Sha Uwegh ku Luka 9:1-62

  • I tese Mbapuekaruhar kwagh u vea er ken kwaghpasen yô (1-6)

  • Kwagh u Yesu lan Herode ishima (7-9)

  • Yesu na iorov 5,000 kwaghyan (10-17)

  • Peteru pase er Yesu a lu Kristu yô (18-20)

  • Yesu tsengaôron kwagh u ku na (21, 22)

  • U lun orhenen u mimi (23-27)

  • I gema mluyol u Yesu (28-36)

  • Yesu zenda azôv ken wannomso ugen (37-43a)

  • Shi Yesu tsengaôron kwagh u ku na (43b-45)

  • Mbahenen gba anyiman sha kwagh u or u hemban (46-48)

  • Or u nan hendan a vese ga yô, nan ngu or wase (49, 50)

  • I venda Yesu hen angar u Mbasamaria ugen (51-56)

  • Er a dondo sha Yesu yô (57-62)

9  Tsô a yila Mbapuekaruhar mbara va kohol imôngo, maa a na ve tahav kua ian i dughun ujijingi mba bov+ shi been hanma inja i uange cii.+ 2  Shi a tindi ve ér ve za pase loho u dedoo u Tartor u Aôndo shi ve bee ior iangev. 3  A kaa a ve ér: “De tôôn nen kwagh môm sha ci u zende ne ga, gbough ga shin ikpa i wan kwaghyan shin beredi shin inyaregh ga; shi de tôôn nen akondo ahar* ga.+ 4  Kpa hanma ijiir i ne ze cii, nea za nyôr hen ma ya yô, lu nen her zan zan ne kar moughon her.+ 5  Man hanma gar u ior ve ngohol ne her ga cii, ne moughon her yô, kure nen ihyundu i shin angahar a en, nahan i lu shiada sha a ve.”+ 6  Tsô ve due ve gba zenden sha agar a kiriki a hen haregh la, pasen loho u dedoo shi been ior iangev hanma ijiir cii.+ 7  Herode* u lu hemen haregh* shon la ungwa hanma kwagh u lu zan hemen yô, nahan lan un ishima kpishi, sha ci u mbagenev lu ôron ér i nder Yohane shin ku,+ 8  kpa mbagenev di yô, lu ôron ér Eliya hide va, mbagenev di lu kaan ér môm ken uprofeti mba ngise mbara nan nder.+ 9  Herode kaa ér: “Yange m gber Yohane ityough.+ Nahan, or u m lu ungwan ambaakaa ne sha a nan la ka ana?” Tsô a gba keren ér ma un nenge a na.+ 10  Mbaapostoli mba hidi yô, ve ôr Yesu akaa a ve za er la cii.+ Maa a mough vea ve, ve yem hen gar u i yer ér Beteseida la ve tseegh.+ 11  Kpa ikpelaior fe kwagh ne yô, ve dondo un ijime. Nahan a ngohol ve sar sar, a gba lamen a ve sha kwagh u Tartor u Aôndo, shi a bee mba ve lu dedoo ga la iangev.+ 12  Iyange va ngur miren yô, Mbapuekaruhar mbara va hen a na, ve va kaa a na ér: “Na ikpelaior ian ve̱ yem ken uya man agar a kiriki a hen ningir ne, ve̱ za ker ijiir i tsan shi ve yam kwaghyan, gadia ijiir i se lu her ne gba ica a gar.”+ 13  Kpa a gema a kaa a ve ér: “Ne na nen ve kwagh ve ya.”+ Ve kaa ér: “Se mba a kwagh heen hemba ikpenberedi itian kua ishu ihiar ga, saa se za yam kwaghyan sha ci u ior mban cii di je.” 14  Gadia nomso lu er 5,000 nahan. Kpa a kaa a mbahenen nav ér: “Kaa nen ve ve̱ tema inya akum akum, hanma ikyum i kuma er iorov 50 nahan.” 15  Tsô ve er nahan, ve ôr ve cii ve tema inya. 16  Tôôn ikpenberedi i itian la man ishu i ihiar la yô, a gema a kenger sha a er msen.* Maa a coon a gba nan mbahenen nav ér ve za na ikpelaior la. 17  Nahan ior cii ya kuma ve, shi ve kohol avur a a neer yô, iv akese 12.