Washika u Yuda 1:1-25
1 Mo Yuda, kpan u Yesu Kristu man anmgbian u Yakobu,+ m ngu ngeren hen mba i yer ve,+ ve doo Aôndo Ter ishima shi i tsegha* ve sha u ve̱ va lu imôngo vea Yesu Kristu la:+
2 Aôndo a̱ seer zungwen ne mhôônom, shi a̱ seer nan ne bem, shi a̱ seer tesen ne dooshima.
3 Ne mba doon mo ishima, yange m lu nôngon tsung mer me nger ne washika sha kwagh u myom wase la,+ nahan kpa, m va nenge yô, gba kpee u me nger ne sha u taver ne ishima sha er ne nôngo kpoghuloo ne lu a jighjigh u nan+ u yange i na uicighanmbaiorov kwa môm vough, maa lu gbem sha won la.
4 Ityôkyaa i m lu a mi yô, ior mbagenev nyôr ken a ven myer. Ka mba ngise je Ruamabera vande kaan ér a ôr ve ijir yô. Ka ior mba cian Aôndo ga, mba ve gem erdoo u hemban u Aôndo wase la a hingir ve ityôkyaa i eren akaa a ndôhôrshima,*+ shi ve lu dondon Yesu Kristu, orvesen wase man Ter wase, sha mimi ga la.+
5 Er ne vande fan kwagh ne cii nahan kpa, m soo u umbur ne mer, Yehova* yange yima ior ken Igipiti,+ kpa va tim mbagenev ken a ve, mba ve na un jighjigh ga la.+
6 Shi mbatyomov mba yange ve de u eren ityom ve, ve gema ve undu ajiir a ve kpôô kpôô la,+ a kange ve a ikyangenev mbi tsôron ken ime i mgbigh mgbigh, mba keghen ijir i iyange i vesen la.+
7 Kape Sodom man Gomora kua agar a a kase ve la kpa er idya* kpoghuloo shi lu eren sha asaren a iyolough a sha gbaaôndo ga je la.+ I ôr ve ijir i tsaha ve sha usu u tsôron, nahan kwagh ve la hingir se icintan.+
8 Nahan cii kpa, ior mban kpa mba henen akaa a dang ken asema a ve shi hôngor ayol a ve, mba hendan a mbautahav kpaa, shi lamen dang sha mbacivirigh.+
9 Man yô, Mikael,+ ortyom u tamen la je kpa,+ zum u kwagh zua un a Diabolo, lu kperan ikyom i Mose a na la,+ a cihi a ôr un ijir ga, shi a ôr kwagh a na sha ilyahan kpaa ga,+ kpa a kaa ér: “Yehova* a̱ kure kwagh wou.”+
10 Kpa ior mban yô, mba lamen dang sha akaa a ve fe inja i a jighilii ga la cii.+ Shi akaa a ve fe sha gbaaôndo er ka annyamev mba ve henen kwagh ga nahan la cii,+ mba eren a, hôngor ayol a ve.
11 Kwagh a tser ve, sha ci u ve dondo gbenda u Kain la,+ shi ve usa yemen sha gbenda u bo u Balam la,+ sha u keren injar ve. Mba lamen dang er Kora+ u yange hemba ato la yô, nahan ve kpa a va tim ve kera!+
12 Ka ve lu hen uiniongo enev* er avande a shin mnger a a lu myer nahan,+ ve yaan kwagh a ven imôngo. Ka mbakuran mba wan zwa ve ikyo tseegh;+ mba er abeen a lun a ura ga, a ahumbe a lu ningir a a nahan,+ man er ikyon i ka a̱ lu shighe u i je kpa i ume ga, i i kpe njighe njighe,* i wuhe i kera nahan.
13 Mba er agôndo a zegemnger a a lu moughon sha utaha nahan, mba mbuan hugh u akaa a kunya ve la;+ shi mba er asan a a lu zenden nzughul nzughul nahan. A kende ve ken angôghime u hemban cii, vea lu ker gbem sha won.+
14 Enoki, or u ken kov u sha utaankaruhar ken tsombor u Adam la+ kpa ngise ôr kwaghôron u profeti sha a ve nahan ér: “Nenge! Yehova* va a uicighan nav udubu pue pue+
15 sha u va ôron ior cii ijir,+ nan mba ve civir Aôndo ga la cii ibo sha akaa a ve er u tesen ér mba civir Aôndo ga la cii, kua akaa a vihin tsung a mbaasorabo mba civir Aôndo ga ve ôr sha a na la cii.”+
16 Ior mban ka mbagbanahon,+ mba kwagh a kuman ve ga yô. Mba dondon asaren a ve,+ ôron uzegembaakaav, shi nyohon mbagenev zwa* sha er vea zua a mtsera ve yô.+
17 Kpa ne mba doon mo ishima, umbur nen akaa a ngise mbaapostoli mba Ter wase Yesu Kristu ôr* la.
18 Yange ve shi kaan a ven ér: “Ken ayange a masejime yô, mbanahantar vea due, vea lu dondon asaren a ve a bo la.”+
19 Ior mban ka mba van a mpav,+ mba er annyamev nahan,* mba a jijingi u Aôndo* ga.
20 Kpa ne mba doon mo ishima, seer taver nen ayol a en asema sha ityesen i ne ne jighjigh a mi la, eren nen msen sha tahav mbu icighan jijingi,+
21 sha u ne za hemen u eren akaa a ne doo Aôndo ishima,+ er ne lu keghen mhôônom ma Ter wase Yesu Kristu una va zungwe ne, nahan ne zua a uma u tsôron ne.+
22 Shi zungwen nen mba ve lu tan akperan la+ mhôônom,+
23 yima nen ve+ sha u tsuen ve ken usu kera. Kpa mbagenev yô, zungwen nen ve mhôônom a mciem iyol, kpa gema nyagh nen ikyondo ve i ve hôngor i sha aeren a iyolough la.+
24 Nahan yô, Aôndo u a lu a tahav mbu kuran ne sha u ne̱ de gbe ga, shi ne̱ de lu a acôghor iyol ga,+ ne̱ tile sha ishigh ki iengem na,* a iember tsung la,
25 un tswen u a yima se sha ikyev i Yesu Kristu, Ter wase la, iengem man icivir man agee man hanma tahav mbu tsôron cii ka mbu nav, sha ashighe a ken ijime la cii, man hegen man zan zan gbem sha won. Amen.
Ngeren mba shin kpe
^ Shin “i kura; i ver.”
^ Shin “i eren dang.” Ka ishember i ken zwa Grika i i yer ér aselgeia (asejia) la. Nenge Ngeren u Pasen Asember.
^ Nenge Ngeren u Seer u A5 la.
^ Nenge Ngeren u Pasen Asember.
^ Nenge Ngeren u Seer u A5 la.
^ Zwa Grika, “uiniongo enev mba tesen dooshima.”
^ Zwa Grika, “i kpe kwa har.”
^ Nenge Ngeren u Seer u A5 la.
^ Shin “shi wuese ior sha mimi ga.”
^ Shin “tsengaôron.”
^ Shin “mba eren kwagh sha inja i iyolough.”
^ Zwa Grika, “mba a jijingi.”
^ Shin “iengem i hen ishigh nagh.”
