Daniel 12:1-13

  • Hii “shighe u mkur” la yem ken hemen (1-13)

    • Mikael una mough a tile sha (1)

    • Mbalun a kwaghfan vea mondo a wanger (3)

    • Mfe u mimi una dumbur (4)

    • Daniel una mough a tile sha, sha ci u kwar na (13)

12  “Hen shighe la, Mikael*+ orhemen u vesen,+ un u a til sha ityough ki ior ou* la una mough a tile sha. Shi ican ia er, imba i hii shighe u ikyurior hii u lun la zan zan shighe la i lu a er ga yô. Shi hen shighe la, ior ou vea war,+ hanma or u i nger iti i nan ken takeda la cii.+ 2  Shi ior kpishi mba ve yav shin vuulevu u inyaagh la vea nder. Mbagenev vea za ken uma u tsôron, mbagen di vea za ken ilyahan man ken ihyeen i tsôron. 3  “Shi mba ve lu a kwaghfan la vea mondo a wanger er kwavaôndo nahan. Shi mba ve lu van a ior kpishi ken perapera la, vea lu er asan nahan zan zan gbem sha won. 4  “We yô, Daniel, yer mkaanem man, cir takeda la zan zan shighe u mkur.+ Ior kpishi vea zende wue wue,* shi mfe u mimi una dumbur.”+ 5  Tsô mo Daniel, m kenger yô, m nenge iorov uhar mbagen tile her, or môm hen kpe u uwaagh vegher ne, ugen la di ken kpe u uwaagh vegher la.+ 6  Maa orgen la gema pine or u hua ikyondo i injaa iyol,+ u tile sha mngerem ma uwagh shon la ér: “Shighe a kar a kuma nan ve mkur u akaa a kpilighyol ne una va?” 7  Tsô m ungwa or u hua ikyondo i injaa iyol, u tile sha mngerem ma uwagh shon la, kende uwegh nagh ku iyanegh man ku imesegh sha, bum ken iti i Un u a lu uma gbem sha won la+ kaa ér: “A lu sha shighe u i ver la man ashighe a i ver la kua veghershighe.* A hemben tahav mbu uicighanmbaiorov avur avur a been nahan maa,+ akaa ne cii aa kure.” 8  Mo yô, m ungwa, kpa m kav ga;+ nahan m kaa mer: “Terem, akaa ne aa kure nena?” 9  Maa a kaa a mo ér: “Yem Daniel, sha ci u gba u a yer mkaanem mara, a cir ma zan zan shighe u mkur.+ 10  Shi ior kpishi vea wanger ayol a ve, vea kire ayol a ve a engem wang, shi a sôr ve.+ Shi aferaior aa er aferakaa; iferor môm nana kav ga, kpa mba ve lu a kwaghfan yô, vea kav.+ 11  “Hii shighe u i kar a kwagh u i eren ayange ayange*+ kera, i gema i ver kwagh u ndôhôrshima u ka a va a mtim la,+ a lu ayange 1,290. 12  “Saan or u nan ze hemen u veren ishima keghen, u nan nyer sha ayange a 1,335 la iyol! 13  “Kpa we yô, yem ken mkur. Ú mem, kpa u va mough u tile sha, sha ci u kwar wou* hen mkur u ayangegh.”+

Ngeren mba shin kpe

^ Inja na yô ér, “Ka An Nan Lu Er Aôndo Nahana?”
^ Zwa Heberu, “ônov mba ior ou mba nomso.”
^ Shin “vea time ker [ka takeda la je la] vighe vighe.”
^ Ka ashighe atar man tiôn je la.
^ Shin “nagh ku i naan hanma shighe.”
^ Shin “ijiir you i i ne u la.”

Copyrights for this publication