Daniel 7:1-28
7 Ken inyom i hiihii i Beleshasar+ tor u Babilon la, mnyam cier Daniel, shi a nenge a mbampase mba sha mnenge ken ityough nagh er a yav sha gambe na la.+ Tsô a nger mnyam mara;+ a nger akaa la shin inya vindi vindi.
2 Daniel kaa ér:
“M lu kenger mbampase av mba sha mnenge tugh, maa nenge! ahumbe anyiin a sha lu gbuusu zegemnger.+
3 Tsô inyam i vesen inyiin+ due shin zegemnger, hanma inyam yô, lu kposo a igen.
4 “Inyam i hiihii la, lu er begha nahan,+ i lu a akper a igyuve.+ M kenger zan zan i va tsua akper a i kera, i kôr i hen inya i mough a mi sha, i er i i tile sha angahar ahar er or nahan, shi i na i ishima i or.
5 “Shi nenge! inyam igen, ka inyam i sha uhar je la, i lu er biya* nahan.+ I kende a i sha vegher môm, shi ahan atar lu i ken zwa hen atô u anyi a i; maa i kaa a i ér, ‘Mough sha, ya inyam kpishi.’+
6 “Kwagh ne been yô, m lu kenger her, maa nenge! inyam igen, i lu er anyamazenga nahan,+ kpa i gema i lu a akper anyiin sha ijime i i er a inyon nahan. Shi inyam la lu a mtom mnyiin,+ i na i tahav mbu hemen.
7 “Kwagh ne been yô, m za hemen u nengen mbampase mba sha mnenge mba utu, nahan m nenge a inyam i sha unyiin, i cieryol shi i ta ihindi iyol, shi i taver iyol je gande, shi i lu a uzegembaanyiiv mba iyôôgh. I lu anden shi njighen, shi kwagh u una mase shin la, i ndyar sha angahar a i.+ I lu kposo a inyam igen i i vande van a i la cii, i lu a akor pue.
8 M ngur kenger shi henen sha kwagh u akor la yô, nenge! korough kugen ku kiriki+ due hen atô u akor la; i tsua akor atar ken akor a hiihii la kera sha ishigh nagh, maa nenge! ashe a lun er ashe a or nahan lu sha korough kun, shi zwa lu sha mi u u lu lamen sha igbongor yô.*+
9 “M kenger zan zan i va ver mkônom ma torom, maa Or u Tsan sha Won+ va tema.+ Ikyondo na kungu er senou nahan,+ shi ice na i sha ityo lu er mou u pupuu nahan. Ikyônough nagh ki torough lu iniomborusu; akaver a ki lu usu u hian.+
10 Berusu due sha ishigh nagh lu kuan.+ Ior udubu udubu lu eren un tom, shi ior dubu pue kwa dubu pue tile sha ishigh nagh.+ Koti+ tema ijir, nahan i bugh ityakeda.
11 “M lu kenger her hen shighe la, sha ci u imo i akaa a korough kura lu ôron sha igbongor la;*+ m kenger zan zan i wua inyam la, i er a iyol i i icaver icaver, maa i na i ér i nande sha usu.
12 Kpa inyam igen la cii yô,+ i ngohol i hemen kera, kpa i gema i seer uma u i sha anshighe man iaven.
13 “M za hemen u kenger ken mbampase mba sha mnenge mba utu la, nahan nenge! or u lun er wan u or nahan,+ mough sha abeen a sha lu van; i na un ian a va hen Or u Tsan sha Won la,+ i va a na ikyua ikyua sha ishigh ki Or shon.
14 Tsô i na un hemen+ man icivir+ kua tartor ér, ior man akuraior kua ior mbalamen ijô kposo kposo cii ve er un tom.+ Hemen na ka hemen u lun gbem sha won, u ua kar kera ga yô, shi tartor na kpa a tim u kera ga.+
15 “Mo Daniel yô, ishima zam iyol sha ci u mbampase mba sha mnenge mba m nenge a mi ken ityough yagh la na yô, cier mo iyol.+
16 M za ikyua a or môm ken ior mba ve tile her la, sha u me pine un kwagh u a lu inja i kwagh ne jim jim yô. Tsô a bugh zwa, a pasem inja i akaa ne.
17 “‘Inyam i vesen i i lu inyiin ne,+ ka utor unyiin mba vea mough a tile sha, shin tar yô.+
18 Kpa uicighanmbaiorov mba Un u A Hembe sha Won la+ vea zua a tartor,+ nahan vea ya dyako u tartor+ la gbem sha won, een, zan zan gbem sha won.’
19 “Tsô m soo u seer fan kwagh u inyam i sha unyiin i i lu kposo a inyam igen cii la; i cieryol je gande, i lu a anyi a iyôôgh man akughur a togula, i lu anden shi njighen, shi kwagh u una mase shin la, i ndyar sha angahar a i;+
20 kua kwagh u akor pue+ a sha ityough ki i la, man korough kugen ku ku due, ku akor atar gba+ sha ishigh ki ku, korough ku ku lu a ashe man zwa, ku lu lamen sha igbongor* shi ku hemba kehen a agen la.
21 “M lu kenger er korough kura nôngo ityav a uicighanmbaiorov, shi ku lu hemban ve ityav yô,+
22 zan zan Or u Tsan sha Won+ la va va ôr ijir, na uicighanmbaiorov mba Un u A Hembe sha Won+ la ishô, shi shighe u uicighanmbaiorov mbara vea ya dyako u tartor la kuma.+
23 “Ka kwagh u ôr je ne, ér: ‘Hide inyam i sha unyiin la yô, tartor u sha unyiin ngu u ua va lu shin tar yô. Ua lu kposo a ityartor igen la cii, shi ua tim tar cii, ua ndyar u angahar, ua njighe u.+
24 Hide akor pue la yô, utor pue vea due ken tartor la; vea kera luun ga yô, tor ugen una due, una lu kposo a utor mba hiihii mbara, shi una hee utor utar.+
25 Una ôr akaa sha Uhemban Cii la, shi una za uicighanmbaiorov mba Un u A Hembe sha Won+ la iyol zan zan. Awashima na a lu u geman ashighe man tindi, nahan a na ve sha ikyev na, sha shighe man ashighe kua veghershighe.*+
26 Kpa koti tema ijir, nahan i kar a hemen na kera, sha er a tim un shi a bee a na kera vindi vindi yô.+
27 “‘Tsô i gema tartor man hemen kua icivir i ityartor i i lu shin tar la cii, i na ior mba ve lu uicighanmbaiorov mba Un u A Hembe sha Won+ la. Tartor+ ve ka u lun gbem sha won, shi hanma hemen cii ua er ve tom shi ua ungwa imo ve.’
28 “Ka mkur u kwagh shon je ne. Kpa mo Daniel yô, akaa a m hen sha mi la na cier mo iyol tsung, je yô, ishigh yagh gema sha mi;* kpa m koso kwagh ne ken ishima yam.”
