô, va kohol un. Or ne kera hua ikyondo iyol ga ica i gba, shi tsaan ken iyou ga, a lu hen iwar i mbakpenev.+
28 Nengen a Yesu yô, a ngor a va gba hen ishigh nagh, maa a ôr genger genger ér: “Yesu, Wan u Aôndo u Hemban Cii, ka nyi i zuam a wee? M zamber we, de eren mo ican ga.”+
29 (Sha ci u Yesu lu kaan a jijingi u bo* la ér a due ken or shon kera. Yange a zer nzughul a na,+ nahan a̱ kange un mshirim shi a̱ haa un ahye, shi a̱ ver ior vea kuran un kpa, a tôndo ikyangenev mbi shon, azôv la a yem a na hen ajiir a or lu her ga yô.)
30 Nahan Yesu pine un ér: “Iti you ér ana?” Maa a kaa ér: “Ikpela,” sha ci u ujijingi mba bov kpishi nyôr ken a na.
31 Nahan ve zer zamber a na ér, a de kaan ér ve yem shin ihyungwa i i ze kweng la ga.+
32 Ikpela-igyo+ gema lu yan kwagh her sha uwo. Nahan ve zamber a na ér a̱ na ve ian i nyôron ken igyo la, tsô a na ve ian.+
33 Nahan ujijingi mba bov mbara due ken or la za nyôr ken igyo la, maa ikpela-igyo la cii hembe ayem za osough sha kurugh ku ijem haa shin ber, kpe shimi.
34 Kpa mbakuranigyo mbara mba nengen kwagh u er la yô, ve yevese ve za ôr ken gar kua hen ningirtar la cii.
35 Tsô ior due u va nengen kwagh u za hemen la. Mba ve ape Yesu lu la yô, ve nenge or u i zenda azôv ken a na kera la hua akondo iyol, tema hen angahar a Yesu lu eren kwagh sha inja, nahan cier ve iyol.
36 Mba ve nenge kwagh ne sha ashe a ve la ôr ve er i er man or u yange azôv lu ken a na la a hingir dedoo yô.
37 Nahan zegeikpelaior i hen haregh u Gerasene la kaa a Yesu ér a due hen ijiir ve kera, sha ci u mciem gba ve iyol. Tsô a za nyôr tso ér una yem.
38 Kpa or u ujijingi mba bov due ken a na la, zer zamber a na ér una yem vea na, kpa a gema a na or shon gbenda ér a yem, a kaa ér:+
39 “Hide yem ken ya, za ôr hanma or cii kwagh u Aôndo a er a we ne.” Nahan a yem a gba za yôôn kwagh u Yesu er a na ne ken gar la cii.
40 Yesu hidi yô, ikpelaior ngohol un doo doo, sha ci u ve cii ve lu veren ashe a na.+
41 Kpa orgen za va, i yilan un ér Yairu; lu orhemen u shinagoge. A va yav inya hen ishigh ki Yesu, a gba zamber a na ér a va hen ya na,+
42 sha ci u wan na u kwase u kuman anyom 12 nahan, gba angev je lu nôngon ku, man lu cii wan na* je la.
Er Yesu lu yemen sha gbenda la, ikpelaior lu imbishi un.
43 Kwase ugen gema lu, u tsa a angev mbu haan awambe+ anyom 12 yô. Or môm fatyô u sôron un mbu ga.+
44 A za va un ken ijime, a va bende a tsumbur u ikyondo na,+ nahan fese je maa awambe la de u haan.
45 Tsô Yesu pine ér: “Ka an nan bende a mo?” Ve cii mba ngur tunan yô, Peteru kaa ér: “Ortesen, ikpelaior ngi imbishi we shi tan sha a we.”+
46 Kpa Yesu kaa ér: “Or bende a mo, sha ci u m fa er tahav+ mbu dugh ken a mo yô.”
47 Kwase la nengen ér i fa kwagh u un er la yô, a va gba inya sha ishigh ki Yesu, lu gbidyen ikyarkyase iyol, maa a ôr sha ishigh ki ior cii, er i hii ve un bende a na yô, man er angev nav mbu bee her ave ave je yô.
48 Kpa Yesu kaa a na ér: “Wan wam, ka sha jighjigh u nan wou angev ou mbu bee ye. Yem bem bem.”+
49 Er lu ôron kwagh zan a mi ave la je, orgen hen ya u orhemen u shinagoge la va kaa ér: “Wan wou u kwase la kpe! Ityôkyaa kera ngi i zan Ortesen iyol ga.”+
50 Yesu ongo nahan yô, a kaa a na ér: “I̱ de ze u iyol ga,* na jighjigh di tsô, nahan a war un.”+
51 Za nyer hen ya la yô, a lumun ér orgen nana nyôr ken iyou la vea na ga, saa Peteru man Yohane man Yakobu, kua ter u wankwase la man ngô na tseegh.
52 Kpa ior cii lu vaan shi zungwen ku u wankwase la. Nahan Yesu kaa ér: “De nen u vaan,+ gadia a kpe ga, ka mnyam a lu yaven ye.”+
53 Tsô ve gba sen un ibumegh, sha ci u ve fa er a kpe yô.
54 Tsô a gba un sha uwe a kaa ér: “Wana, mough sha!”+
55 Maa iôôn*+ na hide her, nahan her ave ave je a mough sha,+ Yesu maa kaa ér i na un kwagh a ya.
56 Nahan saan mbamaren nav iyol, kpa Yesu ta ve icin ér ve de ôron or môm kwagh u a er la ga.+