+ 18  Va ngur eren msen tswen yô, mbahenen va hen a na, nahan a pine ve ér: “Ior mba kaan ér m ngu ana?”+ 19  Ve kaa ér: “Ka ve kaa ér u ngu Yohane u Eren Batisema, kpa mbagenev ka ve kaa ér u ngu Eliya, mbagen di ér ka môm ken uprofeti mba ngise mbara nan nder ye.”+ 20  Maa a pine ve ér: “Ne yô, ne mba kaan ner m ngu ana?” Peteru kaa ér: “U ngu Kristu u Aôndo.”+ 21  Tsô a ta ve icin gbang gbang ér ve de ôron or môm kwagh ne ga.+ 22  Kpa a gema a kaa ér: “Gba keng u Wan u or una ya atsan kpishi, shi mbatamen man upristi mba tamen kua mbangeren vea venda un shi a wua un,+ kpa sha iyange i sha utar la, a nder un shin ku.”+ 23  Tsô a gba kaan a ior cii ér: “Aluer or soo u dondon mo yô, nana̱ nyiman iyol i nan*+ nana̱ tôô kon* u nan nana̱ dondon mo ayange ayange.+ 24  Gadia hanma or u nan keren ér nana war uma u nan yô, una saa nan. Kpa or u uma u nan a saa nan sha ci wam yô, ka nan nana war un ye.+ 25  Mimi je, aluer or zua a tar cii kpa uma u nan gema saa shin nan tim yô, a lu nan a inja sha nyi?+ 26  Gadia or u nana cia ashe sha kwagh wam man mkaanem am cii yô, Wan u or una cia ashe sha kwagh u nan, zum u una va ken iengem na man i Ter na kua i uicighanmbatyomov la.+ 27  Kpa mimi je me kaa ne, mbagenev ken mba ve til heen ne vea nenge a ku ashe ga, zan zan vea vande nengen a Tartor u Aôndo.”+ 28  Yange ôr akaa ne ayange nga kar er anigheni nahan yô, a mough vea Peteru man Yohane kua Yakobu, ve yem sha uwo u za eren msen.+ 29  Er lu eren msen la, mlu u ishigh nagh gema, shi akondo a na hingir pupuu segh segh. 30  Yô nenge! iorov uhar gba lamen vea na; lu Mose man Eliya. 31  Mluashe ve wanger er ka usu u mondon nahan, ve lu ôron er Yesu una va yem man er i gbe u kwagh ne una er nahan vough ken Yerusalem yô.+ 32  Hen shighe ne, mnyam kôr Peteru kua mba ve lu a na imôngo la, kpa mnyam ma va wanger ve ashe yô, ve nenge a na ken iengem na,+ shi ve nenge iorov uhar tile vea na. 33  Ior mba shon mba undun Yesu mba ngur yemen yô, Peteru kaa a na ér: “Ortesen, doo kpishi er se lu heen yô. De se tim atumbe atar, i môm sha ci wou, i môm sha ci u Mose, igen di sha ci u Eliya.” Peteru lu ôron kwagh ne, kpa fa kwagh u lu ôron la ga. 34  Kpa er lu ôron kwagh ne zan a mi a ve la, ibyeenegh wa, gba cirin ve. Ibyeenegh kira ki cirin ve cii yô, cier ve iyol. 35  Maa imo+ due ken ibyeenegh kira kaa ér: “Ngun ka Wan wam u m tsough yô.+ Ungwan nen un.”+ 36  Imo la ngi er nahan yô, ve nenge a Yesu tswen. Kpa ve lu ving, ve ôr or môm kwagh u ve nenge ne ga, sha ayange la cii.+ 37  Mba hongo sha uwo yô, kpernan ikpelaior i vesen va kohol un.+ 38  Tsô orgen ken ikpelaior la kaa ér: “Ortesen, m zamber we, nenge wan wam u nomso ne a lu, man ka cii wan wam je ne.+ 39  Man nenge jijingi u bo ka a mough un, ica a gbaan ga yô, a gba ngoron. Ka a er un a gba ikyungu, a mbua hugh zwa, shi ka i taver u a de un, saa ka a er un a tôndo avav iyol. 40  M zamber a mbahenen ou mer ve zenda un ken a na kera, kpa ve fatyô ga.” 41  Yesu gema kaa ér: “Kpash! Kov u banen a jighjigh man u hemban ato ne.