Daniel 5:1-31
5 Shighe u Beleshasar+ lu tor la, a er zegeiniongo sha ci u ashagbaaior a na dubu, nahan lu man wain sha ishigh vegh.+
2 Beleshasar me wain ka nyer un iyol yô, a kaa ér i za va a ikyav mbi zanaria man azurufa mbi ter na Nebukadinesar kura ken tempel ken Yerusalem la,+ sha er tor man ashagbaior a na man kasev nav mba sha uikya kua kasev nav mbagen vea ma kwagh shimi yô.
3 Tsô ve va a ikyav mbi zanaria mbi i kura ken tempel u iyou i Aôndo ken Yerusalem la, nahan tor man ashagbaior a na man kasev nav mba sha uikya kua kasev nav mbagen, ma kwagh shimi.
4 Ve ma wain ve wuese mbaaôndo mba sha zanaria man azurufa man mba sha togula man iyôgh man kon kua iwen.
5 Hen shighe la je, ahôaveegh a or due gba ngeren kwagh sha kpekpe u kôngor u hen ya u tor, u na ishigh ken daarimenger la. Tor lu nengen a ijime i uwegh ku ku lu ngeren kwagh la.
6 Maa ishigh ki tor gema sha mi* shi mbamhen mba ken ishima na, na cier un iyol, nahan akooso a na yoghol,+ shi anu a na gba kunden zuan.
7 Tsô tor yila mbaakombov man Mbakaldi* kua mbanengenasan+ genger genger. Tor kaa a mbafankwagh mba Babilon ér: “Hanma or u nana ôr ngeren ne shi nana pasem inja na cii yô, a haa nan ikyondo i nyian dindee iyol shi a har nan ishiligh ku zanaria sha mon,+ nahan nana lu orhemen u sha utar ken tartor ne.”+
8 Maa mbafankwagh mba tor cii va nyôr, kpa ve fatyô u ôron kwaghngeren la shin pasen tor inja na ga.+
9 Nahan cier tor Beleshasar iyol kpishi, ishigh nagh gema sha mi; shi ashagbaior a na kpa kpiligh a iyol.+
10 Torkwase ongo mkaanem ma tor man ashagbaior a na yô, a nyôr ken iyou i i lu eren iniongo la. Maa torkwase kaa ér: “Tor a lu uma gbem. De deen wer mbamhen ou ve na i cier we iyol shin ishigh you ki gema sha mi ga.
11 Orgen ngu ken tartor wou u a lu a jijingi u uicighanmbaaôndo yô. Sha ayange a teru la, i zua un a mfe man mkav kua kwaghfan u lun er kwaghfan u mbaaôndo nahan.+ Teru Tor Nebukadinesar tsua un lu orvesen u upristi mba eren ahir man mbaakombov man Mbakaldi* kua mbanengenasan;+ ka kwagh u teru yange er je la, tor.
12 Gadia Daniel, un u tor na un iti ér Beleteshasar+ la, lu a jijingi u kpilighyol man mfe kua mkav u pasen mnyam shi pasen ukikya shi sôron mbamzeyol mba taver.*+ Yô, de i yila Daniel, nahan una pase u inja i kwaghngeren la.”
13 Tsô i va a Daniel sha ishigh ki tor. Tor maa pine Daniel ér: “Ka we Daniel u ken Mbayuda mba i ve a ve uikyangen,+ we u terem tor mough a we ken Yuda va a mi nee?+
14 M ungwa mer jijingi u mbaaôndo ngu ken a we,+ shi i zua a mfe man mkav kua kwaghfan u kpilighyol ken a we.+
15 I va a mbafankwagh man mbaakombov sha ishigh yagh ér ve ôr kwaghngeren ne shi ve pasem inja na, kpa mba fantyô u pasen mo inja i loho shon ga.+
16 Kpa m ungwa mer we ka u fatyô u pasen inja i akaa+ shi u sôr mbamzeyol mba taver.* Nahan hegen aluer u fatyô u ôron kwaghngeren la shi pasen mo inja na yô, a haa u ikyondo i nyian dindee iyol shi a har u ishiligh ku zanaria sha mon, nahan u hingir orhemen u sha utar ken tartor ne.”+
17 Daniel gema kaa a tor ér: “Lu a uiyua ou, gema uiyua ou na mbagen. Nahan kpa, me ôr tor kwaghngeren la, shi me pase un inja na.
18 We tor, Aôndo u Hemban Cii la, yange na teru Nebukadinesar tartor man mhembe man icivir kua iengem.+
19 Sha ci u mhembe u yange na un la yô, ior man akuraior kua mbalamen ijô kposo kposo cii, gbidyen akarkase iyol sha mcie sha ishigh nagh.+ Hanma or u a soo cii a wua kera shin a de nan lu uma, shi hanma or u a soo cii a kende a nan sha, shin a hee nan.+
20 Kpa igbongor ngi va nyer un ken ishima shi ishima na cighir yô, a er kwagh u i na un ian u eren ga yô;+ nahan i hungwa a na sha ikyônough nagh ki torough sha, shi icivir na kpa i kar a mi kera.
21 I zenda un hen atô u uumace kera, shi i er ishima na hingir er i annyamev nahan, shi a yem a za lu vea ujaki mba ken toho. I na un imendenev a ya er ibua nahan, shi avure a sha gba sha a na heen un iyol, zan zan a fa er Aôndo u Hemban Cii la a lu Orhemen ken tartor u uumace shi ka a ver or u a soo cii sha u yô.+
22 “Kpa we wan na Beleshasar u hide a iyol you ijime ga, shin er u fe kwagh ne cii nahan kpaa.
23 Kpa u gema u kende a iyol you sha hen Ter u sha,+ u kaa ve ve va u a ikyav mbi ken iyou na.+ Nahan we man ashagbaior a ou man kasev ou mba sha uikya kua kasev ou mbagen, ne ma wain shin ikyav mbira, ne wuese mbaaôndo mba sha azurufa man zanaria, man mba sha togula man iyôgh man kon kua iwen, mbaaôndo mba ve nengen ga shi ve ongo ga shi ve fe kwagh môm ga la.+ Kpa Aôndo u iôôn you+ man igbenda you cii i lu ken uwegh nagh la yô, u wuese un ga.
24 Ka nahan ve a tindi uwegh ku va nger kwagh ne ye.+
25 Man ka kwaghngeren shon je ne: MENE, MENE, TEKEL man PARSHIN.
26 “Ka inja i asember shon je ne: MENE, Aôndo ôr ayange a tartor wou, nahan a va a u ken mkur.+
27 “TEKEL, i kar u sha akaa a karen kwagh yô, u yina.
28 “PERESE, i pav tartor wou ker, i na Mbamede man Mbapershia.”+
29 Tsô Beleshasar na wada i haa Daniel ikyondo i nyian dindee iyol shi i har un ishiligh ku zanaria sha mon; maa ve yôô kwagh na genger genger ér una lu orhemen u sha utar ken tartor la.+
30 Hen tugh mbura je, i wua Beleshasar tor u Mbakaldi.+
31 Maa Dariu+ Ormede ngohol tartor la; a kuma er anyom 62 nahan.
