Sha Uwegh ku Marku 3:1-35
3 Shi kwagen la Yesu za nyôr ken shinagoge, nahan orgen gema lu ker u uma* uwegh yô.+
2 Tsô ve haa ashe sha a na ér vea nenge una bee or la iwan sha Iyange i Memen yô, nahan vea zua a ityôkyaa i nan un ibo.
3 Maa a kaa a or u uman uwegh la ér: “Mough sha, va hen atô heen.”
4 Maa a pine ve ér: “Ka nyi tindi a ne ian ér i er sha Iyange i Memene? Ka kwagh u dedoo shin ka kwagh u bo? Ka u waren uma shin ka u wuana?”+ Kpa ve bugh zwa ga.
5 Gem kenger ve cii yô, vanger var un ker; vihi un er asema a ve a cighir yô.+ Maa a kaa a or la ér: “Naregh uwegh ough.” Tsô a naregh ku, maa uwegh nagh hide lu dedoo.
6 Nahan Mbafarishi due yem, maa fese je ve za kohol mbapatii mba Herode+ ve gba eren mhen u bo sha a na, sha u vea wua un.
7 Kpa Yesu moughon shin kpezegemnger vea mbahenen nav mba gbe yemen yô, ikpelaior i vesen i ken Galilia man Yudia dondo un ijime.+
8 Shi ken Yerusalem man Idumea man Yordan yande la man ken Tiru man Shidon je kpa ikpelaior i vesen due va hen a na, zum u ve ungwa akaa kpishi a a lu eren la yô.
9 Tsô a kaa a mbahenen nav ér ve va un a tso u cuku una nyôr shimi, sha er ikpelaior la ia imbishi un ga yô.
10 Er lu been ior kpishi iangev yô, mba ve lu a iangev mbi vesen cii kase un ér vea bende a na.+
11 Ujijingi mba bov+ je kpa hanma shighe u vea nenge a na yô, ve gba inya sha ishigh nagh, ve ôr genger genger ér: “U ngu Wan u Aôndo.”+
12 Kpa a ta ve icin gbang gbang acin imôngo ér ve de pasen ior or u un lu ga.+
13 Za unden sha uwo yô, a yila mba yange soo u yilan la,+ nahan ve va hen a na.+
14 A tsua ve ve lu iorov 12, a yila ve ér mbaapostoli. Lu u vea zenden vea na shi una tindin ve vea za pasen loho u dedoo,
15 shi una na ve tahav mbu zendan azôv ken ior kera.+
16 Iorov 12+ mba a tsua la, lu Shimon, un u a na un iti ér Peteru la;+
17 man Yakobu vea anmgbian na Yohane, ônov mba Sebedeu (yange na ve iti ér Uboanage, inja na yô ér “Uidyuranmbauôn”);+
18 man Anderia; Filibu man Batolomiu man Mateu; Toma man Yakobu, wan u Alefeu; Tadeu man Shimon, Orkana;*
19 kua Yuda Isekarioti, u va tee un la.
Tsô a nyôr ken iyou,
20 maa ikpelaior la shi va cir her, je yô kwaghyan tsô kpa ve lu fantyô u yan ga.
21 Mba hen tsombor na mba ongo nahan yô, ve due ve za ér vea za kôr un, sha ci u ve lu kaan ér: “A nyôr ihyundugh.”+
22 Shi mbangeren mba ve due ken Yerusalem ve va la kpa lu kaan ér: “Ngu a Belesebul,* nahan ka a zenda azôv ken ior kera sha tahav mbu tor u azôv la.”+
23 Tsô a yila ve a gba ôron ve kwagh sha anzaakaa, ér: “A er nan Satan una zenda Satan kera?
24 Aluer tartor pav ker yô, tartor la ua gba;+
25 ya kpaa, aluer a pav yô, ya la una fatyô u lun ga.
26 Shi aluer Satan mough num a iyol na, nahan a pav ker yô, una fatyô u lun ga, kwagh na bee a bee je.
27 Jighilii yô, or a fatyô u nyôron hen ya u or u taver iyol iin nan akaa ga, saa nana vande kangen or shon. Ka nahan ve nana fatyô u kuran nan akaa hen ya ye.
28 Mimi je me kaa ne, a fatyô u den ônov mba iorov akaa cii, a lu nyityô isholibo ve er, shin nyityô kwagh ve ôr sha ilyahan kpaa.
29 Kpa or u nan laha icighan jijingi yô, mayange a de nan isholibo la ga,+ kpa nana ya ibo i isholibo i been mayange ga.”+
30 Yange ôr kwagh ne sha ci u ve lu kaan ér: “Ngu a jijingi u bo.”*+
31 Tsô ngô na man anmgbianev nav+ za va va tile ken won, ve tindi or ér nana za yila un.+
32 Nahan er ikpelaior tema kase un la, i va kaa a na ér: “Nenge! Ngôu man anmgbianev ou mba ken won, mba pinen we.”+
33 Kpa a kaa a ve ér: “Ka an nan lu ngômô? Man ka unô ve lu anmgbianev ava?”
34 Maa a gema a kenger mba ve tema ve kase un la, a kaa ér: “Nenge, ngôm man anmgbianev av mban!+
35 Hanma or u nan eren ishima i Aôndo cii yô, ka nan nan luu anmgbian wam u nomso man anmgbian wam u kwase man ngôm ye.”+
