Sha Uwegh ku Marku 12:1-44
12 Tsô a gba ôron ve kwagh sha anzaakaa, a kaa ér: “Orgen er sule u wain,+ nahan a wa u igyar ningir tser, shi a time ihyungwa i shoghor wain shi a maa iyou i taven gôgônan ker.+ Tsô a gema u a wa mbatomov sha ikyev, a mough a yem zende ken tar u icaa.+
2 Shighe va kom yô, a tindi kpan na ugen hen mbatomov mbara ér ve pande atam a wain ve na un.
3 Kpa ve kôr un ve gbidye, shi ve zenda un a hide a kwagh ga.
4 Tsô shi a tindi kpan ugen hen a ve. Ngun yô, ve gber un ivav sha ityo shi ve hee un.+
5 Shi a tindi ugen kpaa. Kpa ngun yô, ve wua un. Shi a tindi mbagenev kpishi, kpa ve gbidye mbagen, ve wua mbagenev.
6 Orgen shi her, lu wan na u ishima ishima.+ A mase tindin un hen a ve, a kaa ken ishima na ér, ‘Wan wam yô, vea na un icivir.’
7 Kpa mbatomov mbara kaa ker ayol a ve ér, ‘Ngun ka wan u una va ya dyako je ne.+ Va se wua un nen, nahan dyako la a̱ hingir u wase!’
8 Tsô ve kôr un ve wua, ve kpela ve due a mi ken sule u wain la kera.+
9 Nahan or u a lu a sule u wain la una er nena? Una va wua mbatomov mbara, una gema sule u wain la una na mbagenev.+
10 Ne ôr kwagh ne ken ruamabera gaa? I nger ér, ‘Iwen i mbamaankwagh ve vende i la, i hingir iwen i hange hange i sha zongo.+
11 Kwagh ne due ka hen Yehova,* man ka kwagh u kpilighyol sha ashe ase.’”+
12 Mba ongo kwagh ne yô, ve soo u kôron un, sha ci u ve kav er lu ve je lu ôron injakwagh la sha a ve yô, kpa ve cia ikpelaior. Nahan ve undu un ve yem kwagh ve.+
13 Tsô Mbafarishi za tindi Mbafarishi mbagenev kua mbapatii mba Herode hen a na sha u vea nôngo vea kôr un a ikyaa zwa yô.+
14 Mba ve yô, ve kaa a na ér: “Ortesen, se fa u ngu or u mimi shi u keren u doon ityough a or ga, sha ci u u nengen sha mlu u or u sha iyol la ga, kpa u tesen ior gbenda u Aôndo sha mimi. Nahan, u tan Shisar kpandegh la ka shami* shin ka shami ga?
15 Se̱ ta, shin se̱ de te ga?” Kaven atseregh a ve la yô, a kaa a ve ér: “Er nan ne karen mo? Vam nen a denariu* m nenge.”
16 Tsô ve va a mi môm, maa a pine ve ér: “Ka ityough ki an ki lu sha mi nee? Man iti i i lu sha mi ne ka i ana?” Ve kaa a na ér: “Ka i Shisar.”
17 Yesu maa kaa a ve ér: “Na nen Shisar akaa a a lu a Shisar la,+ kpa akaa a a lu a Aôndo yô, na nen Aôndo.”+ Nahan kpiligh ve iyol a na.
18 Tsô Mbasadushi, mba ve kaan ér mnder u shin ku ngu ga la,+ va pine un ér:+
19 “Ortesen, Mose yange nger se tindi ér aluer anmgbian u or kpe undu kwase, kpa nan mar wan ga yô, anmgbian u or shon a tôô kwase u nan undu la, a mar wan a mi sha ci u nan.+
20 Ior mbagenev utaankaruhar lu anmgbianev. U hiihii la vôso kwase, kpa lu a mar wan ga tsô kpe.
21 U sha uhar la maa tôô kwase la, kpa va kpe undu wan ga, u sha utar la kpa nahan.
22 Ve mba utaankaruhar mbara cii ve kpe ve undu wan ga. Ken masejime yô, kwase la kpa kpe.
23 Nahan sha shighe u mnder u shin ku la, una lu kwase u ana? Gadia hanmô ken ve mba utaankaruhar mbara cii yange nan vôso un.”