+ Me lu a ven a kuma nena je man ne lu a jighjigh u nan sha wono? M̱ wa ishima a ven i̱ kuma nan je? Va a wan wou heen.”+ 42  Kpa wan la ngur van yô, jijingi u bo ne ta un inya sha agee shi na a gba ikyungu. Nahan kpa Yesu yange jijingi u bo la taver taver shi zenda un ken wannomso la kera, maa a gema un a na ter na. 43  Nahan kpiligh ve iyol tsung a tahav mbu Aôndo. Akaa a yange lu eren ne cii nga gbe kpiligh ve cii iyol yô, a kaa a mbahenen nav ér: 44  “Kegh nen ato tsembelee, shi umbur nen mkaanem man, gadia ka u a za zua zwa a na Wan u or sha ikyev i ior, vea wua un.”+ 45  Kpa ve kav inja i kwagh u lu ôron ne ga. Jighilii yô, i yer ve a mi sha u ve̱ de kaven ga yô, shi cier ve iyol u pinen un kwagh sha kwagh u lu ôron la. 46  Tsô ve gba anyiman sha kwagh u or u nan hembe ken a ve yô.+ 47  Yesu kaven kwagh u ve lu henen ken asema a ve la yô, a yila wanye u cuku va tile un hen ikyooso. 48  Maa a kaa a ve ér: “Hanma or u nana ngohol wan u cuku ne ken iti yam yô, ka mo je nan ngohol ye; shi hanma or u nana ngohol mo yô, nan ngohol ka mo tseegh ga, nan ngohol Un u a tindim la kpaa.+ Gadia ka or u nan hembe gban ijime ken a ven cii la nan hembe ye.”+ 49  Yohane gema kaa a na ér: “Ortesen, se nenge orgen lu zendan azôv ken ior kera ken iti you, kpa se venda a na, sha ci u ngu or wase ga.”+ 50  Kpa Yesu kaa a na ér: “De yangen nen un ga, sha ci u or u nan hendan a ven ga yô, nan ngu or wen.” 51  Ayange nga va zurum u a yem a na sha yô,+ a kange ishima u yemen ken Yerusalem. 52  Nahan a tindi ior nav mbagenev ér ve hemen a na. Tsô ve za nyôr ken gar u kiriki ugen u Mbasamaria sha u vea za wa ago iyol sha mve na. 53  Kpa za ve yô, i ngohol un her ga,+ sha ci u a kange ishima u yemen ken Yerusalem. 54  Mbahenen nav, Yakobu man Yohane,+ mba nengen kwagh ne yô, ve kaa ér: “Tere, u soo wer se yila usu u sen sha aôndo u va hia ve keraa?”+ 55  Kpa a gema a kenger ve, maa a venda a ve. 56  Tsô ve kar ve yem hen angar ugen. 57  Er ve lu yemen sha gbenda la, orgen kaa a na ér: “Hanma ijiir i u lu zan cii, me dondo u.” 58  Kpa Yesu kaa a na ér: “Atsôngo nga a ubar, shi inyon i sha ngi a aya, kpa Wan u or yô ngu a ape suur ityough ga.”*+ 59  Maa a kaa a orgen ér: “Dondom.” Or la gema kaa ér: “Tere, nam ian m za vande iin terem man me hide ye.”+ 60  Kpa Yesu kaa a na ér: “De mbakpenev+ ve ii mbakpenev vev, kpa we yem za pase kwagh u Tartor u Aôndo hanma ijiir cii.”+ 61  Orgen shi kaa ér: “Tere, me dondo u, kpa vande nan mo ian m za lôhô mba hen ya wam ayem.” 62  Yesu kaa a na ér: “Hanma or u nan ker ave sha ikyekye i kahan kwagh man nan lu geman ashe ijime yô,+ nan kuma u nyôron ken Tartor u Aôndo ga.”+

Ngeren mba shin kpe

^ Shin “ikyondo igen.”
^ Ka Herode Antipa je la. Nenge Ngeren u Pasen Asember.
^ Zwa Grika, “teteraki.”
^ Zwa Grika, “a haa iveren sha mi.”
^ Shin “gba u nana kera lu uma sha ci u nan iyol i nan ga.”
^ Shin “ngu a ya ga.”

Copyrights for this publication