Sha Uwegh ku Marku 13:1-37
13 Ngur duen ken tempel yô, orhenen na ugen va kaa a na ér: “Ortesen, nenge awen ne kua ayou ne cii a doo sha wono!”+
2 Kpa Yesu kaa a na ér: “U nenge uzegembaayoughov mban ga̱? Awen ne cii, a va yôhôr a a haa inya. Iwen i môm kpa ia kera tema sha igen ga.”+
3 Tsô a za tema sha Uwo u Olev hen ape lu nengen a tempel yô, maa Peteru kua Yakobu man Yohane man Anderia za va ve tseegh, ve va pine un ér:
4 “Ôr ase se yôô, ka hanma shighe akaa ne aa ere? Man ka nyi ia lu ikyav i tesen ér shighe u mkur u akaa ne cii zurumu?”+
5 Tsô Yesu gba ôron a ve ér: “Ver nen ishima, or a de tsughun ne ga.+
6 Ior kpishi vea va ken iti yam, vea lu kaan ér, ‘Ka mo m lu un ye,’ nahan vea tsugh ior kpishi.
7 Shi aluer ne va ungwa kwagh u ityav mbi nôngon sha ajiir kposo kposo kpa, i de cier ne iyol ga; akaa ne aa er keng, kpa mkur una lu a va ga.+
8 “Gadia ikyurior igen ia mough ityav a ikyurior igen, shi tartor ugen ua mough ityav a tartor ugen;+ tar ua tenger sha ajiir kposo kposo; shi ijen ia gba sha ajiir wue wue.+ Akaa ne ka di mhii u ican* tsô.+
9 “Kpa ne yô, wa nen ikyo sha ayol a en. Ior vea za a ven ken mbaatejir vev,+ a gbidye ne ken ushinagoge+ shi a za a ven sha ishigh ki ugomna man utor sha ikyaa yam, sha er a lu shiada hen a ve yô.+
10 Shi a vande pasen loho u dedoo hen akuraior cii.+
11 Nahan zum u i lu zan a ven hen atejir yô, ishima i de nyian ne sha kwagh u ne za ôr ga; kpa hanma kwagh u a na ne u ôron hen shighe* la cii yô, ôr nen, sha ci u ka ne ne lamen ga, kpa ka icighan jijingi a lamen ye.+
12 Heela tseegh ga, or nana na anmgbian u nan ér i wua, ter kpaa nana na wan u nan, shi mbayev vea mough num a mbamaren, vea na a wua ve.+
13 Shi ior cii vea kôr ne ihyom sha ci u iti yam.+ Kpa ka or u nan taver ishima zan zan mkur la+ a yima nan ye.+
14 “Nahan kpa, zum u ne nenge kwagh u ndôhôrshima u van a mtim+ una tile hen ijiir i ma a til ga la yô (or u ôron nana ver ishima sha er nana kav yô), mba ve lu ken Yudia ve hii u yevese yemen sha iwo.+
15 Or u nan lu sha ityough ki iyoughough yô, nana̱ de hongo shin inya shin nyôron ken iyou ér nana tôô ma kwagh ga.
16 Shi or u nan lu ken ityev kpaa nana̱ de hidi ér nana va tôô ikyondo i nan i haan iyol ga.
17 Sha ayange la, kwagh a tser kasev mba ve lu iyav man mba ve lu a anikyundanev sha ave yô!+
18 Eren nen msen kwagh ne a̱ de va eren sha shighe u wuhegh* ga.
19 Gadia ayange la a lu ayange a ican,+ man a lu ican i Aôndo a gbe tar je i lu a er ga zan zan saa sha shighe la, shi mayange je ia kera er ga yô.+
20 Jighilii yô, luun er Yehova* pande ayange la ga yô, or môm kpa ma i yima nan ga. Kpa sha ci u mba a tsough ve la yô, a pande ayange shon.+
21 “Shi hen shighe la, aluer or kaa a ven ér, ‘Nenge! Kristu ngun,’ shin ‘Nenge! Ngula heela la,’ kpa de ne nen jighjigh ga.+
22 Sha ci u Ukristu mba aiev man uprofeti mba aiev vea due+ vea er uivande man akaa a kpilighyol, sha u aluer ve fatyô yô, vea tsugh mba i tsough ve la yô.
23 Nahan yô, ver nen ishima.+ M tsengaôron ne hanma kwagh.
24 “Kpa sha ayange la, zum u ican la ia kar kera yô, ime ia wa, sha ci u iyange ia kera due ga, shi uwer kpa ua ta ga,+
25 shi asan aa lu osough sha haan; shi tahav mbu mbu lu sha la mbua tenger.
26 Maa vea nenge Wan u or+ una gba van sha abeen a tahav mbu kpilighyol man iengem.+
27 Tsô una tindi mbatyomov vea kohol ior nav mba a tsough ken avegher a tar a anyiin la cii imôngo, a hii ken ikighir i tar zan zan a ar sha ikighir i kwavaôndo.+
28 “Nahan yô, hen nen kwagh ne sha kwagh u kon u tur: Ka ua ta gbaa u he shi ikya ia hiin u hômon sha mi yô, ne fa je ner fam zurum.+
29 Ne kpa zum u ne nenge akaa ne aa nguren eren yô, fa nen je ner ngu ikyua sha ihinda je.+
30 Mimi je me kaa ne, kov ne ua kar kera ga zan zan akaa ne cii aa kar eren.+
31 Sha man tar vea kar kera,+ kpa kwaghôron wam yô, una kar kera mayange ga.+
32 “Kpa iyange la shin ihwa la yô, or môm fa ga, mbatyomov mba shaav kpa fa ga, Wan kpa fa ga, ka Ter tseegh a fe ye.+
33 Yô lu nen per, kuran nen,+ sha ci u ne fa shighe u i ver la ga.+
34 Ka inja er or u a lu undun ya na yemen zende ken tar u icaa ve a ne ikpan na tahav,+ shi a ne hanma ve tom u nana er, maa a kaa a orkuranhunda ér a kuran nahan.+
35 Nahan yô, kuran nen, sha ci u ne fa shighe u orya la a lu hiden ga,+ a̱ lu aikighe shin atôutu shin cii man sev mbua av* shin pepe pepe kpaa ga,+
36 sha er a de hiden aburabur, a va kohol ne yaven ga yô.+
37 Kpa kwagh u m ôr a ven ne, m ngu ôron a ior cii, mer: Kuran nen.”+