24 Yesu kaa a ve ér: “Ka nahan man ne tsum ye gaa? Sha ci u ne fa Ruamabera ga, shi ne kav tahav mbu Aôndo kpaa ga.+
25 Gadia a va nder ior shin ku yô, nomso vea er kasev ga, shi kasev kpa a na ve noov ga, kpa vea lu er mbatyomov mba shaav nahan.+
26 Kpa sha kwagh u nderen mbakpenev la yô, ne ôr ken takeda u Mose, hen ijiir i i ôr kwagh u ageva la gaa? Aôndo yange kaa a na ér: ‘M ngu Aôndo u Aberaham man Aôndo u Isaka man Aôndo u Yakob.’+
27 Un ka Aôndo u mbakpenev ga, kpa ka u mbaumav. Ne tsume kpishi je.”+
28 Orgen ken mbangeren va her, nahan ungwa er ve lu nyiman kwagh a na yô. Nengen er a ne ve mlumun u vough nahan yô, a pine un ér: “Ken Atindi cii, ka tindi u han a lu u hiihii?”*+
29 Yesu kaa ér: “U hiihii yô ér, ‘Kegh ato, we Iserael, Yehova* Aôndo wase ka Yehova* tswen,
30 nahan yô, Yehova* Aôndo wou a̱ doo u ishima a ishima you cii man a uma wou cii man a mhen wou cii man a agee a ou cii.’+
31 U sha uhar yô, ka un ne, ‘Or u wan ndor a we nana̱ doo u ishima er iyol you nahan.’+ Tindi ugen môm hemba atindi a ahar ne ga.”
32 Orngeren la kaa a na ér: “Ortesen, u ôr doo, man ka mimi kpaa, ‘Ngu Môm tseegh, dugh un kera yô, mô ugen ngu ga’;+
33 shi aluer a doo or ishima a ishima i nan cii man a mfe u nan cii man a agee a nan cii, shi or u wan ndor a nan doo nan ishima er iyol i nan nahan yô, hemba nagh ku nanden kua iniav mbigen ica je.”+
34 Yesu nengen er a lam sha kwaghfan nahan yô, a kaa a na ér: “U ngu ica a Tartor u Aôndo ga.” Kpa or ve môm kera cihi pine un kwagh ga.+
35 Nahan kpa, er Yesu lu tesen ken tempel her la je, a kaa ér: “Er nan ve mbangeren ka ve kaa ér Kristu ka wan u Davidi?+
36 Icighan jijingi yange mgbegha+ Davidi iyol na kaa ér: ‘Yehova* kaa a Terem ér: “Temam ken uwegh ku iyanegh zan zan me kar veren mbahyomov ou shin angahar a ou.”’*+
37 Davidi iyol na yange yila un ér Ter, nahan a er nan ve una lu wan u Davidi?”+
Ikpelaior i vesen la kegh ato, doo ve u ungwan kwaghôron na.
38 Shi er lu tesen la, a kaa ér: “Wa nen ikyo sha kwagh u mbangeren mba ka ve soo u huan ugôgômbaakondov zenden a mi, shi ve soo ér i sughun ve sha icivir ken igbar,*+
39 shi ve soo u teman sha mkônom ma sha hemen* ken ushinagoge man sha ajiir a hemban doon hen uiniongo la.+
40 Ka ve ngohol uya mba* kasevmbacôgholov, shi ve eren mbamsen mba lihen ér ior ve nenge.* Vea ya mtsaha u hemban vihin.”
41 Tsô a tema inya, a gba kenger ape i ver mbaakwati mba inyar* la.+ Lu nengen er ikpelaior lu haan inyaregh shin mbaakwati mbara yô. Mbanyarev kpishi kpa lu haan samnyar shimi.+
42 Tsô kwasecôghol ugen lu icankwase, nahan va kende samnyar u gban kwagh ga, agbenger ahar.*+
43 Maa a yila mbahenen a kaa a ve ér: “Mimi je me kaa ne, kwasecôghol u a lu icankwase ne hemba kenden kwagh a mbagenev mba ve lu haan inyaregh shin mbaakwati mba inyar la cii.+
44 Gadia mbagenev cii na ka sha er ve lu a mi kpishi la, kpa un yô, er a lu ken ibanave nahan kpa, a na hanma kwagh u a lu a mi cii, man ka cii kwagh u a lu a mi u koson iyol na je la.”+
Ngeren mba shin kpe
^ Nenge Ngeren u Seer u A5 la.
^ Shin “ka sha tindi.”
^ Nenge Ngeren u Seer u B14 la.
^ Shin “a hembe lun u vesene?”
^ Nenge Ngeren u Seer u A5 la.
^ Nenge Ngeren u Seer u A5 la.
^ Nenge Ngeren u Seer u A5 la.
^ Nenge Ngeren u Seer u A5 la.
^ Shin “me kar nan we tahav mbu hemban mbahyomov ou.”
^ Zwa Grika, “sha ityembekasua.”
^ Shin “mkônom ma hemban doon.”
^ Shin “akaa a.”
^ Shin “sha ikparashe.”
^ Shin “mbaakwati mba eren iyua shimi.”
^ Zwa Grika, “ulepton uhar.” Ka kwaderan môm je la.
